ਸਰੀ, ਬੀ.ਸੀ. (ਦਲਜੋਤ ਸਿੰਘ) – 26 ਮਾਰਚ 2025 – ਸੋਸਾਇਟੀ ਆਫ ਪੰਜਾਬੀ ਇੰਜੀਨੀਅਰਜ਼ ਐਂਡ ਟੈਕਨੋਲੋਜਿਸਟਸ ਆਫ ਬ੍ਰਿਟਿਸ਼ ਕੋਲੰਬੀਆ (SPEATBC) ਨੇਂ ਆਪਣੀ 31ਵੀਂ ਸਲਾਨਾ ਆਮ ਬੈਠਕ (AGM) 9 ਮਾਰਚ 2025 ਨੂੰ ਸਰੀ ਸਿਟੀ ਸੈਂਟਰ ਲਾਇਬ੍ਰੇਰੀ ਵਿੱਚ ਕੀਤੀ। ਬੈਠਕ ਵਿੱਚ ਪਿਛਲੇ ਪ੍ਰਧਾਨ, ਸਪਾਂਸਰਜ਼, ਅਤੇ ਇੰਜੀਨੀਅਰਿੰਗ ਅਤੇ ਟੈਕਨੋਲੋਜੀ ਪੇਸ਼ੇ ਦੇ ਲੋਕ ਸ਼ਾਮਲ ਹੋਏ। AGM ਦੀ ਅਗਵਾਈ ਪਿਛਲੇ ਪ੍ਰਧਾਨ ਰਮਨੀਕ ਸਿੰਘ ਕੁਮਾਰ ਵਲੋਂ ਕੀਤੀ ਗਈ, ਜਿਸ ਵਿੱਚ ਉਨ੍ਹਾਂ ਨੇ ਸਾਲ ਦੀ ਕਾਰਗੁਜ਼ਾਰੀ ਪੇਸ਼ ਕੀਤੀ ਅਤੇ ਖ਼ਾਸ ਪ੍ਰਾਪਤੀਆਂ ਉਤੇ ਚਾਨਣਾ ਪਾਇਆ। ਉਨ੍ਹਾਂ ਨੇ “ਸਰੀ ਨਗਰ ਕੀਰਤਨ, ਮਿਕਸ ਐਂਡ ਮਿੰਗਲ ਨੈੱਟਵਰਕਿੰਗ ਇਵੈਂਟਸ, SPEATTalks, ਉਦਯੋਗਕ ਸੈਮੀਨਾਰ, ਅਤੇ ਸਕਾਲਰਸ਼ਿਪ ਪ੍ਰੋਗਰਾਮ ਵਿੱਚ ਵਾਧੇ” ਵਰਗੀਆਂ ਸਫਲਤਾਵਾਂ ਦਾ ਜ਼ਿਕਰ ਕੀਤਾ। ਖਜ਼ਾਨਚੀ ਨੇ ਵੀ ਪਿਛਲੇ ਸਾਲ ਦੀ ਵਿੱਤੀ ਰਿਪੋਰਟ ਪੇਸ਼ ਕੀਤੀ।
ਇਸ ਬੈਠਕ ਵਿੱਚ ਇੱਕ ਮਹੱਤਵਪੂਰਨ ਨਿਰਣਾ ਲਿਆ ਗਿਆ, ਜਿਸ ਤਹਿਤ ਸਪੀਟ ਬੀ ਸੀ ਦੇ ਸੰਵਿਧਾਨ ਦੀ ਸਮੀਖਿਆ ਅਤੇ ਉਸ ਵਿੱਚ ਆਧੁਨਿਕਤਾ ਲਿਆਉਣ ਲਈ ਇੱਕ ਵਿਸ਼ੇਸ਼ ਕਮੇਟੀ ਬਣਾਈ ਜਾਵੇਗੀ, ਤਾਂ ਜੋ ਇਹ ਸੰਸਥਾ ਦੇ ਨਵੇਂ ਟੀਚਿਆਂ ਦੇ ਨਾਲ ਤਾਲਮੇਲ ਬਣਾ ਸਕੇ। ਇਸ ਬੈਠਕ ਦੇ ਨਾਲ ਹੀ ਪਿਛਲੀ ਕਾਰਜਕਾਰੀ ਟੀਮ ਦਾ ਕਾਰਜਕਾਲ ਸਮਾਪਤ ਹੋਇਆ ਅਤੇ ਨਵੀਂ ਲੀਡਰਸ਼ਿਪ ਟੀਮ ਦੀ ਚੋਣ ਕੀਤੀ ਗਈ ਜਿਸ ਦੀ ਨੁਮਾਇੰਦਗੀ ਨਵੇਂ ਪ੍ਰਧਾਨ ਦਲਜੋਤ ਸਿੰਘ ਕਰਨਗੇ।
ਹੋਰ ਕਾਰਜਕਾਰੀ ਅਹੁਦੇ ਵੀ ਨਵੇਂ ਐਗਜਿਕਿਉਟਿਵ ਡਾਇਰੈਕਟਰਾਂ ਨੂੰ ਸੌਂਪੇ ਗਏ, ਅਤੇ ਕਈ ਨਵੇਂ ਡਾਇਰੈਕਟਰ-ਐਟ-ਲਾਰਜ ਟੀਮ ਵਿੱਚ ਸ਼ਾਮਲ ਹੋਏ, ਜੋ ਸਪੀਟ ਬੀ ਸੀ ਦੇ “ਪੇਸ਼ੇਵਰ ਵਿਕਾਸ, ਮਾਰਗਦਰਸ਼ਨ, ਅਤੇ ਸਮਾਜਿਕ ਸ਼ਮੂਲੀਅਤ” ਦੇ ਮਿਸ਼ਨ ਲਈ ਨਵੇਂ ਵਿਚਾਰ ਅਤੇ ਵਚਨਬੱਧਤਾ ਲਿਆਉਣਗੇ। ਨਵੀਂ ਟੀਮ ਸੰਸਥਾ ਦੀਆਂ ਪਿਛਲੀਆਂ ਸਫਲਤਾਵਾਂ ਨੂੰ ਅੱਗੇ ਵਧਾਉਣ, ਮੈਂਬਰਸ਼ਿਪ ਪ੍ਰਕਿਰਿਆ ਨੂੰ ਸੁਧਾਰਨ, ਮਾਰਗਦਰਸ਼ਨ ਪ੍ਰੋਗਰਾਮਾਂ ਵਿੱਚ ਵਾਧਾ ਕਰਨ, ਅਤੇ ਸੰਸਥਾ ਦੀ ਉਦਯੋਗਕ ਭਾਗੀਦਾਰੀ ਵਧਾਉਣ ਉਤੇ ਧਿਆਨ ਦੇਵੇਗੀ।
ਸਪੀਟ ਬੀ ਸੀ ਇੰਜੀਨੀਅਰਾਂ, ਟੈਕਨੋਲੋਜਿਸਟਾਂ, ਅਤੇ ਵਿਦਿਆਰਥੀਆਂ ਨੂੰ “ਨੈੱਟਵਰਕਿੰਗ, ਪੇਸ਼ੇਵਰ ਵਿਕਾਸ, ਅਤੇ ਸਮਾਜਿਕ ਯੋਗਦਾਨ” ਰਾਹੀਂ ਬੁਲੰਦ ਕਰਨ ਲਈ ਵਚਨਬੱਧ ਹੈ। ਸੰਸਥਾ ਆਪਣੀ ਪਿਛਲੀ ਕਮੇਟੀ ਦਾ ਧੰਨਵਾਦ ਕਰਦੀ ਹੈ ਅਤੇ ਨਵੀਂ ਕਮੇਟੀ ਦਾ ਸੁਆਗਤ ਕਰਦੀ ਹੈ।
ਹੋਰ ਜਾਣਕਾਰੀ ਲਈ speatbc.org ‘ਤੇ ਜਾਓ ਜਾਂ info@speatbc.org ਤੇ ਸੰਪਰਕ ਕਰੋ।
