ਸਰੀ (ਮਹੇਸ਼ਇੰਦਰ ਸਿੰਘ ਮਾਂਗਟ ) ਅਜ਼ਾਦ ਪੰਜਾਬ ਕੇਸਰੀ ਕਬੱਡੀ ਕਲੱਬ ਵੱਲੋਂ ਨੌਰਥ ਸਰੀ ਸਪੋਰਟਸ ਐਂਡ ਆਇਸ ਕੰਪਲੈਕਸ ਦੇ ਸਾਹਮਣੇ ਖੇਡ ਮੈਦਾਨ ਵਿਖੇ ਕਬੱਡੀ ਟੂਰਨਾਮੈਂਟ ਕਰਵਾਇਆ ਗਿਆ। ਜਿੱਥੇ ਕਬੱਡੀ ਫੈਡਰੇਸ਼ਨ ਆਫ ਬੀ.ਸੀ ਐਂਡ ਐਸੋਸੀਏਸ਼ਨ ਦੀਆਂ 06 ਟੀਮਾਂ ਦੇ ਕਰਵਾਏ 07 ਮੈਚਾਂ ਵਿੱਚ ਧਾਵੀਆਂ ਨੇ ਕੁੱਲ 527 ਕਬੱਡੀਆਂ ਪਾ ਕੇ 420 ਅੰਕ ਪ੍ਰਾਪਤ ਕੀਤੇ ਅਤੇ ਜਾਫੀਆਂ ਨੇ ਕੁੱਲ 106 ਜੱਫੇ ਲਾਏ |
ਬੀ.ਸੀ ਯੂਨਾਈਟਿਡ ਫਰੈਂਡਜ਼ ਕਲੱਬ ਕੈਲਗਰੀ ਦੇ ਹੋਏ ਫਸਵੇਂ ਮੈਚ ਵਿੱਚ ਐਬਟਸਫੋਰਡ ਲਾਈਨਸ ਕਬੱਡੀ ਕਲੱਬ ਨੂੰ ਹਰਾ ਕਿ ਪਹਿਲਾ ਸਥਾਨ ਪ੍ਰਾਪਤ ਕੀਤਾ | ਇਸ ਕਬੱਡੀ ਕੱਪ ਵਿੱਚ ਵਧੀਆ ਧਾਵੀ ਰਵੀ ਦਿਓਰਾ, ਭੂਰੀ ਛੰਨਾਂ ਅਤੇ ਕਾਲਾ ਧੂੜਕੋਟ ਜਦ ਕਿ ਵਧੀਆ ਜਾਫੀ ਮਨੀਸ ਬਾਹੋ ਅਕਬਰਪੁਰ ਰਹੇ |ਵਧੀਆ ਧਾਵੀ ਅਤੇ ਜਾਫੀ ਨੂੰ ਵਿਸ਼ੇਸ਼ ਤੌਰ ‘ਤੇ ਸਨਮਾਨਿਤ ਕੀਤਾ ਗਿਆ।
ਫਾਈਨਲ ਮੈਚ ਵਿੱਚ ਬੀ.ਸੀ ਯੂਨਾਈਟਿਡ ਫਰੈਂਡਜ਼ ਕਲੱਬ ਕੈਲਗਰੀ ਦੀ ਟੀਮ ਵੱਲੋਂ ਰਵੀ ਦਿਓਰਾ, ਭੂਰੀ ਛੰਨਾਂ ਅਤੇ ਕਾਲਾ ਧੂੜਕੋਟ ਨੇ 10-10 ਨਾਨ-ਸਟਾਪ ਕਬੱਡੀਆਂ ਪਾਈਆਂ। ਐਬਟਸਫੋਰਡ ਲਾਈਨਸ ਕਬੱਡੀ ਕਲੱਬ ਟੀਮ ਦਾ ਕੋਈ ਵੀ ਜਾਫੀ ਜੱਫਾ ਲਾਉਣ ਵਿੱਚ ਕਾਮਯਾਬ ਨਹੀਂ ਹੋ ਸਕਿਆ। ਦੂਜੇ ਪਾਸੇ ਐਬਟਸਫੋਰਡ ਲਾਈਨਸ ਕਬੱਡੀ ਕਲੱਬ ਦੀ ਟੀਮ ਵੱਲੋਂ ਅੰਮ੍ਰਿਤ ਛੋਟਾ ਨਾਥ ਨੇ 07 ਕਬੱਡੀਆਂ ਪਾ ਕੇ 06 ਅੰਕ, ਹੀਰਾ ਬੱਟ ਨੇ 08 ਕਬੱਡੀਆਂ ਪਾ ਕੇ 06 ਅੰਕ, ਪੈਟਾ ਤੱਲਵਣ ਨੇ 08 ਕਬੱਡੀਆਂ ਪਾ ਕੇ 05 ਅੰਕ ਅਤੇ ਹੈਪੀ ਕੋਟ ਭਾਈ ਨੇ 07 ਕਬੱਡੀਆਂ ਪਾ ਕੇ 03 ਅੰਕ ਪ੍ਰਾਪਤ ਕੀਤੇ। ਬੀ.ਸੀ ਯੂਨਾਈਟਿਡ ਫਰੈਂਡਜ਼ ਕਲੱਬ ਕੈਲਗਰੀ ਟੀਮ ਦੇ ਜਾਫੀ ਸੀਲੂ ਬਾਹੋ ਅਕਬਰਪੁਰ ਅਤੇ ਮਨੀਸ ਬਾਹੋ ਅਕਬਰਪੁਰ ਨੇ 04-04 ਜੱਫੇ, ਸ਼ਰਨਾ ਡੱਗੋਰਮਾਣਾ ਅਤੇ ਅਰਸ਼ ਬਰਸਾਲਪੁਰ ਨੇ ਇਕ-ਇਕ ਜੱਫਾ ਲਾ ਕੇ ਇਹ ਮੈਚ ਬੀ.ਸੀ ਯੂਨਾਈਟਿਡ ਫਰੈਂਡਜ਼ ਕਲੱਬ ਕੈਲਗਰੀ ਦੀ ਝੋਲੀ ਪਾਇਆ |ਅੰਤਰਰਾਸ਼ਟਰੀ ਕਬੱਡੀ ਕੁਮੈਂਟੇਟਰ ਪ੍ਰੋ: ਮੱਖਣ ਸਿੰਘ ਹਕੀਮਪੁਰ,ਲੱਖਾ ਸਿੱਧਵਾ ਅਤੇ ਇਕਬਾਲ ਗਾਲਿਬ ਨੇ ਕੁਮੈਂਟਰੀ ਕੀਤੀ।ਸੁਰੱਖਿਆ ਤੋਰ ਤੇ ਪੂਰੇ ਪ੍ਰਬੰਧ ਹਿਲਟਨ ਸਕਿਉਰਿਟੀ ਦੇ ਸੀ ਈ ਓ ਗੁਰਜੰਟ ਸਿੰਘ ਸੰਧੂ ਦੀ ਦੇਖ ਰੇਖ ਹੇਠ ਕੀਤੇ ਗਏ |ਇਸ ਕਬੱਡੀ ਕੱਪ ਵਿੱਚ ਕਾਂਗਰਸੀ ਆਗੂ ਰਾਣਾ ਗੁਰਜੀਤ ਸਿੰਘ ਤੇ ਵਿਧਾਇਕ ਸ਼ੇਰੋਵਾਲੀਆ ਤੋ ਇਲਾਵਾ ਪੰਜਾਬੀ ਫ਼ਿਲਮੀ ਅਦਾਕਾਰ ਯੋਗਰਾਜ ਤੇ ਪ੍ਰਸਿੱਧ ਗਾਇਕ ਮਨਮੋਹਨ ਵਾਰਿਸ ਤੇ ਕਮਲ ਹੀਰ ਨੇ ਵੀ ਆਪਣੀ ਹਾਜ਼ਰੀ ਲਗਵਾਈ |
