ਸਰੀ ( ਦੇ ਪ੍ਰ ਬਿ)-ਕੈਬਨਿਟ ਮੰਤਰੀ ਅਤੇ ਕੈਨੇਡਾ ਦੀ ਪੈਸੀਫਿਕ ਇਕਨਾਮਿਕ ਡਿਵੈਲਪਮੈਂਟ ਏਜੰਸੀ (ਪੈਸੀਫਿਕੈਨ) ਲਈ ਮੰਤਰੀ ਸ ਹਰਜੀਤ ਸਿੰਘ ਸੱਜਣ ਨੇ ਬੀਤੇ ਦਿਨ ਸਰੀ-ਅਧਾਰਿਤ ਤਿੰਨ ਕਾਰੋਬਾਰਾਂ ਦੇ ਵਿਸਥਾਰ ਅਤੇ ਵਿਸ਼ਵ ਪੱਧਰ ‘ਤੇ ਮੁਕਾਬਲਾ ਕਰਨ ਵਿੱਚ ਮਦਦ ਕਰਨ ਲਈ 9.4 ਮਿਲੀਅਨ ਡਾਲਰ ਦੀ ਫੰਡਿੰਗ ਦੇਣ ਦਾ ਐਲਾਨ ਕੀਤਾ ਹੈ।
ਮੰਤਰੀ ਸੱਜਣ ਨੇ ਇਹ ਐਲਾਨ ਸਰੀ ਸਥਿਤ ਨਾਨਕ ਫੂਡਜ ਦਾ ਦੌਰਾ ਕਰਨ ਸਮੇਂ ਕੀਤਾ। ਇਸ ਮੌਕੇ ਉਹਨਾਂ ਨਾਲ ਲਿਬਰਲ ਐਮ ਪੀ ਸੁੱਖ ਧਾਲੀਵਾਲ ਅਤੇ ਰਣਦੀਪ ਸਿੰਘ ਸਰਾਏ ਵੀ ਹਾਜ਼ਰ ਸਨ।
ਨਾਨਕ ਫੂਡਜ ਪੈਸੀਫੀਕੈਨ ਦੇ ਬਿਜ਼ਨਸ ਸਕੇਲ-ਅੱਪ ਅਤੇ ਉਤਪਾਦਕਤਾ ਪ੍ਰੋਗਰਾਮ ਰਾਹੀਂ 5 ਮਿਲੀਅਨ ਡਾਲਰ ਦਾ ਫੰਡ ਪ੍ਰਾਪਤ ਕਰਨ ਵਾਲੀ ਉੱਤਰੀ ਅਮਰੀਕਾ ਦੀ ਇਕ ਵੱਡੀ ਅਤੇ ਵਿਸ਼ੇਸ਼ ਡੇਅਰੀ-ਅਧਾਰਿਤ ਉਤਪਾਦ ਬਣਾਉਣ ਵਾਲੀ ਕੰਪਨੀ ਹੈ। ਫੈਡਰਲ ਸਰਕਾਰ ਵਲੋਂ ਇਹ ਨਿਵੇਸ਼ ਕੰਪਨੀ ਨੂੰ ਨਵੇਂ ਉਪਕਰਨਾਂ ਨਾਲ ਆਪਣੇ ਕਾਰੋਬਾਰ ਦਾ ਵਿਸਤਾਰ ਕਰਕੇ ਪਨੀਰ ਪਨੀਰ ਦਾ ਉਤਪਾਦਨ ਵਧਾਉਣ ਦੇ ਨਾਲ ਨੌਕਰੀਆਂ ਵਿਚ ਵੀ ਵਾਧਾ ਕਰੇਗਾ।
ਇਸ ਮੌਕੇ ਮੰਤਰੀ ਨੇ ਸਰੀ-ਅਧਾਰਿਤ ਦੋ ਹੋਰ ਕਾਰੋਬਾਰਾਂ ਲਈ ਵੀ ਫੰਡ ਦੇਣ ਦਾ ਐਲਾਨ ਕੀਤਾ ਜਿਹਨਾਂ ਵਿਚ ਡਾ ਮਾਂ ਲੈਬੋਰਟਰੀ ਨੂੰ $3.1 ਮਿਲੀਅਨ ਅਤੇ ਐਲ ਈ ਡੀ ਸਮਾਰਟ ਨੂੰ 1.2 ਮਿਲੀਅਨ ਡਾਲਰ ਦੀ ਫੰਡਿੰਗ ਸ਼ਾਮਿਲ ਹਨ।
ਇਸ ਮੌਕੇ ਨਾਨਕ ਫੂਡਜ ਦੇ ਮੁਖੀ ਗੁਰਪ੍ਰੀਤ ਅਰਨੇਜਾ ਨੇ ਮੰਤਰੀ ਵਲੋਂ ਕੀਤੇ ਗਏ ਐਲਾਨ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਇਹ ਫੰਡਿੰਗ ਨਾ ਸਿਰਫ਼ ਸਾਡੇ ਵਿਕਾਸ ਵਿੱਚ ਇੱਕ ਨਿਵੇਸ਼ ਹੈ ਸਗੋਂ ਨੌਕਰੀਆਂ ਪੈਦਾ ਕਰਨ, ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਅਤੇ ਸਾਡੇ ਭਾਈਚਾਰੇ ਨੂੰ ਮਜ਼ਬੂਤ ਕਰਨ ਲਈ ਸਾਂਝੀ ਵਚਨਬੱਧਤਾ ਦਾ ਪ੍ਰਮਾਣ ਵੀ ਹੈ।
