ਕੈਲਗਰੀ ( ਦਲਵੀਰ ਜੱਲੋਵਾਲੀਆ)-ਕੈਲਗਰੀ ਵੁਮੈਨ ਕਲਚਰਲ ਐਸੋਸੀਏਸ਼ਨ ਦੀ ਅਪ੍ਰੈਲ ਮਹੀਨੇ ਦੀ ਮੀਟਿੰਗ 20 ਅਪ੍ਰੈਲ ਐਤਵਾਰ ਨੂੰ ਜੈਨੇਸਜ਼ ਸੈਂਟਰ ਵਿੱਚ ਹੋਈ। ਦੇਸ਼ ਗਈਆਂ ਭੈਣਾਂ ਦੇ ਵਾਪਸ ਮੁੜ ਆਉਣ ਤੇ ਮੀਟਿੰਗ ਵਿੱਚ ਹਾਜ਼ਰੀ ਭਰਵੀਂ ਰਹੀ। ਸਭਾ ਦੀ ਇਕੱਤਰਤਾ ਉਪ-ਪ੍ਰਧਾਨ ਗੁਰਦੀਸ਼ ਗਰੇਵਾਲ ਅਤੇ ਸੁਖਵਿੰਦਰ ਕੌਰ ਬਾਠ ਦੀ ਪ੍ਰਧਾਨਗੀ ਵਿੱਚ ਹੋਈ। ਕੋਆਰਡੀਨੇਟਰ ਗੁਰਚਰਨ ਥਿੰਦ ਨੇ ਸਭ ਨੂੰ ਜੀ ਆਇਆਂ ਆਖ ਵਿਸਾਖੀ ਦੇ ਦਿਹਾੜੇ ਖਾਲਸਾ ਪੰਥ ਦੇ ਸਾਜਨਾ ਦਿਵਸ ਦੀਆਂ ਵਧਾਈਆਂ ਦਿੱਤੀਆਂ ਅਤੇ ਇਸ ਦਿਹਾੜੇ ਦੇ ਪਿਛੋਕੜ ਅਤੇ ਅਜੋਕੇ ਸਮੇਂ ਦੀਆਂ ਚੁਨੌਤੀਆਂ ਅਤੇ ਪ੍ਰਸਥਿਤੀਆਂ ਦੀ ਗੱਲ ਕੀਤੀ। ਉਪਰੰਤ ਉਨ੍ਹਾਂ ਸਭਾ ਵਲੋਂ ਗੌਰਮਿੰਟ ਸਪੋਰਟਡ ਪ੍ਰਾਜੈਕਟ ‘ਨਿਊ ਹੌਰਾਈਜ਼ਨਜ਼ ਫਾਰ ਸੀਨੀਅਰਜ਼ ਪਰੋਗਰਾਮ’ ਸ਼ੁਰੂ ਕੀਤੇ ਜਾਣ ਦੀ ਸਾਂਝ ਪਾਈ। ਜਿਸ ਵਿੱਚ ਸੀਨੀਅਰਜ਼ (ਔਰਤਾਂ) ਨੂੰ ਬਜ਼ੁਰਗਾਂ ਨਾਲ ਹੁੰਦੇ ਦੁਰਵਿਹਾਰ ਸਬੰਧੀ ਜਾਗਰੂਕ ਕਰਨ ਅਤੇ ਉਨ੍ਹਾਂ ਨੂੰ ਹਰ ਪੱਖ ਤੋਂ ਸੁਚੇਤ ਤੇ ਸਸ਼ਕਤ ਕਰਨ ਲਈ ਉਲੀਕੇ ਜਾਣ ਵਾਲੇ ਸਭਾ ਦੇ ਸਾਲ ਭਰ ਦੇ ਵਿਧੀਵਤ ਪ੍ਰੋਗਰਾਮਾਂ ਦੀ ਸੰਖੇਪ ਜਾਣਕਾਰੀ ਦਿੱਤੀ।
ਗੁਰਦੀਸ਼ ਗਰੇਵਾਲ ਨੇ ਅਪ੍ਰੈਲ ਮਹੀਨੇ ਵਾਪਰੇ ਜਲਿ੍ਹਆਂ ਵਾਲੇ ਬਾਗੇ ਦੇ ਖੂਨੀ ਸਾਕੇ ਅਤੇ ਇਸੇ ਮਹੀਨੇ ਭਾਰਤ ਦੇ ਸੰਵਿਧਾਨ ਦੇ ਘਾੜੇ ਡਾ: ਬੀ. ਆਰ. ਅੰਬੇਦਕਰ ਦੇ ਜਨਮ ਦਿਵਸ ਬਾਰੇ ਸਾਂਝ ਪਾਈ। ਉਨ੍ਹਾਂ ‘ਚੰਗਾ ਨਹੀਓਂ ਹੁੰਦਾ ਐਵੇਂ ਬਹੁਤਾ ਬੋਲਣਾ, ਦਿਲ ਵਾਲਾ ਭੇਤ ਹਰ ਥਾਂ ਤੇ ਖੋਲ੍ਹਣਾ’ ਰਚਨਾ ਪੇਸ਼ ਕਰਨ ਉਪਰੰਤ ਵਿਸਾਖੀ ਨੂੰ ਸੰਬੋਧਤ ਆਪਣੀ ਕਵਿਤਾ ਸੁਣਾਈ। ਹਰਦੇਵ ਬਰਾੜ, ਸੁਰਿੰਦਰਪਾਲ ਕੈਂਥ, ਬਲਬੀਰ ਕੌਰ ਤੇ ਅਮਰਜੀਤ ਕੌਰ ਟਿਵਾਣਾ ਨੇ ਵਿਸਾਖੀ ਦੇ ਇਤਿਹਾਸਕ ਦਿਹਾੜੇ ਨੂੰ ਗੀਤਾਂ ਤੇ ਕਵਿਤਾਵਾਂ ਨਾਲ ਯਾਦ ਕੀਤਾ। ਮਨਿੰਦਰ ਚਾਨੇ ਨੇ ਆਪਣੀ ਅੱਖਰਕਾਰੀ ਤੇ ਕਲਮਕਾਰੀ ਦੀ ਕਲਾ ਬਾਰੇ ਭੈਣਾਂ ਨਾਲ ਸਾਂਝ ਪਾਈ। ਇਸ ਕਲਾ ਦੀ ਵਰਕਸ਼ਾਪ ਆਉਂਦੇ ਸਮੇਂ ਵਿੱਚ ਪ੍ਰਾਜੈਕਟ ਦਾ ਹਿੱਸਾ ਬਣਾਈ ਜਾਵੇਗੀ।
ਦਲਬੀਰ ਕੌਰ ਨੇ ਬਾਬਾ ਬੁੱਲੇ੍ਹੇ ਸ਼ਾਹ ਦੇ ਬੋਲਾਂ ਨਾਲ ਹਾਜ਼ਰੀ ਲੁਆਈ। ਸਤਵਿੰਦਰ ਕੌਰ ਫਰਵਾਹ, ਸਰਬਜੀਤ ਉੱਪਲ, ਜਤਿੰਦਰ ਪੇਲੀਆ, ਬਲਵਿੰਦਰ ਕੌਰ, ਅਮਰਜੀਤ ਵਿਰਦੀ ਨੇ ਲੋਕ ਗੀਤਾਂ ਤੇ ਹਰਜੀਤ ਜੌਹਲ, ਕੁਲਵੰਤ ਕੌਰ ਨੇ ਬੋਲੀਆਂ ਅਤੇ ਸ਼ਿੰਦਰਪਾਲ ਤੇ ਜਗਦੀਸ਼ ਬਰੀਆ ਨੇ ਟੱਪਿਆਂ ਨਾਲ ਰੌਣਕਾਂ ਲਾਈਆਂ।
ਸਭਾ ਵਿੱਚ ਪਹਿਲੀ ਵਾਰ ਸ਼ਾਮਲ ਹੋਏ ਮੈਂਬਰਾਂ ਨਾਲ ਜਾਣ ਪਛਾਣ ਕਰਵਾਈ ਗਈ। ਲੰਮੇ ਸਮੇਂ ਤੋਂ ਕਨੇਡਾ ਰਹਿ ਰਹੀ ਪਰਮਜੀਤ ਲੇਲ੍ਹ ਨੇ ਕਿਹਾ ਕਿ ਮੇਰੀ ਦੋਹਤੀ ਦਾ ਜਨਮ ਹੋਇਆ ਹੈ ਅਤੇ ਆਪਣਾ ਕਲਚਰ ਉਸ ਤੱਕ ਪੁੱਜਦਾ ਕਰਨ ਲਈ ਮੈਂ ਇਹ ਸੰਸਥਾ ਜਾਇਨ ਕੀਤੀ ਹੈ। ਪੰਜਾਬ ਵਿੱਚ ‘ਔਰਤ ਸ਼ਕਤੀ ਮੰਚ’ ਦੀ ਪ੍ਰਧਾਨ ਭੈਣ ਜੀ ਸੁਰਿੰਦਰ ਕੌਰ ਢੁੱਡੀਕੇ ਨੇ ਆਪਣੇ ਪਤੀ ਦੀ ਸ਼ਹਾਦਤ ਤੋਂ ਬਾਦ ਦੀ ਆਪਣੀ ਜੀਵਨ ਯਾਤਰਾ ਬਿਆਨ ਕਰਦੇ ਕਿਹਾ ਕਿ ਅਸੀਂ ਹਮੇਸ਼ਾਂ ਲੋਕਾਂ ਨਾਲ ਹੁੰਦੇ ਧੱਕੇ ਦੀ ਗੱਲ ਕਰਦੇ ਹਾਂ ਅਤੇ ਉਨ੍ਹਾਂ ਨਾਲ ਖੜ੍ਹਦੇ ਹਾਂ। ਮਨਜੀਤ ਕੌਰ ਹੇਹਰ ਨੇ ਕਨੇਡਾ ਆ ਅੱਠ ਸਾਲ ਹੱਥੀਂ ਕੀਤੀ ਕ੍ਰਿਤ ਨੂੰ ਮਾਣ ਨਾਲ ਸਾਂਝਾ ਕੀਤਾ। ਪਰਵਿੰਦਰ ਕੌਰ ਨੇ ਵੀ ਕਨੇਡਾ ਦੇ ਆਪਣੇ ਖੱਟੇ ਮਿੱਠੇ ਅਨੁਭਵਾਂ ਨੂੰ ਦਰਸਾਇਆ। ਜਸਵਿੰਦਰ ਕੌਰ ਧਨੋਆ ਵੀ ਪਹਿਲੀ ਵਾਰ ਸ਼ਾਮਲ ਹੋਏ, ਉਨ੍ਹਾਂ ਭਾਵੁਕ ਹੁੰਦੇ ਆਪਣੇ ਲੰਮੇ ਸਫ਼ਰ ਨੂੰ ਬਿਆਨਿਆ। ਨੌਜੁਆਨ ਮੈਂਬਰ ਜਸਲੀਨ ਕੌਰ ਤੇ ਮਨਪ੍ਰੀਤ ਕੌਰ ਦੀ ਹਾਜ਼ਰੀ ਸਭਾ ਲਈ ਵੱਡਾ ਹਾਸਲ ਹੈ।
ਮੀਟਿੰਗ ਦੇ ਦੌਰਾਨ ਸੁਰਿੰਦਰਜੀਤ ਵਿਰਦੀ ਤੇ ਉਸ ਦੀਆਂ ਦੋ ਪੋਤੀਆਂ, ਮਹਿੰਦਰ ਕੌਰ ਅਤੇ ਹਰਦੇਵ ਬਰਾੜ ਵਲੋਂ ਲਿਆਂਦਾ ਭੋਜਨ ਬਲਜੀਤ ਜਠੌਲ, ਸੁਰਿੰਦਰ ਚੀਮਾ, ਪਰਵਿੰਦਰ ਕੌਰ ਤੇ ਹਰਪ੍ਰੀਤ ਸੰਧੂ ਹੁਰਾਂ ਵਲੋਂ ਵਰਤਾਇਆ ਗਿਆ ਜਿਸਦਾ ਆਨੰਦ ਗਰਮ ਗਰਮ ਚਾਹ ਨਾਲ ਸਭ ਨੇ ਜੀਅ ਭਰ ਕੇ ਮਾਣਿਆ। ਅੰਤ ਵਿੱਚ ਸਭ ਦਾ ਧੰਨਵਾਦ ਕਰ ਮੀਟਿੰਗ ਦੀ ਸਮਾਪਤੀ ਕਰ ਦਿੱਤੀ ਗਈ।
ਗੁਰਚਰਨ ਕੌਰ ਥਿੰਦ (ਕੋਆਰਡੀਨੇਟਰ)
ਫੋਨ: 403-402-9635
