ਸਾਬਕਾ ਮੇਅਰ ਸਟੀਫਨ ਮੈਂਡੇਲ ਅਲਬਰਟਾ ਆਫ ਐਕਸੀਲੈਂਸ ਐਵਾਰਡ ਨਾਲ ਸਨਮਾਨਿਤ

ਐਡਮਿੰਟਨ (ਗੁਰਪ੍ਰੀਤ ਸਿੰਘ)-ਬੀਤੇ ਦਿਨੀਂ ਐਡਮਿੰਟਨ ਦੇ ਸਾਬਕਾ ਮੇਅਰ ਸਟੀਫਨ ਮੈਂਡੇਲ  ਨੂੰ ਅਲਬਰਟਾ ਆਰਡਰ ਆਫ਼ ਐਕਸੀਲੈਂਸ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ । ਅਲਬਰਟਾ ਆਰਡਰ ਆਫ ਐਕਸੀਲੈਂਸ ਐਵਾਰਡ ਅਲਬਰਟਾ ਸਰਕਾਰ ਦਾ ਸਭ ਤੋਂ ਉੱਚਾ ਸਨਮਾਨ ਹੈ ਜੋ ਅਲਬਰਟਾ ਦੇ ਵਸਨੀਕ ਨੂੰ ਸ਼ਾਨਦਾਰ ਸੇਵਾਵਾਂ ਲਈ ਦਿੱਤਾ ਜਾਂਦਾ ਹੈ।
ਸਾਬਕਾ ਮੇਅਰ ਸਟੀਫਨ ਮੈਂਡੇਲ ਨੇ ਐਡਮਿੰਟਨ ਦੇ ਮੇਅਰ ਵਜੋਂ ਐਲ ਆਰ ਟੀ ਦੇ ਵਿਸਥਾਰ ਤੋਂ ਲੈ ਕੇ ਰੋਜਰ ਪਲੇਸ ਤੱਕ, ਸ਼ਹਿਰ ਦੇ ਆਲੇ-ਦੁਆਲੇ ਦੇ ਬਹੁਤ ਸਾਰੇ ਬੁਨਿਆਦੀ ਢਾਂਚੇ ਦੇ ਪ੍ਰੋਜੈਕਟਾਂ ਲਈ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ। ਇਸ ਮੌਕੇ ਮੇਅਰ ਅਮਰਜੀਤ ਸੋਹੀ ਨੇ ਸਾਬਕਾ ਮੇਅਰ ਨੂੰ ਅਲਬਰਟਾ ਆਰਡਰ ਆਫ ਐਕਸੀਲੈਂਸ ਐਵਾਰਡ ਮਿਲਣ ਤੇ ਉਹਨਾਂ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਉਹਨਾਂ ਨੂੰ 2007-2013 ਤੱਕ ਸਿਟੀ ਕੌਂਸਲ ਦੇ ਤੌਰ ਤੇ ਮੇਅਰ ਨਾਲ ਮਿਲ ਕੇ ਕੰਮ ਕਰਨ ਦਾ ਮੌਕਾ ਮਿਲਿਆ ਤੇ ਸਾਨੂੰ ਉਹਨਾਂ ਦੀਆਂ ਪ੍ਰਾਪਤੀਆਂ ਉਪਰ ਮਾਣ ਹੈ।