ਨਵੀਆਂ ਅਰਜ਼ੀਆਂ ਨਹੀਂ ਲਈਆਂ ਜਾਣਗੀਆਂ-
ਮਹੇਸ਼ਇੰਦਰ ਸਿੰਘ ਮਾਂਗਟ
ਓਟਾਵਾ — ਕੈਨੇਡਾ ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ Parents and Grandparents Program (PGP) ਅਧੀਨ 2026 ਵਿੱਚ ਕੋਈ ਵੀ ਨਵੀਂ ਪਰਮਾਨੈਂਟ ਰਿਹਾਇਸ਼ (PR) ਅਰਜ਼ੀ ਸਵੀਕਾਰ ਨਹੀਂ ਕੀਤੀ ਜਾਵੇਗੀ। 2026 ਕੈਲੰਡਰ ਸਾਲ ਲਈ ਨਵੀਆਂ ਮੰਤਰੀ ਹਦਾਇਤਾਂ 1 ਜਨਵਰੀ 2026 ਤੋਂ ਲਾਗੂ ਹੋ ਗਈਆਂ ਹਨ।
ਇਨ੍ਹਾਂ ਹਦਾਇਤਾਂ ਅਨੁਸਾਰ, ਇਮੀਗ੍ਰੇਸ਼ਨ, ਰਿਫਿਊਜੀਜ਼ ਐਂਡ ਸਿਟੀਜ਼ਨਸ਼ਿਪ ਕੈਨੇਡਾ (IRCC) 2025 ਦੇ ਇੰਟੇਕ ਦੌਰਾਨ ਮਿਲੀਆਂ ਅਰਜ਼ੀਆਂ ਦੀ ਪ੍ਰਕਿਰਿਆ ਜਾਰੀ ਰੱਖੇਗਾ। 2026 ਵਿੱਚ 2025 ਇੰਟੇਕ ਵਿਚੋਂ 10,000 ਤੱਕ ਪੂਰੀਆਂ ਅਰਜ਼ੀਆਂ ਪ੍ਰਕਿਰਿਆ ਲਈ ਸਵੀਕਾਰ ਕੀਤੀਆਂ ਜਾਣਗੀਆਂ।
ਹਾਲਾਂਕਿ, 1 ਜਨਵਰੀ 2026 ਤੋਂ ਬਾਅਦ ਮਾਪਿਆਂ ਜਾਂ ਦਾਦਾ-ਨਾਨਾ ਲਈ ਕੋਈ ਵੀ ਨਵੀਂ PR ਵੀਜ਼ਾ ਅਰਜ਼ੀ ਜਾਂ ਸਪਾਂਸਰਸ਼ਿਪ ਅਰਜ਼ੀ IRCC ਵੱਲੋਂ ਨਾ ਤਾਂ ਲਈ ਜਾਵੇਗੀ ਅਤੇ ਨਾ ਹੀ ਪ੍ਰਕਿਰਿਆ ਕੀਤੀ ਜਾਵੇਗੀ, ਜਦ ਤੱਕ ਨਵੀਆਂ ਮੰਤਰੀ ਹਦਾਇਤਾਂ ਜਾਰੀ ਨਹੀਂ ਹੁੰਦੀਆਂ।
ਫੈਡਰਲ ਸਰਕਾਰ ਨੇ ਸਪਸ਼ਟ ਕੀਤਾ ਹੈ ਕਿ ਇਹ ਫੈਸਲਾ ਪ੍ਰਸ਼ਾਸਨਿਕ ਕਾਰਨਾਂ ਕਰਕੇ ਲਿਆ ਗਿਆ ਹੈ ਅਤੇ ਪਿਛਲੇ ਇੰਟੇਕਾਂ ਹੇਠ ਪਹਿਲਾਂ ਤੋਂ ਜਮ੍ਹਾਂ ਕਰਵਾਈਆਂ ਅਰਜ਼ੀਆਂ ‘ਤੇ ਕੋਈ ਅਸਰ ਨਹੀਂ ਪਵੇਗਾ।
IRCC ਨੇ ਕਿਹਾ ਹੈ ਕਿ Parents and Grandparents Program ਦੇ ਅਗਲੇ ਇੰਟੇਕ ਬਾਰੇ ਜਾਣਕਾਰੀ ਉਪਲਬਧ ਹੋਣ ‘ਤੇ ਜਨਤਾ ਨਾਲ ਸਾਂਝੀ ਕੀਤੀ ਜਾਵੇਗੀ।
