ਓਟਵਾ ( ਦੇ ਪ੍ਰ ਬਿ)- ਕੈਲਗਰੀ ਤੋਂ ਕੰਸਰਵੇਟਿਵ ਐਮ ਪੀ ਜਸਰਾਜ ਸਿੰਘ ਹੱਲਣ ਨੇ ਟਰੂਡੋ ਸਰਕਾਰ ਵਲੋਂ ਐਨ ਡੀ ਪੀ ਸਹਾਇਤਾ ਨਾਲ ਕੈਨੇਡੀਅਨਾਂ ਨੂੰ ਦਿੱਤੀ ਜਾ ਰਹੀ ਦੋ ਮਹੀਨੇ ਦੀ ਟੈਕਸ ਰਾਹਤ ਨੂੰ ਰਾਜਸੀ ਖੇਡ ਦੱਸਦਿਆਂ ਸਦਨ ਵਿਚ ਸਪੀਕਰ ਨੂੰ ਸੰਬੋਧਨ ਹੁੰਦਿਆਂ ਕਿਹਾ ਕਿ ਲਿਬਰਲ-ਐਨ ਡੀ ਪੀ ਵਲੋਂ ਲੋਕਾਂ ਦੀਆਂ ਵੋਟਾਂ ਖਰੀਦਣ ਲਈ ਇਹ ਇਕ ਟੈਕਸ ਚਾਲ ਤੋਂ ਵੱਧ ਕੁਝ ਨਹੀ।
ਉਹਨਾਂ ਹੋਰ ਕਿਹਾ ਕਿ ਅੱਜ ਜੋ ਮੁਲਕ ਦੇ ਹਾਲਾਤ ਹਨ, ਲੋਕ ਪੁੱਛਦੇ ਹਨ, “ਕੈਨੇਡਾ ਨੂੰ ਕੀ ਹੋ ਗਿਆ ਹੈ ? ਕੈਨੇਡਾ ਕਿਹੋ ਜਿਹੀ ਥਾਂ ਬਣ ਗਿਆ ਹੈ ? ਕੈਨੇਡਾ ਇੰਨਾ ਕਮਜ਼ੋਰ ਕਿਵੇਂ ਹੋ ਗਿਆ ਹੈ ? ਕੈਨੇਡਾ ਨੂੰ ਇੰਨੀਆਂ ਕਮਜ਼ੋਰ ਸਰਹੱਦਾਂ, ਇੰਨੀ ਕਮਜ਼ੋਰ ਆਰਥਿਕਤਾ ਅਤੇ ਇੰਨੀ ਕਮਜ਼ੋਰ ਸੁਰੱਖਿਆ ਕਿਵੇਂ ਮਿਲੀ? ਇਹਨਾਂ ਸਭ ਸਵਾਲਾਂ ਦਾ ਜਵਾਬ ਇਕ ਹੀ ਹੈ। ਉਹ ਇਹ ਹੈ ਕਿ ਸਾਡੇ ਕੋਲ ਇੱਕ ਕਮਜ਼ੋਰ, ਅਯੋਗ ਤੇ ਸੁਆਰਥੀ ਪ੍ਰਧਾਨ ਮੰਤਰੀ ਹੈ।ਮੈਂ ਇਕ ਇਮੀਗ੍ਰਾਂਟ ਫੈਮਲੀ ਚੋ ਹਾਂ। ਇਸ ਦੇਸ਼ ਵਿਚ ਪਲਿਆ ਤੇ ਵੱਡਾ ਹੋਇਆ ਹਾਂ। ਮੈਨੂੰ ਯਾਦ ਹੈ ਕਿ ਸਾਡੇ ਕੋਲ ਬਹੁਤ ਕੁਝ ਨਹੀਂ ਸੀ। ਮੈਂ ਜਾਣਦਾ ਹਾਂ ਕਿ ਅੱਜ ਬਹੁਤ ਸਾਰੇ ਲੋਕ ਇਸ ਕਹਾਣੀ ਨਾਲ ਸਬੰਧਤ ਹੋ ਸਕਦੇ ਹਨ, ਪਰ ਨਤੀਜੇ ਬਹੁਤ ਵੱਖਰੇ ਹਨ। ਅਸੀਂ ਬੇਸਮੈਂਟ ਵਿੱਚ ਰਹਿੰਦੇ ਸੀ। ਮੇਰੇ ਪਿਤਾ ਇਕ ਟੈਕਸੀ ਡਰਾਈਵਰ ਸਨ ਅਤੇ ਮੇਰੀ ਮਾਂ ਵਲੋਂ ਪਰਿਵਾਰ ਦੀ ਸਹਾਇਤਾ ਲਈ ਵੱਖੋ-ਵੱਖਰੀਆਂ ਨੌਕਰੀਆਂ ਕੀਤੀਆਂ। ਅਸੀ ਸਾਰੇ ਪਰਿਵਾਰ ਨੇ ਮਿਹਨਤ ਕੀਤੀ ਤੇ ਮਿਹਨਤ ਨੂੰ ਫਲ ਮਿਲਿਆ। ਪਰ ਸਾਡੇ ਸਾਹਮਣੇ ਇਕ ਵੱਡਾ ਫਰਕ ਹੈ। ਫਰਕ ਇਹ ਹੈ ਕਿ ਲਿਬਰਲ-ਐਨਡੀਪੀ ਸਰਕਾਰ ਦੇ ਨੌਂ ਸਾਲਾਂ ਬਾਅਦ, ਕੈਨੇਡਾ ਜਿਸ ਬਾਰੇ ਅਸੀਂ ਸਾਰੇ ਜਾਣਦੇ ਸੀ, ਹੁਣ ਉਹ ਕੈਨੇਡਾ ਨਹੀ ਰਿਹਾ। ਕੈਨੇਡੀਅਨ ਸੁਪਨੇ ਲਈ ਮੇਰੇ ਅਤੇ ਹੋਰ ਬਹੁਤ ਸਾਰੇ ਪ੍ਰਵਾਸੀ ਪਰਿਵਾਰ ਇੱਥੇ ਆਏ ਸਨ। ਜੋ ਇੱਥੇ ਜੰਮੇ ਪਲੇ ਅਤੇ ਵੱਡੇ ਹੋਏ ਸਨ, ਉਹ ਜਾਣਦੇ ਸਨ, ਜਿੱਥੇ ਲੋਕ ਸਖ਼ਤ ਮਿਹਨਤ ਕਰ ਸਕਦੇ ਹਨ, ਇੱਕ ਸਨਮਾਨਯੋਗ ਉਜਰਤ ਕਮਾ ਸਕਦੇ ਹਨ, ਨਸ਼ਿਆਂ ਤੋਂ ਸੁਰੱਖਿਅਤ ਸਮਾਜ ਵਿੱਚ ਰਹਿ ਸਕਦੇ ਹਨ, ਖਾਸ ਕਰਕੇ ਸਰਕਾਰ ਦੁਆਰਾ ਫੰਡ ਪ੍ਰਾਪਤ ਨਸ਼ੇ, ਅਤੇ ਇਕ ਸੁਰੱਖਿਅਤ ਮਾਹੌਲ ਸੀ। ਪਰ ਅੱਜ ਅਸੀਂ ਕੈਨੇਡਾ ਭਰ ਵਿਚ ਹਿੰਸਾ ਤੇ ਅਰਾਜਕਤਾ ਵੇਖ ਰਹੇ ਹਾਂ। ਇਕ ਕਮਜ਼ੋਰ ਤੇ ਅਯੋਗ ਪ੍ਰਧਾਨ ਮੰਤਰੀ ਨੇ ਇਸ ਦੇਸ਼ ਨੂੰ ਅੱਜ ਜਿਸ ਸਥਿਤੀ ਵਿੱਚ ਪਹੁੰਚਾ ਦਿੱਤਾ ਹੈ ਸਿਰਫ ਨੌਂ ਸਾਲਾਂ ਵਿਚ, ਇਸਦੀ ਕਿਸੇ ਨੇ ਕਲਪਨਾ ਨਹੀ ਸੀ ਕੀਤੀ ਕਿ ਅਜਿਹੇ ਹਾਲਾਤ ਵੀ ਬਣਨਗੇ। ਸੋਚਿਆ ਨਹੀ ਸੀ ਕਿ ਅਸੀਂ ਇੱਕ ਅਜਿਹੇ ਦੇਸ਼ ਵਿੱਚ ਰਹਿ ਰਹੇ ਹੋਵਾਂਗੇ ਜਿੱਥੇ ਇੱਕ ਮਹੀਨੇ ਵਿੱਚ 20 ਲੱਖ ਤੋਂ ਵੱਧ ਲੋਕ ਫੂਡ ਬੈਂਕ ਵਿੱਚ ਜਾਂਦੇ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਤਿਹਾਈ ਬੱਚੇ ਹੁੰਦੇ ਹਨ। ਇਸ ਦੇਸ਼ ਵਿੱਚ ਚਾਰ ਵਿੱਚੋਂ ਇੱਕ ਵਿਅਕਤੀ ਖਾਣਾ ਛੱਡ ਰਿਹਾ ਹੈ ਅਤੇ ਮਾਪੇ ਅਜਿਹਾ ਕਰ ਰਹੇ ਹਨ ਤਾਂ ਜੋ ਉਨ੍ਹਾਂ ਕੋਲ ਆਪਣੇ ਬੱਚਿਆਂ ਨੂੰ ਦੇਣ ਲਈ ਕਾਫ਼ੀ ਭੋਜਨ ਹੋਵੇ।
ਸਾਡੇ ਚੋਂ ਬਹੁਤ ਸਾਰੇ ਲੋਕਾਂ ਨੂੰ ਯਾਦ ਹੋਵੇਗਾ ਜਦੋਂ ਅਸੀਂ ਗਰੌਸਰੀ ਸਟੋਰ ਤੇ ਜਾ ਕੇ 200 ਡਾਲਰ ਵਿੱਚ ਪੂਰੇ ਹਫ਼ਤੇ ਦਾ ਰਾਸ਼ਨ ਲੈ ਆਉਂਦੇ ਸੀ ? ਪਰ ਹੁਣ 200 ਡਾਲਰ ਵਿਚ ਸਾਨੂੰ ਕੀ ਮਿਲਦਾ ਹੈ? ਸਿਰਫ ਇਕ ਥੈਲਾ ਰਾਸ਼ਨ ਦਾ , ਸ਼ਾਇਦ ਹੋਰ ਥੋੜਾ। ਇਸ ਅਤਿ ਦੀ ਮਹਿੰਗਾਈ ਕਰਕੇ ਇਸ ਦੇਸ਼ ਵਿੱਚ ਲੋਕ ਬਹੁਤ ਬੁਰੀ ਤਰ੍ਹਾਂ ਦੁਖੀ ਹਨ। ਲਿਬਰਲ-ਐਨਡੀਪੀ ਸਰਕਾਰ ਦੀ ਨੌਂ ਸਾਲਾਂ ਦੀ ਅਯੋਗਤਾ ਨੇ ਇਹ ਸਭ ਕੀਤਾ ਹੈ।
ਕੀ ਕਦੇ ਕਿਸੇ ਨੇ ਦੇਸ਼ ਵਿੱਚ ਇੰਨੇ ਬੇਘਰੇ ਲੋਕ ਦੇਖੇ ਹਨ? ਪ੍ਰਧਾਨ ਮੰਤਰੀ ਹਾਊਸਿੰਗ ਦੀ ਸ਼ੇਖੀ ਮਾਰਦੇ ਹਨ, ਜਿਸ ‘ਤੇ ਉਨ੍ਹਾਂ ਨੇ ਲਗਭਗ 90 ਬਿਲੀਅਨ ਡਾਲਰ ਖਰਚ ਕੀਤੇ ਹਨ। ਸਿਰਫ ਇੱਕ ਚੀਜ਼ ਜੋ ਅਸਲ ਵਿੱਚ ਵਧੀ ਹੈ ਉਹ ਹੈ ਬੇਘਰੇ ਡੇਰੇ ਜੋ ਦੇਸ਼ ਭਰ ਵਿੱਚ ਫੈਲ ਗਏ ਹਨ। ਲਿਬਰਲ ਸ਼ੇਖ਼ੀ ਮਾਰਦੇ ਹਨ ਕਿ ਕਿਸੇ ਨੇ ਵੀ ਰਿਹਾਇਸ਼ ਵਿੱਚ ਇੰਨਾ ਨਿਵੇਸ਼ ਨਹੀਂ ਕੀਤਾ ਜਿੰਨਾ ਸਰਕਾਰ ਨੇ ਕੀਤਾ ਹੈ, ਪਰ ਇਸ ਨਾਲ ਕੈਨੇਡੀਅਨਾਂ ਨੂੰ ਕੀ ਮਿਲਿਆ? ਇਹ ਉਨ੍ਹਾਂ ਨੂੰ ਮਿਲਿਆ
ਵਧੇਰੇ ਬੇਘਰ ਹੋਣਾ, ਵਧੇਰੇ ਫੂਡ ਬੈਂਕ ਦੀ ਵਰਤੋਂ ਅਤੇ ਵਧੇਰੇ ਦਰਦ ਅਤੇ ਦੁੱਖ।
ਸਰਕਾਰ ਦੇ ਦਾਅਵੇ ਮੁਤਾਬਿਕ ਅਸੀਂ ਪਹਿਲਾਂ ਹੀ ਜਾਣਦੇ ਹਾਂ ਕਿ ਇਸ ਨੇ ਕਿੰਨਾ ਨਿਵੇਸ਼ ਕੀਤਾ ਹੈ। ਸਾਨੂੰ ਸਿਰਫ਼ ਇੱਕ ਅਮਰੀਕੀ ਕਰਮਚਾਰੀ ਅਤੇ ਇੱਕ ਕੈਨੇਡੀਅਨ ਕਾਮੇ ਵਿਚਕਾਰ ਤਨਖਾਹ ਦੇ ਪਾੜੇ ਨੂੰ ਦੇਖਣਾ ਹੈ, ਅਤੇ ਇਹ ਪਾੜਾ ਵਧਦਾ ਜਾ ਰਿਹਾ ਹੈ। ਅਸਲ ਵਿੱਚ ਅਮਰੀਕੀ ਕਾਮੇ ਕੈਨੇਡੀਅਨ ਕਾਮਿਆਂ ਨਾਲੋਂ $32,000 ਵਧ ਕਮਾਉਂਦੇ ਹਨ। ਜੇਕਰ ਇਸ ਅਯੋਗ ਸਰਕਾਰ ਨੇ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੀਆਂ ਨੀਤੀਆਂ ਨਾਲ ਇਕਸੁਰਤਾ ਬਣਾਈ ਰੱਖੀ ਹੁੰਦੀ, ਤਾਂ ਇਹ ਪਾੜਾ ਇੰਨਾ ਵਧੇਰੇ ਨਾ ਹੁੰਦਾ ਅਤੇ ਕੈਨੇਡੀਅਨ ਕਾਮੇ ਹਰ ਸਾਲ ਘੱਟੋ ਘੱਟ $4,300 ਵਧੇਰੇ ਕਮਾ ਰਹੇ ਹੁੰਦੇ।
ਅਸੀਂ ਦੇਖਦੇ ਹਾਂ ਕਿ ਕੈਨੇਡੀਅਨ ਘਰੇਲੂ ਕਰਜ਼ਾ ਸਾਰੇ ਜੀ -7 ਦੇਸ਼ਾਂ ਵਿੱਚੋਂ ਸਭ ਤੋਂ ਵਧ ਹੈ, ਪਰ ਸਾਨੂੰ ਇਹ ਦੇਖਣਾ ਹੋਵੇਗਾ ਕਿ ਕਿਉਂ। ਔਸਤ ਤਨਖਾਹ ਦੇ ਨਾਲ, ਕੈਨੇਡੀਅਨ ਸਿਰਫ ਰਿਹਾਇਸ਼ ਉਪਰ ਲਗਭਗ 40% ਖਰਚ ਕਰਦੇ ਸਨ , ਪਰ ਸਰਕਾਰ ਦੁਆਰਾ ਮਕਾਨਾਂ ਦੇ ਖਰਚੇ ਦੁੱਗਣੇ ਕਰਨ ਤੋਂ ਬਾਅਦ ਅਤੇ ਰਾਸ਼ਟਰੀ ਕਰਜ਼ਾ ਨੀਤੀ ਦੀ ਬਦੌਲਤ ਇੱਕ ਵਰਕਰ ਦੇ 40% ਦੀ ਬਜਾਏ ਹੁਣ ਇਹ ਕੁਝ ਮਾਮਲਿਆਂ ਵਿੱਚ 60% ਤੋਂ 80% ਸਿਰਫ ਰਿਹਾਇਸ਼ ਉਪਰ ਅਦਾ ਕਰ ਰਿਹਾ ਹੈ। ਅਮਰੀਕਾ ਵਿੱਚ ਕੈਨੇਡਾ ਨਾਲੋਂ ਗਰੌਸਰੀ ਦੀ ਦੁਕਾਨ ‘ਤੇ ਕੀਮਤਾਂ 37% ਘੱਟ ਹਨ। ਇਹ ਸਭ ਸਿੱਧੇ ਤੌਰ ‘ਤੇ ਕਾਰਬਨ ਟੈਕਸ ਘੁਟਾਲੇ ਕਾਰਨ ਹੈ। ਉਹਨਾਂ ਵਿਸਥਾਰ ਵਿਚ ਚਰਚਾ ਕਰਦਿਆਂ ਕਿਹਾ ਕਿ ਇਹਨਾਂ ਸਾਰੀਆਂ ਸਮੱਸਿਆਵਾਂ ਦਾ ਹੱਲ ਇਹੀ ਹੈ ਕਿ ਇਸ ਆਯੋਗ ਸਰਕਾਰ ਨੂੰ ਚਲਦਾ ਕੀਤਾ ਜਾਵੇ ਤੇ ਇਕ ਯੋਗ ਆਗੂ ਦੇ ਹੱਥ ਮੁਲਕ ਦੀ ਅਗਵਾਈ ਸੌਂਪੀ ਜਾਵੇ।
