ਸਰੀ ਸਿਟੀ ਨੇ ਹਸਪਤਾਲ ਦੇ ਵਿਸਤਾਰ ਅਤੇ ਬਿਹਤਰ ਪਹੁੰਚ ਲਈ ਖੋਲ੍ਹਿਆ ਰਾਹ

ਸਰੀ  (ਮਹੇਸ਼ਇੰਦਰ ਸਿੰਘ ਮਾਂਗਟ, ਕਾਹਲੋਂ ) ਸਰੀ ਸ਼ਹਿਰ ਨੇ ਸਿਹਤ ਸੇਵਾਵਾਂ ਦੇ ਭਵਿੱਖ ਨੂੰ ਮਜ਼ਬੂਤ ਕਰਨ ਵੱਲ ਇੱਕ ਮਹੱਤਵਪੂਰਣ ਕਦਮ ਚੁੱਕਦਿਆਂ ਸਰੀ ਮੈਮੋਰਿਅਲ ਹਸਪਤਾਲ ਅਤੇ ਕਲੋਵਰਡੇਲ ਵਿੱਚ ਬਣ ਰਹੇ ਨਵੇਂ ਸਰੀ ਹਸਪਤਾਲ ਅਤੇ ਬੀਸੀ ਕੈਂਸਰ ਸੈਂਟਰ ਦੇ ਸੰਭਾਵੀ ਵਿਸਤਾਰ ਅਤੇ ਪਹੁੰਚ ਸੁਧਾਰ ਲਈ ਮਹੱਤਵਪੂਰਣ ਫ਼ੈਸਲੇ ਕੀਤੇ ਹਨ।
ਸੋਮਵਾਰ ਨੂੰ ਹੋਈ ਕੌਂਸਲ ਮੀਟਿੰਗ ਵਿੱਚ ਅਧਿਕਾਰੀਆਂ ਨੇ ਸਰੀ ਮੈਮੋਰਿਅਲ ਹਸਪਤਾਲ ਲਈ ਜ਼ੋਨਿੰਗ ਸੋਧਾਂ ਨੂੰ ਮਨਜ਼ੂਰੀ ਦਿੱਤੀ, ਜਿਸ ਨਾਲ ਹਸਪਤਾਲ ਦੇ ਭਵਿੱਖ ਵਿੱਚ ਹੋਣ ਵਾਲੇ ਕਿਸੇ ਵੀ ਵਿਸਤਾਰ ਨੂੰ ਤੇਜ਼ੀ ਅਤੇ ਆਸਾਨੀ ਨਾਲ ਅੱਗੇ ਵਧਾਇਆ ਜਾ ਸਕੇਗਾ। ਇਸਦੇ ਨਾਲ ਹੀ ਕਲੋਵਰਡੇਲ ਹਸਪਤਾਲ ਲਈ ਆਵਾਜਾਈ ਯੋਜਨਾ ਨੂੰ ਵੀ ਹਰੀ ਝੰਡੀ ਦਿੱਤੀ ਗਈ ਹੈ।
ਮੇਅਰ ਬ੍ਰੈਂਡਾ ਲੌਕ ਨੇ ਕਿਹਾ ਕਿ ਸਰੀ ਨੂੰ ਤੇਜ਼ੀ ਨਾਲ ਵੱਧ ਰਹੀ ਆਬਾਦੀ ਮੁਤਾਬਕ ਸਿਹਤ ਸੇਵਾਵਾਂ ਲਈ ਤਿਆਰ ਰਹਿਣਾ ਚਾਹੀਦਾ ਹੈ। ਜ਼ੋਨਿੰਗ ਰੁਕਾਵਟਾਂ ਨੂੰ ਹਟਾਉਣ ਅਤੇ ਆਵਾਜਾਈ ਸਹੂਲਤਾਂ ਨੂੰ ਸੁਧਾਰਨ ਨਾਲ ਸਰੀ ਦੇ ਨਿਵਾਸੀਆਂ ਨੂੰ ਉੱਚ-ਪੱਧਰੀ ਅਤੇ ਪਹੁੰਚਯੋਗ ਸਿਹਤ ਸੇਵਾਵਾਂ ਮਿਲਣਗੀਆਂ।
ਸਰੀ ਮੈਮੋਰਿਅਲ ਹਸਪਤਾਲ ਲਈ ਵੱਡਾ ਫ਼ੈਸਲਾ
ਮਨਜ਼ੂਰ ਕੀਤੀਆਂ ਬਾਈਲਾਅ ਸੋਧਾਂ ਨਾਲ ਭਵਿੱਖ ਵਿੱਚ ਹਸਪਤਾਲ ਨੂੰ ਵਧਾਉਣ ਲਈ ਮੁੜ ਰੀਜ਼ੋਨਿੰਗ ਦੀ ਲੋੜ ਨਹੀਂ ਰਹੇਗੀ। ਹਾਲਾਂਕਿ ਵਿਸਤਾਰ ਬਾਰੇ ਕੋਈ ਖਾਸ ਯੋਜਨਾ ਤੈਅ ਨਹੀਂ, ਪਰ ਇਹ ਫ਼ੈਸਲਾ ਹਸਪਤਾਲ ਨੂੰ ਵੱਖ-ਵੱਖ ਸਮਰੱਥਾਵਾਂ ਵਿੱਚ ਵਧਾਉਣ ਦੀ ਲਚਕ ਪ੍ਰਦਾਨ ਕਰੇਗਾ।
ਕਲੋਵਰਡੇਲ ਹਸਪਤਾਲ ਲਈ ਬਿਹਤਰ ਪਹੁੰਚ
2030 ਵਿੱਚ ਖੁਲ੍ਹਣ ਵਾਲੇ ਨਵੇਂ ਹਸਪਤਾਲ ਲਈ ਇੱਕ ਵਿਸਤ੍ਰਿਤ ਆਵਾਜਾਈ ਯੋਜਨਾ ਮਨਜ਼ੂਰ ਹੋ ਚੁੱਕੀ ਹੈ। ਫ੍ਰੇਜ਼ਰ ਹੈਲਥ ਮੁੱਖ ਸੜਕਾਂ, ਚੌਰਾਹਿਆਂ, ਪੈਦਲ ਰਸਤੇ ਅਤੇ ਸਾਈਕਲਿੰਗ ਰੂਟਾਂ ਨੂੰ ਅਪਗ੍ਰੇਡ ਕਰੇਗੀ।
ਸ਼ਹਿਰ 180 ਸਟਰੀਟ ‘ਤੇ 55 ਐਵੇਨਿਊ ਤੋਂ 56 ਐਵੇਨਿਊ ਤੱਕ ਨਵਾਂ ਮਲਟੀ-ਯੂਜ਼ ਪਾਥ ਵੀ ਬਣਾਏਗਾ, ਜਿੱਥੇ ਸਾਈਕਲ ਸਵਾਰਾਂ ਅਤੇ ਪੈਦਲ ਯਾਤਰੀਆਂ ਲਈ ਸੁਰੱਖਿਅਤ ਅਤੇ ਲਗਾਤਾਰ ਨੈੱਟਵਰਕ ਤਿਆਰ ਹੋਵੇਗਾ।
ਟ੍ਰਾਂਜ਼ਲਿੰਕ ਨਾਲ ਮਿਲ ਕੇ ਵਧੇਗੀ ਟ੍ਰਾਂਜ਼ਿਟ ਸੇਵਾ
ਸ਼ਹਿਰ, ਟ੍ਰਾਂਜ਼ਲਿੰਕ ਨਾਲ ਮਿਲ ਕੇ ਹਸਪਤਾਲ ਤੋਂ ਸਕਾਈਟ੍ਰੇਨ ਤੱਕ ਟ੍ਰਾਂਜ਼ਿਟ ਪਹੁੰਚ ਮਜ਼ਬੂਤ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਵਿਕਲਪਾਂ ਵਿੱਚ ਰੀ-ਰੂਟ ਕੀਤੀਆਂ ਬੱਸ ਸੇਵਾਵਾਂ ਜਾਂ ਨਵੀਆਂ ਰੂਟਾਂ ਸ਼ਾਮਲ ਹਨ—ਜਿਵੇਂ ਕਿ ਹਸਪਤਾਲ ਤੋਂ ਭਵਿੱਖ ਦੇ 184 ਸਟਰੀਟ ਸਰੀ–ਲੈਂਗਲੀ ਸਕਾਈਟ੍ਰੇਨ ਸਟੇਸ਼ਨ ਅਤੇ ਕੈਂਪਬੈਲ ਹਾਈਟਸ ਤੱਕ ਸੀਧੀ ਕਨੈਕਟਿਵਿਟੀ।
ਭਵਿੱਖ ਦੀਆਂ ਸਿਹਤ ਸੇਵਾਵਾਂ ਹੋਣਗੀਆਂ ਹੋਰ ਮਜ਼ਬੂਤ
ਇਨ੍ਹਾਂ ਸਾਰੇ ਸਾਂਝੇ ਉੱਦਮਾਂ ਨਾਲ ਦੋਵੇਂ ਹਸਪਤਾਲ ਸਾਈਟਾਂ ਸਰੀ ਦੀ ਵੱਧ ਰਹੀ ਆਬਾਦੀ ਨੂੰ ਸਮੇ-ਸਿਰ, ਪ੍ਰਭਾਵਸ਼ਾਲੀ ਅਤੇ ਉੱਚ-ਪੱਧਰੀ ਸਿਹਤ ਸੇਵਾਵਾਂ ਪ੍ਰਦਾਨ ਕਰਨ ਲਈ ਤਿਆਰ ਹੋਣਗੀਆਂ