ਸਰੀ ( ਦੇ ਪ੍ਰ ਬਿ)– ਪ੍ਰੋਗਰੈਸਿਵ ਇੰਟਰਕਲਚਰਲ ਕਮਿਊਨਿਟੀ ਸਰਵਿਸਿਜ਼ ਸੋਸਾਇਟੀ (PICS) ਅਤੇ ਇਸਦੇ ਸੀਈਓ ਸਤਿਬੀਰ ਸਿੰਘ ਚੀਮਾ ਖਿਲਾਫ ਪਿਛਲੇ ਦਿਨੀ ਲਗਾਏ ਗਏ ਦੋਸ਼ਾਂ ਦੀ ਜਾਂਚ ਕਰ ਰਹੀ ਏਜੰਸੀ ਕੇਪੀਐਮਜੀ ਨੇ ਸਮੀਖਿਆ ਦੇ ਨਤੀਜੇ ਜਨਤਕ ਕਰ ਦਿੱਤੇ ਹਨ। ਜਾਂਚ ਏਜੰਸੀ ਨੇ ਆਪਣੀ ਰਿਪੋਰਟ ਵਿਚ ਕਿਹਾ ਹੈ ਕਿ ਪਿਕਸ ਦੇ ਤਤਕਾਲੀ ਸਾਬਕਾ ਚੇਅਰ ਮਿਸਟਰ ਡੇਵ ਹੰਸ ਦੁਆਰਾ PICS ਅਤੇ ਇਸਦੇ CEO ਖਿਲਾਫ ਕਿਸੇ ਵੀ ਦੋਸ਼ ਦਾ ਸਮਰਥਨ ਕਰਨ ਵਾਲਾ ਕੋਈ ਸਬੂਤ ਨਹੀਂ ਮਿਲਿਆ ਹੈ। ਇਹ ਜਾਂਚ ਸੁਤੰਤਰ ਥਰਡ-ਪਾਰਟੀ ਫੋਰੈਂਸਿਕ ਸੇਵਾਵਾਂ ਪ੍ਰਦਾਨ ਕਰਨ ਵਾਲੀ ਸੰਸਥਾ KPMG ਦੁਆਰਾ ਕੀਤੀ ਗਈ ਗਹਿਰੀ ਖੋਜ ‘ਤੇ ਆਧਾਰਿਤ ਹੈ। ਕੇਪੀਐਮਜੀ ਨੇ ਆਪਣੀ ਗੁਪਤ ਰਿਪੋਰਟ PICS ਬੋਰਡ ਦੀ ਵਿਸ਼ੇਸ਼ ਕਮੇਟੀ ਨੂੰ ਸੌਂਪ ਦਿੱਤੀ ਹੈ।
ਪਿਕਸ ਬੋਰਡ ਨੇ ਜਾਂਚ ਏਜੰਸੀ ਵਲੋਂ ਪੇਸ਼ ਕੀਤੀ ਗਈ ਰਿਪੋਰਟ ਉਪਰ ਤਸੱਲੀ ਤੇ ਖੁਸ਼ੀ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਭਾਵੇਂਕਿ ਕਿ ਏਜੰਸੀ ਨੇ ਦੋਸ਼ਾਂ ਨੂੰ ਬੇਬੁਨਿਆਦ ਦੱਸਿਆ ਹੈ, ਪਰ ਸਾਨੂੰ ਇਸ ਗੱਲ ਦਾ ਦੁੱਖ ਹੈ ਕਿ ਸਾਡੀ 36 ਸਾਲ ਪੁਰਾਣੀ ਸੰਸਥਾ, ਜਿਸ ਨੇ ਹਮੇਸ਼ਾ ਆਪਸੀ ਸਤਿਕਾਰ ਵਾਲੇ ਭਾਈਚਾਰੇ ਦੇ ਨਿਰਮਾਣ ਲਈ ਕੰਮ ਕੀਤਾ ਹੈ, ਦੀ ਸਾਖ ਨੂੰ ਗੰਧਲਾ ਕਰਨ ਦਾ ਯਤਨ ਕੀਤਾ ਗਿਆ ਹੈ। ਸਾਨੂੰ ਭਰੋਸਾ ਹੈ ਕਿ ਕੇਪੀਐਮਜੀ ਰਿਪੋਰਟ ਦੇ ਨਤੀਜੇ ਗੁਰੂ ਨਾਨਕ ਡਾਇਵਰਸਿਟੀ ਵਿਲੇਜ ਪ੍ਰੋਜੈਕਟ ਵਿੱਚ ਸ਼ਾਮਲ ਸਾਰੇ ਹਿੱਸੇਦਾਰਾਂ ਨੂੰ ਤਸੱਲੀ ਪ੍ਰਦਾਨ ਕਰਨਗੇ। ਬੋਰਡ ਨੂੰ ਸੀਈਓ ਸਮੇਤ PICS ਦੇ ਪ੍ਰਬੰਧਨ ਵਿੱਚ ਪੂਰਾ ਭਰੋਸਾ ਹੈ। ਅਸੀਂ ਜਾਣਦੇ ਹਾਂ ਕਿ ਇੱਕ ਕਮਿਊਨਿਟੀ ਏਜੰਸੀ ਵਜੋਂ PICS ਦੇ ਕੰਮ ਵਿੱਚ ਲੋਕਾਂ ਦਾ ਭਰੋਸਾ ਰੱਖਣਾ ਕਿੰਨਾ ਮਹੱਤਵਪੂਰਨ ਹੈ, ਅਤੇ PICS ਨੇ ਇਸ ਮਾਮਲੇ ਨੂੰ ਬਹੁਤ ਗੰਭੀਰਤਾ ਨਾਲ ਲਿਆ ਹੈ। ਸਾਡੀ ਸੰਸਥਾ ਹੁਣ ਵਧੀਆ ਕੰਮ ਕਰਨ ਲਈ ਅੱਗੇ ਵਧੇਗੀ ਜਿਸ ਲਈ PICS 1987 ਵਿੱਚ ਸਥਾਪਿਤ ਹੋਣ ਤੋਂ ਬਾਅਦ ਪ੍ਰਸਿੱਧ ਹੈ। ਅਸੀਂ ਇਸ ਮੁਸ਼ਕਲ ਸਮੇਂ ਦੌਰਾਨ ਆਪਣੇ ਸਮਰਪਣ, ਸਮਰਥਨ ਅਤੇ ਲਗਨ ਲਈ ਆਪਣੇ ਸਟਾਫ ਅਤੇ ਸਮਰਥਕਾਂ ਦਾ ਧੰਨਵਾਦ ਕਰਦੇ ਹਾਂ ਅਤੇ ਇਸ ਵਿੱਚ ਕਿਸੇ ਵੀ ਸੰਭਾਵੀ ਅਗਲੇ ਕਦਮਾਂ ਦੀ ਸਮੀਖਿਆ ਕਰ ਰਹੇ ਹਾਂ।
ਮਾਮਲੇ ਦਾ ਪਿਛੋਕੜ: -7 ਸਤੰਬਰ, 2022 ਨੂੰ, PICS ਨੂੰ ਤਤਕਾਲੀ ਬੋਰਡ ਦੇ ਸਾਬਕਾ ਚੇਅਰਮੈਨ ਮਿਸਟਰ ਹੰਸ ਦੁਆਰਾ ਉਸ ਸਮੇਂ ਦੇ ਪ੍ਰੀਮੀਅਰ ਜੌਹਨ ਹੌਰਗਨ ਨੂੰ ਭੇਜੇ ਇੱਕ ਪੱਤਰ ਬਾਰੇ ਪਤਾ ਲੱਗਾ।ਜਿਸ ਵਿਚ ਸ਼੍ਰੀ ਹੰਸ ਨੇ PICS ਅਤੇ ਇਸਦੇ ਸੀਈਓ ਬਾਰੇ ਕਈ ਗੰਭੀਰ ਦੋਸ਼ ਲਗਾਏ, ਅਤੇ ਬਾਅਦ ਵਿੱਚ ਮੀਡੀਆ ਵਿਚ ਟਿੱਪਣੀਆਂ ਕੀਤੀਆਂ। ਇਹ ਨੋਟ ਕਰਨਾ ਮਹੱਤਵਪੂਰਨ ਹੈ ਕਿ ਉਹ 28 ਅਗਸਤ, 2022 ਨੂੰ ਹੋਈ ਸਲਾਨਾ ਜਨਰਲ ਮੀਟਿੰਗ ਦੇ ਉਹ ਪ੍ਰਧਾਨ ਸਨ ਅਤੇ ਪੱਤਰ ਵਿੱਚ ਉਠਾਈਆਂ ਗਈਆਂ ਚਿੰਤਾਵਾਂ ਵਿੱਚੋਂ ਕਿਸੇ ਦਾ ਵੀ AGM ਵਿੱਚ ਹਾਜ਼ਰ ਲੋਕਾਂ ਨੂੰ ਜ਼ਿਕਰ ਨਹੀਂ ਕੀਤਾ ਗਿਆ ਸੀ। ਇਹ ਨੋਟ ਕਰਨਾ ਹੋਰ ਵੀ ਮਹੱਤਵਪੂਰਨ ਹੈ ਕਿ ਇਲਜ਼ਾਮ ਲਗਾਉਣ ਵਾਲੇ ਵਿਅਕਤੀ ਨੇ ਅਜਿਹਾ ਕੁਝ ਉਸਦੇ ਦੁਬਾਰਾ ਨਾ ਚੁਣੇ ਜਾਣ ਕਾਰਣ ਕੀਤਾ ਗਿਆ।
ਬੋਰਡ ਵਲੋਂ ਸ ਤੋਚੀ ਸੰਧੂ ਨੂੰ 28 ਅਗਸਤ, 2022 ਨੂੰ ਬੋਰਡ ਮੀਟਿੰਗ ਵਿੱਚ ਅਤੇ ਏ.ਜੀ.ਐਮ ਤੋਂ ਤੁਰੰਤ ਬਾਅਦ ਸਰਬਸੰਮਤੀ ਨਾਲ ਬੋਰਡ ਚੇਅਰਮੈਨ ਵਜੋਂ ਚੁਣਿਆ ਗਿਆ ਸੀ ਜਿਸ ਵਿੱਚ ਸ੍ਰੀ ਹੰਸ ਮੌਜੂਦ ਸਨ ਤੇ ਉਹ ਇਸ ਅਹੁਦੇ ਲਈ ਲਈ ਨਹੀਂ ਚੁਣੇ ਗਏ ਸਨ।
