ਮੈਟਰੋ ਵੈਨਕੂਵਰ ਵਿੱਚ ਟ੍ਰਾਂਸਲਿੰਕ ਵੱਲੋਂ ਬੱਸ ਅਤੇ ਸੀ ਬੱਸ ਸੇਵਾਵਾਂ ਵਿੱਚ ਵਾਧਾ

ਵੈਨਕੂਵਰ ( ਮਹੇਸ਼ਇੰਦਰ ਸਿੰਘ ਮਾਂਗਟ)-5 ਜਨਵਰੀ 2026 ਤੋਂ ਟ੍ਰਾਂਸਲਿੰਕ ਮੈਟਰੋ ਵੈਨਕੂਵਰ ਭਰ ਵਿੱਚ 37 ਬੱਸ ਰੂਟਾਂ ‘ਤੇ ਸੇਵਾ ਵਧਾ ਰਿਹਾ ਹੈ। ਇਸ ਕਦਮ ਦਾ ਮਕਸਦ ਬੱਸਾਂ ਵਿੱਚ ਭੀੜ ਘਟਾਉਣਾ, ਯਾਤਰੀਆਂ ਲਈ ਸੁਵਿਧਾ ਵਿੱਚ ਸੁਧਾਰ ਕਰਨਾ ਅਤੇ ਕੁਝ ਚੁਣੇ ਹੋਏ ਰੂਟਾਂ ‘ਤੇ ਚੱਲਣ ਦੇ ਸਮੇਂ ਨੂੰ ਵਧਾਉਣਾ ਹੈ।
ਮੁੱਖ ਤਬਦੀਲੀਆਂ ਵਿੱਚ, ਰੂਟ 609 ‘ਤੇ ਦਿਨ ਭਰ ਵਧੇਰੇ ਫੇਰੇ ਸ਼ਾਮਲ ਕੀਤੇ ਜਾਣਗੇ, ਜਿਸ ਨਾਲ ਟਸਾਵਾਸਨ ਫ਼ਸਟ ਨੇਸ਼ਨ ਤੋਂ ਆਉਣ-ਜਾਣ ਹੋਰ ਆਸਾਨ ਹੋਵੇਗੀ। ਇਸ ਦੇ ਨਾਲ ਹੀ ਰੂਟ 80 ‘ਤੇ ਹਫ਼ਤੇ ਦੇ ਦਿਨਾਂ ਵਿੱਚ ਦੁਪਹਿਰ ਸਮੇਂ ਨਵੀਆਂ ਸੇਵਾਵਾਂ ਸ਼ੁਰੂ ਕੀਤੀਆਂ ਜਾ ਰਹੀਆਂ ਹਨ। ਪਹਿਲਾਂ ਇਹ ਰੂਟ ਸਿਰਫ਼ ਪੀਕ ਸਮੇਂ ਹੀ ਚੱਲਦਾ ਸੀ, ਪਰ ਹੁਣ ਇਸ ਨਾਲ ਰਿਵਰ ਡਿਸਟ੍ਰਿਕਟ ਨੂੰ ਕੈਨੇਡਾ ਲਾਈਨ ਨਾਲ ਹੋਰ ਬਿਹਤਰ ਤਰੀਕੇ ਨਾਲ ਜੋੜਿਆ ਜਾਵੇਗਾ।
ਟ੍ਰਾਂਸਲਿੰਕ ਵੱਲੋਂ ਐਤਵਾਰ ਰਾਤਾਂ ਨੂੰ ਆਖ਼ਰੀ ਸੀਬੱਸ ਫੇਰਿਆਂ ਦੇ ਸਮੇਂ ਵਿੱਚ ਵੀ ਹਲਕੀਆਂ ਤਬਦੀਲੀਆਂ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਫੇਰਿਆਂ ਦੇ ਰਵਾਨਗੀ ਸਮੇਂ ਨੂੰ 2 ਤੋਂ 6 ਮਿੰਟ ਤੱਕ ਅੱਗੇ-ਪਿੱਛੇ ਕੀਤਾ ਗਿਆ ਹੈ, ਤਾਂ ਜੋ ਜਹਾਜ਼ਾਂ ਨੂੰ ਸੁਰੱਖਿਅਤ ਢੰਗ ਨਾਲ ਡੌਕ ਕਰਨ, ਯਾਤਰੀਆਂ ਨੂੰ ਉਤਾਰਨ ਅਤੇ ਆਖ਼ਰੀ ਯਾਤਰਾ ਲਈ ਤਿਆਰ ਹੋਣ ਲਈ ਪੂਰਾ ਸਮਾਂ ਮਿਲ ਸਕੇ।
ਇਹ ਸਾਰੀਆਂ ਸੇਵਾ ਵਧੋਤਰੀਆਂ ਟ੍ਰਾਂਸਲਿੰਕ ਦੀ 2025 ਇਨਵੈਸਟਮੈਂਟ ਯੋਜਨਾ ਤਹਿਤ ਕੀਤੀਆਂ ਜਾ ਰਹੀਆਂ ਹਨ, ਜੋ ਕਿ 2018 ਤੋਂ ਬਾਅਦ ਸਭ ਤੋਂ ਵੱਡਾ ਬੱਸ ਸੇਵਾ ਵਿਸਥਾਰ ਹੈ। ਜਨਵਰੀ 2026 ਤੱਕ ਇਸ ਯੋਜਨਾ ਹੇਠ ਮਨਜ਼ੂਰ ਕੀਤੀ ਗਈ ਨਵੀਂ ਬੱਸ ਸੇਵਾ ਦਾ ਲਗਭਗ ਇੱਕ-ਤਿਹਾਈ ਹਿੱਸਾ ਲਾਗੂ ਕੀਤਾ ਜਾ ਚੁੱਕਾ ਹੋਵੇਗਾ, ਜਦਕਿ ਹੋਰ ਸੁਧਾਰ ਸਤੰਬਰ 2025 ਤੋਂ ਸ਼ੁਰੂ ਹੋ ਕੇ ਅੱਗੇ ਵੀ ਜਾਰੀ ਰਹਿਣਗੇ|