ਸਰੀ ਫ਼ਿਊਜ਼ਨ ਮੇਲੇ ’ਚ ਗੋਲਡਨ ਸਟਾਰ ਮਲਕੀਤ ਸਿੰਘ ਨੇ ਕਰਵਾਈ ‘ਬੱਲੇ-ਬੱਲੇ’

*ਵੱਖ-ਵੱਖ ਦੇਸ਼ਾਂ ਦੇ ਹੋਰਨਾਂ ਕਲਾਕਾਰਾਂ ਨੇ ਵੀ ਕੀਤਾ ਆਪਣੇ ਫ਼ਨ ਦਾ ਮੁਜ਼ਾਹਰਾ-

*ਨੌਜਵਾਨਾਂ ਨੇ ਇਕ-ਦੂਸਰੇ ਦੇ ਮੋਢੇ ’ਤੇ ਚੜ੍ਹ ਕੇ ਲਈਆਂ ‘ਸੈਲਫ਼ੀਆਂ-*ਪੰਜਾਬੀ ਗੱਭਰੂਆਂ ਅਤੇ ਮੁਟਿਆਰਾਂ ਤੋਂ ਇਲਾਵਾ ਗੋਰੇ ਵੀ ਰਹੇ ਦੇਰ ਰਾਤ ਤੀਕ ਝੂੰਮਦੇ

ਵੈਨਕੂਵਰ, 22 ਜੁਲਾਈ (ਮਲਕੀਤ ਸਿੰਘ )-ਤਕਰੀਬਨ ਤਿੰਨ ਦਹਾਕੇ ਪਹਿਲਾਂ ‘ਤੂਤਕ-ਤੂਤਕ-ਤੂਤਕ-ਤੂਤੀਆਂ……..……!’ ਚਰਚਿਤ ਗੀਤ ਨਾਲ ਗਾਇਕੀ ਖੇਤਰ ’ਚ ਨਿੱਤਰੇ ਸਦਾਬਹਾਰ ਅਤੇ ਪ੍ਰਸਿੱਧ ਪੰਜਾਬੀ ਗਾਇਕ ਗੋਲਡਨ ਸਟਾਰ ਮਲਕੀਤ ਸਿੰਘ ਨੇ ਬੀਤੀ ਰਾਤ ਪੰਜਾਬੀਆਂ ਦੀ ਸੰਘਣੀ ਵੱਸੋਂ ਵਾਲੇ ਕੈਨੇਡਾ ਦੇ ਸਰੀ ਸ਼ਹਿਰ ’ਚ ਗੀਤਾਂ ਦੀ ਛਹਿਬਰ ਲਗਾ ਕੇ ਦੇਰ ਰਾਤ ਤੀਕ ਰੌਣਕਾਂ ਲਗਾ ਕੇ ਇਕੇਰਾ ‘ਬੱਲੇ-ਬੱਲੇ’ ਕਰਵਾ ਛੱਡੀ। ਇੱਥੇ ਜ਼ਿਕਰਯੋਗ ਹੈ ਕਿ ਸਰੀ ਸਿਟੀ ਵੱਲੋਂ ਹਰ ਸਾਲ ਸਰੀ ਦੇ ਹਾਲੈਂਡ ਪਾਰਕ ’ਚ ਵੱਖ-ਵੱਖ ਦੇਸ਼ਾਂ ਦੇ ਕਲਚਰ ਦੀ ਪੇਸ਼ਕਾਰੀ ਕਰਨ ਅਤੇ ਸਬੰਧਿਤ ਲੋਕਾਂ ਦੇ ਮਨੋਰੰਜਨ ਲਈ ‘ਸਰੀ ਫ਼ਿਊਜ਼ਨ ਮੇਲਾ’ ਕਰਵਾਇਆ ਜਾਂਦਾ ਹੈ। ਇਸ ਵਾਰ 17ਵੇਂ ਮੇਲੇ ਦੌਰਾਨ ਐਤਵਾਰ ਦੀ ਰਾਤ ਨੂੰ ਸਥਾਨਕ  ਪੰਜਾਬੀ ਰੇਡੀਓ  ਰੈਡ. ਐੱਫ਼. ਐੱਮ.’ ਦੇ ਸਹਿਯੋਗ ਨਾਲ ਪੰਜਾਬੀਆਂ ਦੇ ਮਨੋਰੰਜਨ ਲਈ ਇਕ ਸੱਭਿਆਚਾਰਕ ਸ਼ਾਮ ਦਾ ਆਯੋਜਨ ਕਰਵਾਇਆ ਗਿਆ, ਜਿਸ ’ਚ ਇੰਗਲੈਂਡ ਤੋਂ ਉਚੇਚੇ ਤੌਰ ’ਤੇ ਪੁੱਜੇ ਪ੍ਰਸਿੱਧ ਪੰਜਾਬੀ ਗਾਇਕ ਗੋਲਡਨ ਸਟਾਰ ਮਲਕੀਤ ਸਿੰਘ ਵੱਲੋਂ ਰਾਤੀਂ 9 ਵਜੇ ਤੋਂ ਦੇਰ ਰਾਤ ਤੀਕ ਲਗਾਤਾਰ ਚੋਣਵੇਂ ਗੀਤਾਂ ਦੀ ਛਹਿਬਰ ਲਗਾ ਕੇ ਹਜ਼ਾਰਾਂ ਦੀ ਗਿਣਤੀ ’ਚ ਉਥੇ ਮੌਜ਼ੂਦ ਪੰਜਾਬੀਆਂ ਨੂੰ ਨੱਚਣ ਲਗਾਈ ਰੱਖਿਆ ਗਿਆ।
ਇਸ ਸੱਭਿਆਚਾਰਕ ਸ਼ਾਮ ਦੀ ਸ਼ੁਰੂਆਤ ਗਾਇਕ ਮਲਕੀਤ ਸਿੰਘ ਵੱਲੋਂ ‘ਅੱਜ ਭੰਗੜਾ ਪਾਉਣ ਨੂੰ ਜੀਅ ਕਰਦਾ……!’, ‘ਕਾਲੀ ਐਨਕ ਨਾ ਲਾਇਆ ਕਰ……!, ‘ਯਾਰੀ ਜੱਟਾਂ ਦੇ ਮੁੰਡੇ ਨਾਲ ਲਾਈਏ…..!’, ‘ਕੁੜੀ ਕੱਢ ਕੇ ਕਾਲਜਾ ਲੈ ਗਈ ਓਏ…..!’, ‘ਅੱਜ ਮਾਂ ਦੇ ਹੱਥਾਂ ਦੀਆਂ ਪੱਕੀਆਂ ਰੋਟੀਆਂ ਖਾਣ ਨੂੰ ਬੜਾ ਈ ਚਿੱਤ ਕਰਦੈ…..!’ ਸਮੇਤ ਕੁਝ ਹੋਰ ਗੀਤਾਂ ਦੀ ਲੜੀ ਲਗਾ ਕੇ ਮਾਹੌਲ ਨੂੰ ਰੰਗੀਨ ਬਣਾਈ ਰੱਖਿਆ ਗਿਆ।
*ਕਾਲੀ ਐਨਕ ਦੇ ਦੀਵਾਨੇ ਐਨਕਾਂ ਲਾਕੇ ਪੁੱਜੇ-
ਮਲਕੀਤ ਸਿੰਘ ਦੇ ਅਜੋਕੇ ਚਰਚਿਤ ਗੀਤ ‘ਕਾਲੀ ਐਨਕ ਨਾ ਲਾਇਆ ਕਰ ਨੀਂ, ਤੂੰ ਪਹਿਲਾਂ ਈ ਸੋਹਣੀ ਆਂ…..!, ਦੀ ਤਾਲ ’ਤੇ  ਭੰਗੜਾ ਪਾਉਣ ਦਾ ਮੂਡ ਬਣਾ ਕੇ ਮੇਲੇ ’ਚ ਪੁੱਜੇ ਰੰਗੀਨ ਮਿਜ਼ਾਜ਼ ਦੇ ਕੁਝ ਦਰਸ਼ਕਾਂ ਵੱਲੋਂ ਲਗਾਈਆਂ ਕਾਲੀਆਂ ਐਨਕਾਂ ਨਾਲ ਮਾਹੌਲ ਦਿਲਚਸਪ ਬਣਿਆ ਨਜ਼ਰੀ ਆਇਆ। ਸਟੇਜ ਦੇ ਸਾਹਮਣੇ ਮੌਜ਼ੂਦ ਦਰਸ਼ਕਾਂ ਦੀ ਭੀੜ ਕਾਰਨ ਕੁਝ ਨੌਜਵਾਨ ਆਪਣੇ ਸਾਥੀਆਂ ਦੇ ਮੋਢਿਆਂ ’ਤੇ ਚੜ੍ਹ ਕੇ ਆਪਣੇ ਮੋਬਾਇਲਾਂ ’ਚ ਮੇਲੇ ਦੇ ਦ੍ਰਿਸ਼ਾਂ ਨੂੰ ਰਿਕਾਰਡ ਕਰਦੇ ਅਤੇ ‘ਸੈਲਫ਼ੀਆਂ’ ਲੈਂਦੇ ਵੀ ਨਜ਼ਰੀ ਆਏ। ਉਨ੍ਹਾਂ ਤੋਂ ਇਲਾਵਾ ਵੱਡੀ ਗਿਣਤੀ ’ਚ ਪੁੱਜੀਆਂ ਪੰਜਾਬੀ ਮੁਟਿਆਰਾਂ ਅਤੇ ਕੁਝ ਗੋਰੇ ਵੀ ਮਲਕੀਤ ਸਿੰਘ ਦੇ ਵੱਖ-ਵੱਖ ਗੀਤਾਂ ਦੀ ਤਾਲ ’ਤੇ ਬਾਹਾਂ ਉਲਾਰ ਕੇ ਝੂਮਦੇ ਵੇਖੇ ਗਏ। ਮੇਲੇ ’ਚ ਲਗਾਈਆਂ ਹੋਰਨਾਂ ਸਟੇਜ਼ਾਂ ਤੋਂ ਵੱਖ-ਵੱਖ ਦੇਸ਼ਾਂ ਨਾਲ ਸਬੰਧਿਤ ਕਲਾਕਾਰਾਂ ਦੀਆਂ ਪੇਸ਼ਕਾਰੀਆਂ ਵੀ ਵੇਖਣਯੋਗ ਸਨ। ਪਾਰਕ ਦੇ ਵੱਖ-ਵੱਖ ਹਿੱਸਿਆਂ ’ਚ ਖਾਣ-ਪੀਣ ਦੇ ਸਮਾਨ ਤੋਂ ਇਲਾਵਾ ਕਈ ਤਰ੍ਹਾਂ ਦੇ ਘਰੇਲੂ ਅਤੇ ਸਜਾਵਟੀ ਸਮਾਨ ਨੂੰ ਖਰੀਦਣ ਦੇ ਚਾਹਵਾਨਾਂ ਗ੍ਰਾਹਕਾਂ ਦੀਆਂ ਲੰਬੀਆਂ ਕਤਾਰਾਂ ਲੱਗੀਆਂ ਨਜ਼ਰੀ ਆਈਆਂ। ਮੇਲੇ ’ਚ ਬੱਚਿਆਂ ਦੇ ਮਨੋਰੰਜਨ ਲਈ ਲਗਾਏ ਗਏ ਕਈ ਤਰ੍ਹਾਂ ਦੇ ਪੂੰਘੜੇ ਅਤੇ ਹੋਰਨਾਂ ਸਾਧਨਾਂ ਰਾਹੀਂ ਬਹੁਗਿਣਤੀ ਬੱਚੇ ‘ਮਸਤੀ ’ਚ ਰੁੱਝੇ ਨਜ਼ਰੀ ਪਏ।

ਇਸਤੋਂ ਪਹਿਲਾਂ ਮੰਚ ਉਪਰ ਸਰੀ ਦੀ ਮੇਅਰ ਬਰੈਂਡਾ ਲੌਕ ਨੇ ਮੇਲੇ ਵਿਚ ਪੁੱਜੇ ਲੋਕਾਂ ਦਾ ਧੰਨਵਾਦ ਕੀਤਾ ਤੇ ਸਰੀ ਫਿਊਜ਼ਨ ਮੇਲੇ ਵਿਚ ਕੈਨੇਡਾ ਦੇ ਬਹੁਸਭਿਆਚਾਰ ਨੂੰ ਮਾਨਣ ਅਤੇ ਆਪਸੀ ਪਿਆਰ ਤੇ ਸਾਂਝ ਨੂੰ ਵਧਾਉਣ ਦਾ ਸੱਦਾ ਦਿੱਤਾ। ਇਸ ਮੌਕੇ ਉਹਨਾਂ ਨਾਲ ਕੌਂਸਲਰ ਹੈਰੀ ਬੈਂਸ ਤੇ ਕੌਂਸਲਰ ਪ੍ਰਦੀਪ ਕੂਨਰ ਵੀ ਹਾਜ਼ਰ ਸਨ।