ਪ੍ਰਧਾਨ ਮੰਤਰੀ ਟਰੂਡੋ ਵਲੋਂ ਟਰੰਪ ਟੈਰਿਫ ਦੇ ਜਵਾਬ ਵਿਚ ਅਮਰੀਕੀ ਵਸਤਾਂ ਤੇ ਵੀ 25 ਪ੍ਰਤੀਸ਼ਤ ਕਰ ਲਗਾਉਣ ਦਾ ਐਲਾਨ-
ਅਮਰੀਕੀ ਵਸਤਾਂ ਦਾ ਬਾਈਕਾਟ ਕਰਨ ਤੇ ਕੇਵਲ ਕੈਨੇਡੀਅਨ ਵਸਤਾਂ ਖਰੀਦਣ ਦੀ ਅਪੀਲ-
ਓਟਵਾ ( ਦੇ ਪ੍ਰ ਬਿ)- ਜਿਵੇਂ ਕਿ ਉਮੀਦ ਕੀਤੀ ਜਾ ਰਹੀ ਸੀ ਅਮਰੀਕੀ ਰਾਸ਼ਟਰਪਤੀ ਟਰੰਪ ਵਲੋਂ ਬੀਤੇ ਦਿਨ ਕੈਨੇਡੀਅਨ ਵਸਤਾਂ ਉਪਰ 25 ਪ੍ਰਤੀਸ਼ਤ ਅਤੇ ਕੈਨੇਡੀਅਨ ਊਰਜਾ ਉਤਪਾਦਾਂ ਉਪਰ 10 ਪ੍ਰਤੀਸ਼ਤ ਟੈਰਿਫ ਲਗਾਉਣ ਦੇ ਆਪਣੇ ਹੁਕਮਾਂ ਨੂੁੰ ਜਾਰੀ ਕਰ ਦਿੱਤਾ। ਟਰੰਪ ਦੇ ਇਸ ਗੂਸੈਲ ਵਿਵਹਾਰ ਉਪਰ ਕੈਨੇਡਾ ਨੇ ਵੀ ਤਿੱਖਾ ਪ੍ਰਤੀਕਰਮ ਕਰਦਿਆਂ ਇਟ ਦਾ ਜਵਾਬ ਪੱਥਰ ਨਾਲ ਦੇਣ ਦਾ ਐਲਾਨ ਕੀਤਾ ਹੈ।
ਇਕ ਰਿਪੋਰਟ ਮੁਤਾਬਿਕ ਟਰੰਪ ਵੱਲੋਂ ਕੈਨੇਡਾ ਤੋਂ ਲੱਗਭਗ ਸਾਰੀਆਂ ਵਸਤਾਂ ‘ਤੇ 25 ਪ੍ਰਤੀਸ਼ਤ, ਮੈਕਸੀਕਨ ਸਮਾਨ ‘ਤੇ 25 ਪ੍ਰਤੀਸ਼ਥ ਅਤੇ ਚੀਨੀ ਉਤਪਾਦਾਂ ‘ਤੇ 10 ਫੀਸਦੀ ਟੈਰਿਫ ਲਗਾਏ ਜਾਣ ਦੇ ਹੁਕਮ ਮੰਗਲਵਾਰ ਤੋਂ ਲਾਗੂ ਹੋਣ ਦੀ ਉਮੀਦ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸ਼ਨੀਵਾਰ ਦੇਰ ਰਾਤ ਐਲਾਨ ਕੀਤਾ ਕਿ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੁਆਰਾ ਇਸ ਹਫਤੇ ਦੇ ਅੰਤ ਵਿੱਚ ਸਾਰੇ ਕੈਨੇਡੀਅਨ ਸਮਾਨ ‘ਤੇ ਦੰਡਕਾਰੀ ਟੈਰਿਫ ਦੇ ਨਾਲ ਵਪਾਰ ਯੁੱਧ ਸ਼ੁਰੂ ਕਰਨ ਤੋਂ ਬਾਅਦ ਸੰਘੀ ਸਰਕਾਰ ਅਮਰੀਕਾ ਦੇ ਵਿਰੁੱਧ ਜਵਾਬੀ ਕਾਰਵਾਈ ਕਰੇਗੀ। ਟਰੂਡੋ ਨੇ ਮੀਡੀਆ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਕੈਨੇਡਾ ਅਜਿਹੇ ਦੇਸ਼ ਦੇ ਹਮਲੇ ਦਾ ਸਹਿਣ ਨਹੀਂ ਕਰੇਗਾ, ਜਿਸ ਨੂੰ ਸਹਿਯੋਗੀ ਅਤੇ ਦੋਸਤ ਮੰਨਿਆ ਜਾਂਦਾ ਹੈ।
ਟਰੰਪ ਵਲੋ ਕੈਨੇਡੀਅਨ ਵਸਤਾਂ ਉਪਰ ਭਾਰੀ ਭਰਕਮ ਟੈਕਸ ਲਗਾਉਣ ਦੇ ਹੁਕਮਾਂ ਉਪਰੰਤ ਪ੍ਰਧਾਨ ਮੰਤਰੀ ਟਰੂਡੋ ਨੇ ਕਿਹਾ ਹੈ ਕਿ ਕੈਨੇਡੀਅਨ ਅਰਥਚਾਰੇ ਨੂੰ ਤਬਾਹ ਕਰਨ ਦੀ ਟਰੰਪ ਦੀ ਕੋਸ਼ਿਸ਼ ਦੇ ਬਦਲੇ ਵਜੋਂ ਅਸੀਂ ਤੁਰੰਤ ਸਾਰੀਆਂ ਅਮਰੀਕੀ ਵਸਤਾਂ ‘ਤੇ ਜਵਾਬੀ ਟੈਰਿਫ ਲਗਾਵਾਂਗੇ।
ਉਹਨਾਂ ਕਿਹਾ ਹੈ ਕਿ ਕੈਨੇਡਾ ਮੰਗਲਵਾਰ ਤੱਕ ਕੈਨੇਡਾ ਆਉਣ ਵਾਲੇ 30 ਬਿਲੀਅਨ ਡਾਲਰ ਦੇ ਅਮਰੀਕੀ ਸਮਾਨ ‘ਤੇ 25 ਫੀਸਦੀ ਟੈਰਿਫ ਲਗਾਏਗਾ। ਫਿਰ ਤਿੰਨ ਹਫ਼ਤਿਆਂ ਦੇ ਸਮੇਂ ਵਿੱਚ 125 ਬਿਲੀਅਨ ਡਾਲਰ ਦੇ ਅਮਰੀਕੀ ਆਯਾਤ ‘ਤੇ ਟੈਰਿਫ ਲਾਗੂ ਕੀਤੇ ਜਾਣਗੇ।
ਟਰੰਪ ਟੈਰਿਫ ਖਿਲਾਫ ਪ੍ਰਧਾਨ ਮੰਤਰੀ ਟਰੂਡੋ ਨੇ ਕਿਹਾ ਕਿ ਅਸੀਂ ਆਪਣੇ ਮੁਲਕ ਅਤੇ ਕੈਨੇਡੀਅਨਾਂ ਦੇ ਹਿੱਤਾਂ ਲਈ ਪਿੱਛੇ ਨਹੀ ਹਟਾਂਗੇ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅਮਰੀਕੀ ਸ਼ਰਾਬ ਜਿਵੇਂ ਕਿ ਬੀਅਰ, ਵਾਈਨ ਅਤੇ ਸਪਿਰਿਟ, ਸਬਜ਼ੀਆਂ, ਕੱਪੜੇ, ਜੁੱਤੇ ਅਤੇ ਪਰਫਿਊਮ ਕੈਨੇਡੀਅਨ ਜਵਾਬੀ ਟੈਰਿਫ ਦਾ ਸਾਹਮਣਾ ਕਰਨ ਵਾਲੀਆਂ ਪਹਿਲੀਆਂ ਵਸਤੂਆਂ ਵਿੱਚ ਸ਼ਾਮਿਲ ਹੋਣਗੀਆਂ। ਕੈਨੇਡਾ ਅਮਰੀਕੀ ਖਪਤਕਾਰ ਉਤਪਾਦਾਂ ਜਿਵੇਂ ਕਿ ਘਰੇਲੂ ਉਪਕਰਣ, ਫਰਨੀਚਰ ਅਤੇ ਖੇਡਾਂ ਦੇ ਸਾਜ਼ੋ-ਸਾਮਾਨ ‘ਤੇ ਵੀ ਟੈਰਿਫ ਲਗਾਏਗਾ।
ਉਹਨਾਂ ਉਕਤ ਜਵਾਬੀ ਕਾਰਵਾਈ ਦਾ ਐਲਾਨ ਕਰਦਿਆਂ ਕਿਹਾ ਕਿ ਟਰੰਪ ਨੂੰ ਆਪਣਾ ਫੈਸਲਾ ਬਦਲਣ ਲਈ ਮਜ਼ਬੂਰ ਕਰਨ ਅਤੇ ਕੈਨੇਡਾ ਪ੍ਰਤੀ ਦੁਸ਼ਮਣੀ ਖਤਮ ਕਰਨ ਦੀ ਕੋਸ਼ਿਸ਼ ਕਰਨ ਲਈ ਹੋਰ ਗੈਰ-ਟੈਰਿਫ ਵਪਾਰ ਕਾਰਵਾਈਆਂ ਵੀ ਕੀਤੀਆਂ ਜਾਣਗੀਆਂ ।
ਉਹਨਾਂ ਕਾਰਵਾਈਆਂ ਦਾ ਫੈਸਲਾ ਕਰਨਾ ਅਜੇ ਬਾਕੀ ਹੈ ਪਰ ਇਸ ਵਿੱਚ ਅਮਰੀਕਾ ਨੂੰ ਨਾਜ਼ੁਕ ਖਣਿਜਾਂ ਅਤੇ ਊਰਜਾ ਉਤਪਾਦਾਂ ਦੇ ਨਿਰਯਾਤ ‘ਤੇ ਪਾਬੰਦੀਆਂ ਅਤੇ ਅਮਰੀਕੀ ਕੰਪਨੀਆਂ ਨੂੰ ਸਰਕਾਰੀ ਠੇਕਿਆਂ ‘ਤੇ ਬੋਲੀ ਲਗਾਉਣ ਤੋਂ ਰੋਕਣ ਦੇ ਕਦਮ ਵਰਗੇ ਉਪਾਅ ਸ਼ਾਮਲ ਹੋ ਸਕਦੇ ਹਨ।
ਟਰੂਡੋ ਨੇ ਕੈਨੇਡੀਅਨ ਲੋਕਾਂ ਨੂੰ ਆਪਣੇ ਝੰਡੇ ਦੇ ਦੁਆਲੇ ਜੁੜਨ ਅਤੇ ਸੰਕਟ ਵਿੱਚ ਘਿਰੇ ਕਾਰੋਬਾਰਾਂ ਦੀ ਸਹਾਇਤਾ ਲਈ ਜਿੱਥੇ ਵੀ ਸੰਭਵ ਹੋਵੇ ਕੈਨੇਡੀਅਨ ਉਤਪਾਦਾਂ ਦੀ ਚੋਣ ਕਰਨ ਦੀ ਅਪੀਲ ਕੀਤੀ ਹੈ। ਉਹਨਾਂ ਕਰਿਆਨੇ ਦੀ ਦੁਕਾਨ ‘ਤੇ ਕੋਈ ਵੀ ਚੀਜ਼ ਖਰੀਦਣ ਤੋਂ ਪਹਿਲਾਂ ਲੇਬਲ ਚੈੱਕ ਕਰਨ ਲਈ ਕਿਹਾ। ਇਹ ਮੌਕਾ ਕੈਨੇਡਾ ਲਈ ਖੜ੍ਹੇ ਹੋਣ ਦਾ ਹੈ। ਸਾਨੂੰ ਇਹ ਸਾਬਿਤ ਕਰਨਾ ਹੋਵੇਗਾ ਕਿ ਅਸੀਂ ਇਸ ਮੁਲਕ ਨੂੰ ਪਿਆਰ ਕਰਦੇ ਹਾਂ।
ਜ਼ਿਕਰਯੋਗ ਹੈ ਕਿ ਟਰੰਪ ਨੇ ਧਮਕੀ ਦਿੱਤੀ ਹੈ ਕਿ ਜੇ ਕੈਨੇਡਾ ਜਵਾਬੀ ਕਾਰਵਾਈ ਕਰਦਾ ਹੈ ਤਾਂ ਟੈਰਿਫ ਹੋਰ ਵੀ ਵਧਾਏਗਾ। ਇਸਦੇ ਜਵਾਬ ਵਿਚ ਟਰੂਡੋ ਨੇ ਕਿਹਾ ਕਿ ਉਹ ਧਮਕੀਆਂ ਅੱਗੇ ਝੁਕਣਗੇ ਨਹੀਂ। ਅਸੀਂ ਦੁਸ਼ਮਣੀ ਨਹੀ ਵਧਾਉਣਾ ਚਾਹੁੰਦੇ ਪਰ ਅਸੀਂ ਕੈਨੇਡਾ, ਕੈਨੇਡੀਅਨ ਅਤੇ ਕੈਨੇਡੀਅਨ ਨੌਕਰੀਆਂ ਲਈ ਖੜ੍ਹੇ ਹੋਵਾਂਗੇ। ਇਹ ਸਾਡਾ ਕੰਮ ਹੈ ਅਤੇ ਇਹੀ ਅਸੀਂ ਕਰ ਰਹੇ ਹਾਂ।
