ਤਾਜ਼ਾ ਸਰਵੇਖਣ ਵਿਚ ਐਨ ਡੀ ਪੀ ਦੀ ਲੋਕਪ੍ਰਿਯਤਾ 47 ਪ੍ਰਤੀਸ਼ਤ ਤੇ ਕੰਸਰਵੇਟਿਵ ਦੀ 42 ਪ੍ਰਤੀਸ਼ਤ ਦਾ ਦਾਅਵਾ-
( ਦੇ ਪ੍ਰ ਬਿ)-ਬੀਤੀ ਰਾਤ ਬ੍ਰਿਟਿਸ਼ ਕੋਲੰਬੀਆ ਚੋਣਾਂ ਲਈ ਚੋਣ ਮੈਦਾਨ ਵਿਚ ਕੁੱਦੀਆਂ ਪਾਰਟੀਆਂ ਦੇ ਆਗੂਆਂ ਵਲੋਂ ਟੀਵੀ ਉਪਰ ਬਹਿਸ ਦੌਰਾਨ ਇਕ ਦੂਸਰੇ ਉਪਰ ਤਿੱਖੇ ਹਮਲੇ ਕੀਤੇ ਗਏ। ਬੀ ਸੀ ਐਨ ਡੀ ਪੀ ਆਗੂ ਡੇਵਿਡ ਈਬੀ ਤੇ ਬੀ ਸੀ ਕੰਸਰਵੇਟਿਵ ਆਗੂ ਜੌਹਨ ਰਸਟੈਡ ਵਿਚਾਲੇ ਡਰੱਗ ਨੀਤੀ, ਸਿਹਤ ਸਹੂਲਤਾਂ, ਰਿਹਾਇਸ਼ੀ ਸੰਕਟ ਅਤੇ ਮਹਿੰਗਾਈ ਦੇ ਮੁੱਦੇ ਉਪਰ ਤਿੱਖੀਆਂ ਝੜਪਾਂ ਹੋਈਆਂ। ਦੋਵਾਂ ਆਗੂਆਂ ਨੇ ਇਕ ਦੂਸਰੇ ਨੂੰ ਹਰਾਉਣ ਲਈ ਪੂਰਾ ਜ਼ੋਰ ਲਗਾਇਆ ਤੇ ਇਕ ਦੂਸਰੇ ਉਪਰ ਦੂਸ਼ਣਬਾਜ਼ੀ ਵੀ ਕੀਤੀ। ਗਰੀਨ ਪਾਰਟੀ ਆਗੂ ਸੋਨੀਆ ਫੁਰਸਟੀਨੋ ਨੇ ਆਪਣੀ ਪਾਰਟੀ ਨੂੰ ਸਭ ਤੋਂ ਬੇਹਤਰ ਦਸਦਿਆਂ ਬਹਿਸ ਨੂੰ ਸੰਤੁਲਿਤ ਕਰਨ ਦਾ ਯਤਨ ਕੀਤਾ।
ਬਹਿਸ ਦੌਰਾਨ ਡੇਵਿਡ ਏ ਬੀ ਨੇ ਜੌਹਨ ਰਸਟੈਡ ‘ਤੇ ਇੱਕ ਕੋਵਿਡ ਵੈਕਸੀਨੇਸ਼ਨ ਵਿਰੋਧੀ ਹੋਣ ਦਾ ਦੋਸ਼ ਲਗਾਇਆ ਜਦੋਂਕਿ ਰਸਟੈਡ ਨੇ ਕਿਹਾ ਕਿ ਉਹ ਟੀਕਾ ਵਿਰੋਧੀ ਨਹੀ ਬਲਕਿ ਹੁਕਮ ਥੋਪੇ ਜਾਣ ਦਾ ਵਿਰੋਧੀ ਹੈ। ਜੌਹਨ ਰਸਟੈਡ ਨੇ ਐਨ ਡੀ ਪੀ ਸਰਕਾਰ ਦੀ ਡਰੱਗ ਨੀਤੀ ਨੂੰ ਭੰਡਦਿਆਂ ਕਿਹਾ ਕਿ ਇਸ ਗਲਤ ਨੀਤੀ ਕਾਰਣ ਹਜ਼ਾਰਾਂ ਲੋਕ ਮੌਤ ਦੇ ਮੂੰਹ ਜਾ ਪਏ ਹਨ। ਗਲੀਆਂ ਵਿਚ ਨਸ਼ਾ ਵਿਕ ਰਿਹਾ ਹੈ ਤੇ ਸਰਕਾਰ ਡਰੱਗ ਵਪਾਰੀ ਵਾਲਾ ਵਿਵਹਾਰ ਕਰ ਰਹੀ ਹੈ। ਜਦੋਂਕਿ ਡੇਵਿਡ ਈਬੀ ਨੇ ਜੌਹਨ ਰਸਟੈਡ ਨੂੰ ਪਿਛਾਕੜੀ ਸੋਚ ਦਾ ਕਰਾਰ ਦਿੰਦਿਆਂ ਕੋਵਿਡ ਵੈਕਸੀਨੇਸ਼ਨ ਬਾਰੇ ਦਿੱਤੇ ਬਿਆਨਾਂ ਲਈ ਸਪੱਸ਼ਟ ਕਰਨ ਲਈ ਕਿਹਾ। ਗਰੀਨ ਪਾਰਟੀ ਆਗੂ ਸੋਨੀਆ ਨੇ ਵੀ ਜੌਹਨ ਰਸਟੈਡ ਦੇ ਵਿਚਾਰਾਂ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਉਸਦਾ ਨਜ਼ਰੀਆ ਪਿਛਾਂਹਖਿੱਚੂ ਹੈ।
ਬਜ਼ੁਰਗਾਂ ਦੇ ਜੀਵਨ ਦੀ ਗੁਣਵੱਤਾ ਨੂੰ ਯਕੀਨੀ ਬਣਾਉਣ ਬਾਰੇ ਡੇਵਿਡ ਈਬੀ ਨੇ ਬੀ.ਸੀ. ਲਿਬਰਲ ਦੇ ਰਿਕਾਰਡ ਦੀ ਆਲੋਚਨਾ ਕੀਤੀ ਜਿਸ ਵਿਚ ਕਦੇ ਜੌਹਨ ਰਸਟੈਡ ਨੇ ਮੰਤਰੀ ਵਜੋਂ ਕੰਮ ਕੀਤਾ ਸੀ। ਡੇਵਿਡ ਈਬੀ ਨੇ ਕਿਹਾ ਕਿ ਉਹ ਅਜੇ ਵੀ ਵੈਕਸੀਨ ਵਿਰੋਧੀ ਹੈ। ਉਹ ਬੀ ਸੀ ਦੇ ਪਬਲਿਕ ਹੈਲਥ ਅਫਸਰ ਬੋਨੀ ਹੈਨਰੀ ਨੂੰ ਬਰਖਾਸਤ ਕਰਨਾ ਚਾਹੁੰਦਾ ਹੈ ਜਦੋਂਕਿ ਐਨ ਡੀ ਪੀ ਅਜਿਹੇ ਨਹੀ ਕਰੇਗੀ ਬਲਕਿ ਹੋਰ ਡਾਕਟਰਾਂ ਨੂੰ ਸਿਹਤ ਸਿਸਟਮ ਵਿਚ ਲਿਆਵੇਗੀ। ਰਸਟੈਡ ਨੇ ਡੇਵਿਡ ਈਬੀ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਉਸਨੇ ਕੋਵਿਡ ਦਾ ਤੀਸਰਾ ਟੀਕਾ ਲਗਵਾਇਆ ਹੈ। ਉਹ ਟੀਕਾ ਵਿਰੋਧੀ ਨਹੀ ਬਲਕਿ ਹੁਕਮ ਵਿਰੋਧੀ ਹੈ। ਉਸਦਾ ਮੰਨਣਾ ਹੈ ਕਿ ਲੋਕਾਂ ਲਈ ਵਿਕਲਪ ਹੋਣਾ ਚਾਹੀਦਾ ਹੈ।
ਗਰੀਨ ਪਾਰਟੀ ਆਗੂ ਸੋਨੀਆ ਨੇ ਡੇਵਿਡ ਈਬੀ ਨੂੰ ਪਾਖੰਡੀ ਦੱਸਿਆ ਜੋ ਡਾ ਹੈਨਰੀ ਦੀ ਸਲਾਹ ਨਹੀ ਮੰਨਦਾ ਤੇ ਨਸ਼ਿਆਂ ਅਤੇ ਮਾਨਸਿਕ ਸਿਹਤ ਸਮੱਸਿਆਵਾਂ ਨਾਲ ਨਜਿੱਠਣ ਵਾਲੇ ਲੋਕਾਂ ਲਈ ਸੁਰੱਖਿਅਤ ਸਪਲਾਈ ਬਾਰੇ ਉਸਦੀ ਸਲਾਹ ਨੂੰ ਨਜ਼ਰਅੰਦਾਜ਼ ਕੀਤਾ ਗਿਆ ਹੈ।
ਬਹਿਸ ਦੇ ਪਹਿਲੇ ਘੰਟੇ ਦੌਰਾਨ ਪਾਰਟੀ ਆਗੂਆਂ ਨੇ ਹੋਰ ਮੁੱਦਿਆਂ ਵਿੱਚ ਰਿਹਾਇਸ਼ ਅਤੇ ਸਿਹਤ ਦੇਖਭਾਲ ਬਾਰੇ ਚਰਚਾ ਕੀਤੀ।
ਈਬੀ ਨੇ ਕਿਹਾ ਕਿ ਕਈ ਕੋਣਾਂ ਤੋਂ ਸਮੱਸਿਆ ਨਾਲ ਨਜਿੱਠਣ ਦਾ ਵਾਅਦਾ ਕਰਨ ਵਿੱਚ ਬੀ.ਸੀ. ਦੇ ਰਿਹਾਇਸ਼ੀ ਸੰਕਟ ਦਾ ਕੋਈ ਇੱਕ ਹੱਲ ਨਹੀਂ ਹੈ। ਰਸਟੈਡ ਨੇ “ਨਿੱਜੀ ਖੇਤਰ ਦੀ ਸੰਭਾਵਨਾ” ਨੂੰ ਜਾਰੀ ਰੱਖਣ ਵਿਚ ਬਹੁਤ ਸਖਤ ਨਿਯਮਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਅਤੇ ਈਬੀ ਸਰਕਾਰ ਨੂੰ ਹਾਊਸਿੰਗ ਸੰਕਟ ਲਈ ਦੋਸ਼ੀ ਠਹਿਰਾਇਆ। ਸੋਨੀਆ ਨੇ ਰਸਟੈਡ ਦੀ ਯੋਜਨਾ ਦੀ ਆਲੋਚਨਾ ਕਰਦੇ ਹੋਏ ਹਾਊਸਿੰਗ ਵਿੱਚ ਵੱਡੇ ਨਿਵੇਸ਼ਕਾਂ ਦੇ ਪ੍ਰਭਾਵ ‘ਤੇ ਅਫਸੋਸ ਜਤਾਇਆ, ਜਦਕਿ ਈਬੀ ‘ਤੇ ਨਿਵੇਸ਼ਕਾਂ ਦੇ ਵਿਰੁੱਧ ਕਿਰਾਏ ਦੇ ਮਕਾਨਾਂ ਦੀ ਸੁਰੱਖਿਆ ਲਈ ਕਾਫ਼ੀ ਕੁਝ ਨਾ ਕਰਨ ਦੀ ਗੱਲ ਕੀਤੀ।
ਰਸਟੈਡ ਨੇ ਦਾਅਵਿਆਂ ਦਾ ਖੰਡਨ ਕੀਤਾ ਕਿ ਉਸਦੀ ਪਾਰਟੀ ਸਿਹਤ ਸੰਭਾਲ ਖਰਚਿਆਂ ਵਿੱਚ ਕਟੌਤੀ ਕਰੇਗੀ। ਉਸਨੇ ਕਿਹਾ ਕਿ ਇਹ ਸਿਹਤ ਦੇਖ-ਰੇਖ ਵਿੱਚ ਸੁਧਾਰ ਕਰਨ ਵਿੱਚ ਵਾਧੂ ਨਿਵੇਸ਼ ਕਰੇਗੀ।
ਈਬੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਨੇ ਪਿਛਲੇ ਸਾਲ 250,000 ਲੋਕਾਂ ਨੂੰ ਫੈਮਲੀ ਡਾਕਟਰ ਦੀ ਸਹੂਲਤ ਨਾਲ ਜੋੜਿਆ ਸੀ ਅਤੇ ਅਗਲੇ ਛੇ ਮਹੀਨਿਆਂ ਵਿੱਚ 160,000 ਹੋਰ ਲੋਕਾਂ ਨੂੰ ਫੈਮਲੀ ਡਾਕਟਰ ਦੀ ਸਹੂਲਤ ਦਿੱਤੀ ਜਾਵੇਗੀ।
ਇਸ ਦੌਰਾਨ ਸੋਨੀਆ ਨੇ ਬੀ.ਸੀ. ਦੇ ਅਧੀਨ ਸਿਹਤ ਸੰਭਾਲ ਪ੍ਰਣਾਲੀ ਵਿੱਚ ਨੌਕਰਸ਼ਾਹੀ ਦੇ ਵਾਧੇ ‘ਤੇ ਸਵਾਲ ਉਠਾਏ।
ਈਬੀ ਨੇ ਆਪਣੀ ਪਾਰਟੀ ਵਲੋਂ 90 ਪ੍ਰਤੀਸ਼ਤ ਪਰਿਵਾਰਾਂ ਲਈ $1,000 ਦੀ ਟੈਕਸ ਕਟੌਤੀ ਦਾ ਵਾਅਦਾ ਕੀਤਾ। ਰਸਟੈਡ ਨੇ ਕਿਹਾ ਕਿ ਹਰ ਤਿੰਨਾਂ ਵਿੱਚੋਂ ਇੱਕ ਵਿਅਕਤੀ ਬ੍ਰਿਟਿਸ਼ ਕੋਲੰਬੀਆ ਨੂੰ ਛੱਡਣ ਬਾਰੇ ਸੋਚ ਰਿਹਾ ਹੈ। ਉਸਨੇ ਆਪਣੀ ਪਾਰਟੀ ਦੇ ਕਾਰਬਨ ਟੈਕਸ ਨੂੰ ਖਤਮ ਕਰਨ ਅਤੇ 2029 ਤੱਕ ਮੌਰਗੇਜ ਅਤੇ ਕਿਰਾਏ ਦੇ ਭੁਗਤਾਨਾਂ ਲਈ $3,000 ਤੱਕ ਸੂਬਾਈ ਆਮਦਨ ਟੈਕਸ ਦੀ ਕਟੌਤੀ ਕਰਨ ਦਾ ਵਾਅਦਾ ਕੀਤਾ ।
ਰੁਸਟੈਡ ਨੇ ਸਵਾਲ ਕੀਤਾ ਕਿ ਕੀ ਐਨਡੀਪੀ ਸਰਕਾਰਾਂ ਦੇ ਪਿਛਲੇ ਸੱਤ ਸਾਲਾਂ ਦੌਰਾਨ ਕੀ ਸੁਧਾਰ ਹੋਇਆ ਹੈ? ਉਸਨੇ ਐਨ ਡੀ ਪੀ ਸਰਕਾਰ ਦੀ ਡਰੱਗ ਨੀਤੀ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਉਸਨੇ ਵੈਨਕੂਵਰ ਦੀਆਂ ਗਲੀਆਂ ਵਿਚ ਕਈ ਵਿਅਕਤੀਆਂ ਨੂੰ ਓਵਰਡੋਜ਼ ਨਾਲ ਮਰਦੇ ਹੋਏ ਦੇਖਿਆ ਹੈ ।
ਵੱਖ -ਵੱਖ ਮੁੱਦਿਆਂ ਉਪਰ ਇਕ ਦੂਸਰੇ ਨੂੰ ਘੇਰਨ ਤੇ ਜਵਾਬਦੇਹੀ ਦੇ ਨਾਲ ਪਾਰਟੀ ਆਗੂਆਂ ਨੇ ਇਕ ਦੂਸਰੇ ਤੇ ਤਿੱਖੇ ਹਮਲੇ ਕੀਤੇ। ਡੇਵਿਡ ਈਬੀ ਤੇ ਜੌਹਨ ਰਸਟੈਡ ਨੇ ਇਕ ਦੂਸਰੇ ਨੂੰ ਬੀ ਸੀ ਦੀ ਅਗਵਾਈ ਕਰਨ ਦੇ ਆਯੋਗ ਹੋਣ ਦੇ ਦੋਸ਼ ਲਗਾਏ।
ਇਸ ਬਹਿਸ ਦੌਰਾਨ ਕੌਣ ਜਿੱਤਿਆ, ਕੌਣ ਹਾਰਿਆ ਬਾਰੇ ਵੱਖ ਵੱਖ ਸਿਆਸੀ ਵਿਸਲੇਸ਼ਕਾਂ ਦੇ ਵਿਚਾਰ ਹਨ। ਇਕ ਮਾਹਿਰ ਦਾ ਕਹਿਣਾ ਹੈ ਕਿ ਡੇਵਿਡ ਈਬੀ ਵਧੀਆ ਰਿਹਾ ਤੇ ਇਕ ਮਾਹਿਰ ਨੇ ਕਿਹਾ ਕਿ ਰਸਟੈਡ ਵੀ ਹਾਰਿਆ ਨਹੀਂ। ਉੱਜ ਇਕ ਚੋਣ ਸਰਵੇਖਣ ਨੇ ਬਹਿਸ ਉਪਰੰਤ ਐਨ ਡੀ ਪੀ ਦੀ ਲੋਕਪ੍ਰਿਯਤਾ 47 ਪ੍ਰਤੀਸ਼ਤ ਤੇ ਕੰਸਰਵੇਟਿਵ ਦੀ ਲੋਕਪ੍ਰਿਯਤਾ 42 ਪ੍ਰਤੀਸ਼ਤ ਦੱਸੀ ਹੈ। ਬਹਿਸ ਦੌਰਾਨ ਦੋਵਾਂ ਮੁੱਖ ਪਾਰਟੀਆਂ ਦੇ ਆਗੂਆਂ ਦੀ ਕਾਰਗੁਜ਼ਾਰੀ ਦੇ ਨਾਲ ਗਰੀਨ ਪਾਰਟੀ ਦੀ ਆਗੂ ਸੋਨੀਆ ਦੀ ਕਾਰਗੁਜ਼ਾਰੀ ਨੂੰ ਬੇਹਤਰ ਦੱਸਿਆ ਗਿਆ।
