ਟਰੂਡੋ ਵਲੋਂ ਦੋ ਮਹੀਨੇ ਲਈ ਸੇਲਜ਼ ਟੈਕਸ (ਜੀ ਐਸ ਟੀ) ਤੋਂ ਛੋਟ

ਕੈਨੇਡੀਅਨਾਂ ਦੀ ਸਹਾਇਤਾ ਲਈ 250 ਡਾਲਰ ਦੇ ਚੈਕ ਵੀ ਮਿਲਣਗੇ-

ਓਟਵਾ ( ਦੇ ਪ੍ਰ ਬਿ)- ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ 14 ਦਸੰਬਰ ਤੋਂ ਦੋ ਮਹੀਨੇ ਲਈ  ਕ੍ਰਿਸਮਸ ਟਰੀ, ਬੱਚਿਆਂ ਦੇ ਖਿਡੌਣੇ ਅਤੇ ਰੈਸਟੋਰੈਂਟ ਦੇ ਖਾਣੇ ਅਤੇ ਕੁਝ ਗਰੌਸਰੀ ਆਈਟਮਜ਼ ਉਪਰ ਸੇਲਜ ਟੈਕਸ ਦੀ ਛੋਟ ਦਾ ਐਲਾਨ ਕਰਦਿਆਂ ਕਿਹਾ ਕਿ  ਅਗਲੇ ਸਾਲ ਬਹੁਤ ਸਾਰੇ ਕੈਨੇਡੀਅਨਾਂ ਨੂੰ 250 ਡਾਲਰ ਦੇ ਚੈੱਕ ਡਾਕ ਰਾਹੀਂ ਭੇਜੇ ਜਾਣਗੇ।
ਪ੍ਰਧਾਨ ਮੰਤਰੀ ਟਰੂਡੋ ਨੇ ਕਿਹਾ ਕਿ ਇਹ ਉਹ ਚੀਜ਼ਾਂ ਹਨ ਜੋ ਲੋਕਾਂ ਦੀ ਨਿੱਤ ਵਰਤੋਂ ਵਿਚ ਆਉਂਦੀਆਂ ਹਨ ਤੇ, ਅਤੇ ਅਸੀਂ ਲੋਕਾਂ ਦੀ ਮਦਦ ਲਈ ਖੜੇ ਹਾਂ।
ਵੀਰਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਉਹਨਾਂ ਨੇ ਇਹ ਵੀ ਕਿਹਾ ਕਿ ਜਿਨ੍ਹਾਂ ਸੂਬਿਆਂ ਵਿੱਚ ਪ੍ਰੋਵਿੰਸ਼ੀਅਲ ਅਤੇ ਫੈਡਰਲ ਸੇਲਜ਼ ਟੈਕਸ ਦਾ ਤਾਲਮੇਲ ਹੈ, ਉਨ੍ਹਾਂ ਹੀ ਵਸਤਾਂ ‘ਤੇ ਸਾਰਾ ਵਿਕਰੀ ਟੈਕਸ ਹਟਾ ਦਿੱਤਾ ਜਾਵੇਗਾ।ਉਹਨਾਂ ਹੋਰ  ਕਿਹਾ ਕਿ ਸਰਕਾਰ ਉਨ੍ਹਾਂ ਸਾਰੇ ਕੈਨੇਡੀਅਨਾਂ ਨੂੰ $250 ਦੇ ਚੈੱਕ ਭੇਜੇਗੀ ਜਿਨ੍ਹਾਂ ਨੇ 2023 ਵਿੱਚ ਕੰਮ ਕੀਤਾ ਅਤੇ $150,000 ਤੱਕ ਦੀ ਕਮਾਈ ਕੀਤੀ ਹੈ।
ਇਸੇ ਦੌਰਾਨ ਐਨਡੀਪੀ ਨੇ ਕਿਹਾ ਹੈ ਕਿ ਉਹ ਲਿਬਰਲਾਂ ਦੁਆਰਾ ਐਲਾਨੀਆਂ ਬਹੁ-ਬਿਲੀਅਨ ਕਿਫਾਇਤੀ ਨੀਤੀਆਂ ਦਾ ਸਮਰਥਨ ਕਰਦੇ ਹਨ।
ਸਰਕਾਰ ਦੇ ਦਸਤਾਵੇਜ਼ਾਂ ਅਨੁਸਾਰ, ਅੰਦਾਜ਼ਨ 18.7 ਮਿਲੀਅਨ ਕੈਨੇਡੀਅਨਾਂ ਨੂੰ $250 ਦੀ ਛੋਟ ਮਿਲੇਗੀ। ਕੁੱਲ ਮਿਲਾ ਕੇ ਇਸ ‘ਤੇ ਲਗਭਗ 4.7 ਬਿਲੀਅਨ ਡਾਲਰ ਦੀ ਲਾਗਤ ਆਵੇਗੀ।
ਜਿਹੜੇ ਲੋਕ ਯੋਗਤਾ ਪੂਰੀ ਕਰਦੇ ਹਨ, ਉਹਨਾਂ ਨੇ $150,000 ਤੱਕ ਦੀ ਸ਼ੁੱਧ ਵਿਅਕਤੀਗਤ ਆਮਦਨੀ ਹਾਸਲ ਕੀਤੀ ਹੋਣੀ ਚਾਹੀਦੀ ਹੈ। ਯੋਗ ਹੋਣ ਲਈ ਕੈਨੇਡੀਅਨਾਂ ਨੇ 2024 ਦੇ ਅੰਤ ਤੱਕ ਆਪਣੇ 2023 ਟੈਕਸ ਭਰੇ ਹੋਣੇ ਚਾਹੀਦੇ ਹਨ।
GST ਬਰੇਕ 15 ਫਰਵਰੀ ਤੱਕ ਲਾਗੂ ਰਹੇਗੀ। ਵਿੱਤ ਵਿਭਾਗ ਦੁਆਰਾ ਸਾਂਝੇ ਕੀਤੇ ਗਏ ਪਿਛੋਕੜ ਦਸਤਾਵੇਜ਼ਾਂ ਦੇ ਅਨੁਸਾਰ, ਇਸ ਨਾਲ ਸੰਘੀ ਖਜ਼ਾਨੇ ਨੂੰ $1.6-ਬਿਲੀਅਨ ਦਾ ਖਰਚਾ ਝੱਲਣਾ ਪਵੇਗਾ।
ਉਹ ਵਸਤੂਆਂ ਜਿਨ੍ਹਾਂ ਨੂੰ ਜੀਐਸਟੀ ਤੋਂ ਛੋਟ ਦਿੱਤੀ ਜਾਵੇਗੀ:
• ਬੱਚਿਆਂ ਦੇ ਕੱਪੜੇ, ਜੁੱਤੀਆਂ, ਡਾਇਪਰ, ਅਤੇ ਕਾਰ ਦੀਆਂ ਸੀਟਾਂ
• ਪਜਲਜ਼ ਅਤੇ ਵੀਡੀਓ ਗੇਮਾਂ ਸਮੇਤ 14 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਤਿਆਰ ਕੀਤੇ ਗਏ ਖਿਡੌਣੇ ।
• ਅਖਬਾਰਾਂ ਅਤੇ  ਕਿਤਾਬਾਂ
• ਕੁਦਰਤੀ ਅਤੇ ਨਕਲੀ ਕ੍ਰਿਸਮਸ ਟ੍ਰੀ
• ਚਿਪਸ, ਕੈਂਡੀਜ਼, ਬੇਕਡ ਸਮਾਨ, ਸਾਰੇ ਤਿਆਰ ਭੋਜਨ, ਕੇਟਰਡ ਭੋਜਨ ਸਮੇਤ ਖਾਣ ਦੀਆਂ ਚੀਜ਼ਾਂ
• ਪੀਣ ਵਾਲੇ ਪਦਾਰਥ, ਜਿਸ ਵਿੱਚ ਪੌਪ, ਬੋਤਲਬੰਦ ਪਾਣੀ, ਬੀਅਰ ਅਤੇ ਵਾਈਨ, ਅਤੇ 7 ਪ੍ਰਤੀਸ਼ਤ ਤੱਕ ਅਲਕੋਹਲ ਸਮੱਗਰੀ ਵਾਲੇ ਕੂਲਰ ਸ਼ਾਮਲ ਹਨ।

ਇਸੇ ਦੌਰਾਨ ਕੰਸਰਵੇਟਿਵ ਆਗੂ ਪੀਅਰ ਪੋਲੀਵਰ ਨੇ ਇਸ ਨੂੰ ਇੱਕ “ਟੈਕਸ ਚਾਲ” ਕਹਿੰਦੇ ਹੋਏ ਕਿ ਟਰੂਡੋ ਅਤੇ ਐਨ ਡੀ ਪੀ ਲੀਡਰ ਆਪਣੀ ਨੌਕਰੀਆਂ ਬਣਾਈ ਰੱਖਣ ਲਈ ਇਹ ਅਸਥਾਈ ਟੈਕਸ ਬਰੇਕ ਅਤੇ $250 ਦੇ ਚੈਕ ਸਿਆਸੀ ਚਾਲ ਖੇਡਦਿਆਂ ਲੋਕਾਂ ਨੂੰ ਦੇ ਰਹੇ ਹਨ।