ਸੰਪਾਦਕੀ-ਕਿੰਗ ਚਾਰਲਸ ਦੀ ਅਮਰੀਕਾ ਫੇਰੀ ਦੇ ਕੈਨੇਡਾ ਤੇ ਵਿਸ਼ਵ ਲਈ ਵੱਡੇ ਅਰਥ…

-ਸੁਖਵਿੰਦਰ ਸਿੰਘ ਚੋਹਲਾ-

ਇਸ ਵੀਰਵਾਰ ਨੂੰ ਕਿੰਗ ਚਾਰਲਸ ਵਲੋਂ ਆਪਣੀ ਪਤਨੀ ਕੁਵੀਨ ਕੈਮਿਲਾ ਪਾਰਕਰ ਨਾਲ ਅਮਰੀਕਾ ਦਾ ਚਾਰ ਦਿਨਾਂ ਦੌਰਾ ਸਮਾਪਤ ਕਰਦਿਆਂ ਰਾਸ਼ਟਰਪਤੀ ਟਰੰਪ ਸਮੇਤ ਦੁਨੀਆ ਨੂੰ ਇਕ ਸੁਨੇਹਾ ਦੇਣ ਦਾ ਸਫਲ ਯਤਨ ਕੀਤਾ ਕਿ ਇੰਗਲੈਂਡ ਦਾ ਸ਼ਾਹੀ ਖਾਨਦਾਨ ਅੱਜ ਵੀ ਕਾਮਨਵੈਲਥ ਮੁਲਕਾਂ ਦੀ ਅਗਵਾਈ ਦੇ ਪੂਰੀ ਤਰਾਂ ਯੋਗ ਹੈ। ਕਿੰਗ ਚਾਰਲਸ ਦਾ ਇਹ ਦੌਰਾ ਅਮਰੀਕਾ ਦੀ ਯੂਕੇ ਦੇ ਬਸਤੀਵਾਦੀ ਨਿਜਾਮ ਤੋਂ ਛੁਟਕਾਰਾ ਪਾਉਣ ਅਤੇ ਆਜਾਦੀ ਦੀ 250ਵੀਂ ਵਰੇਗੰਢ ਦੇ ਜਸ਼ਨਾਂ ਦੀ ਸ਼ੁਰੂਆਤ ਵਜੋਂ ਸੀ। ਕਿੰਗ ਚਾਰਲਸ ਨੇ ਆਪਣੇ ਇਸ ਦੌਰੇ ਦੌਰਾਨ ਜਿਥੇ ਵਿਸ਼ਵ ਜੰਗਾਂ ਦੌਰਾਨ ਜਾਨਾਂ ਗਵਾਉਣ ਵਾਲੇ ਲੱਖਾਂ ਅਮਰੀਕੀ ਸੈਨਿਕਾਂ, ਸਤੰਬਰ 11, 2001 ਦੇ ਅਲਕਾਇਦਾ ਦੇ ਹਮਲੇ ਵਿਚ ਮਾਰੇ ਗਏ ਆਮ ਸ਼ਹਿਰੀਆਂ ਨੂੰ ਸ਼ਰਧਾਂਜਲੀ ਦੇਣ ਤੋਂ ਇਲਾਵਾ ਵਾਈਟ ਹਾਊਸ ਵਿਚ ਡਿਨਰ ਅਤੇ ਅਮਰੀਕੀ ਕਾਂਗਰਸ ਨੂੰ ਸੰਬੋਧਨ ਕਰਨ ਉਪਰੰਤ ਰੈਡ ਕਾਰਪੈਟ ਦੇ ਸਵਾਗਤ ਅਤੇ ਵਿਦਾਈ ਦੇ ਮੰਜ਼ਰ ਨੂੰ ਇਤਿਹਾਸਕ ਬਣਾਇਆ ਉਥੇ ਰਾਸ਼ਟਰਪਤੀ ਟਰੰਪ ਨੂੰ ਵੀ ਇਕ ਜਮਹੂਰੀ ਆਗੂ ਵਜੋਂ ਵਿਚਰਨ ਅਤੇ ਆਪਣੀਆਂ ਸੀਮਾਵਾਂ ਵਿਚ ਰਹਿਣ ਦੀ ਨਸੀਹਤ ਕੀਤੀ। ਰਾਸ਼ਟਰਪਤੀ ਟਰੰਪ ਜੋ ਦੂਸਰੀ ਵਾਰ ਸੱਤਾ ਵਿਚ ਪਰਤਣ ਉਪਰੰਤ ਅਕਸਰ ਕੈਨੇਡਾ ਨੂੰ ਅਮਰੀਕਾ ਦੀ 51ਵੀਂ ਸਟੇਟ ਬਣਾਉਣ ਅਤੇ ਕੈਨੇਡੀਅਨ ਪ੍ਰਧਾਨ ਮੰਤਰੀਆਂ ਨੂੰ ਗਵਰਨਰ ਵਜੋਂ ਸੰਬੋਧਨ ਕਰਦੇ ਆਏ ਹਨ, ਨੂੰ ਕਿੰਗ ਚਾਰਲਸ ਨੇ ਸਪੱਸ਼ਟ ਕਿਹਾ ਕਿ ਉਹ ਕੈਨੇਡਾ ਦੇ ਸੰਵਿਧਾਨਕ ਮੁਖੀ ਹਨ। ਯੂਕੇ ਦੇ ਪ੍ਰਧਾਨ ਮੰਤਰੀ ਕੀਅਰ ਸਟਾਰਮਰ ਦੁਆਰਾ ਈਰਾਨ ਜੰਗ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਨੂੰ ਖਰੀਆਂ ਸੁਣਾਉਣ ਕਾਰਣ ਦੋਵਾਂ ਮੁਲਕਾਂ ਦੇ ਸਬੰਧਾਂ ਵਿਚ ਆਏ ਕੁਝ ਤਣਾਅ ਨੂੰ ਖਤਮ ਕਰਦਿਆਂ ਕਿੰਗ ਚਾਰਲਸ ਨੇ ਦੱਸਿਆ ਕਿ ਦੋਵਾਂ ਮੁਲਕਾਂ ਦੇ ਰਿਸ਼ਤੇ ਅਟੁਟ ਹਨ। ਉਹਨਾਂ ਰਾਸ਼ਟਰਪਤੀ ਟਰੰਪ ਦੀ ਉਸ ਟਿਪਣੀ ਕਿ ਅਗਰ ਅਮਰੀਕਨ ਨਾ ਹੁੰਦੇ ਤਾਂ ਬ੍ਰਿਟਿਸ਼ਰ ਅੱਜ ਜਰਮਨ ਭਾਸ਼ਾ ਬੋਲ ਰਹੇ ਹੁੰਦੇ, ਦਾ ਪ੍ਰਭਾਵੀ ਢੰਗ ਨਾਲ ਜਵਾਬ ਦਿੱਤਾ ਅਗਰ ਬ੍ਰਿਟਿਸ਼ਰ ਨਾ ਹੁੰਦੇ ਤਾਂ ਅਮਰੀਕੀ ਲੋਕ ਅੱਜ ਫਰੈਂਚ ਵਿਚ ਗੱਲਬਾਤ ਕਰ ਰਹੇ ਹੁੰਦੇ। ਉਹਨਾਂ ਬੜੇ ਸਲੀਕੇ ਨਾਲ ਫਰਾਂਸੀਸੀ ਲੋਕਾਂ ਨੂੰ ਆਪਣੇ ਭਰਾ ਦਸਦਿਆਂ ਕਿਹਾ ਕਿ ਉਹ ਸਭ ਇਕ ਹਨ। ਉਹਨਾਂ ਫੀਫਾ ਵਰਲਡ ਕੱਪ ਦਾ ਖਾਸ ਜਿਕਰ ਕਰਦਿਆਂ ਕਿਹਾ ਕਿ ਅਗਲੇ ਦਿਨਾਂ ਵਿਚ ਕੈਨੇਡਾ ਅਤੇ ਅਮਰੀਕਾ ਫੀਫਾ ਕੱਪ ਦੀ ਮੇਜ਼ਬਾਨੀ ਕਰ ਰਹੇ ਹੋਣਗੇ ਪਰ ਕਾਮਨਵੈਲਥ ਮੁਲਕਾਂ ਦੇ ਮੁਖੀ ਹੋਣ ਦੇ ਨਾਤੇ ਉਹ 5 ਮੁਲਕਾਂ ਦੀ ਤਰਫੋਂ ਮੇਜਬਾਨੀ  ਦਾ ਆਨੰਦ ਲੈਣਗੇ। ਉਹਨਾਂ ਦਾ ਟਰੰਪ ਨੂੰ ਇਹ ਸੁਨੇਹਾ ਸਪੱਸ਼ਟ ਰਿਹਾ ਕਿ ਕੈਨੇਡਾ ਵੀ ਅਮਰੀਕਾ ਵਾਂਗ ਅਜਿਹਾ ਪ੍ਰਭੂਸੱਤਾ ਸੰਪੰਨ ਮੁਲਕ ਹੈ ਜਿਸਦੇ ਉਹ ਮੁਖੀ ਹਨ। ਰਾਜਸੀ ਟਿਪਣੀਕਾਰਾਂ ਨੇ ਕਿੰਗ ਚਾਰਲਸ ਦੀ ਇਸ ਅਮਰੀਕਾ ਫੇਰੀ ਨੂੰ ਬਹੁਤ ਹੀ ਅਹਿਮ ਦੱਸਿਆ ਹੈ। ਕੁਝ ਨੇ ਤਾਂ ਇਥੋ ਤੱਕ ਕਿਹਾ ਹੈ ਅਸਲੀ ਰਾਜੇ ਨੇ ਨਕਲੀ ਰਾਜੇ ਨੂੰ ਉਸਦੀ ਔਕਾਤ ਯਾਦ ਕਰਾਈ ਹੈ। ਉਘੇ ਕਾਲਮਨਵੀਸ ਲਾਰੈਂਸ ਮਾਰਟਿਨ ਨੇ ਗਲੋਬ ਐਂਡ ਮੇਲ ਵਿਚ ਲਿਖੇ ਇਕ ਲੇਖ ਵਿਚ ਕਿੰਗ ਚਾਰਲਸ ਦੀ ਅਮਰੀਕਾ ਫੇਰੀ ਨੂੰ ਇਵੇਂ ਬਿਆਨ ਕੀਤਾ ਹੈ-

ਸ਼ਾਬਾਸ਼, ਚਾਰਲਸ! ਅਸਲੀ ਰਾਜਾ ਨੇ ਨਕਲੀ ਰਾਜੇ ਨੂੰ ਦਿੱਤਾ ਸਬਕ…

ਇੱਕ ਸ਼ਾਹੀ ਪਰਿਵਾਰਕ ਮੈਂਬਰ ਹੋਣ ਦੇ ਨਾਤੇ, ਚਾਰਲਸ ਦਾ ਜੀਵਨ ਇਤਿਹਾਸ ਅਧੂਰੇ ਵਾਅਦਿਆਂ ਅਤੇ ਕਦੇ ਨਾ ਖਤਮ ਹੋਣ ਵਾਲੀ ਨਿਰਾਸ਼ਾ ਨਾਲ ਭਰਿਆ ਰਿਹਾ ਹੈ। ਉਹ ਇੱਕ ਅਜਿਹੇ ਘਰ ਦੀ ਕਹਾਣੀ ਦਾ ਪਾਤਰ ਹੈ ਜੋ ਵਿਵਾਦਾਂ ਅਤੇ ਘੁਟਾਲਿਆਂ ਨਾਲ ਘਿਰਿਆ ਹੋਇਆ ਹੈ। ਜੋ ਉਸਦੇ ਜਾਂ ਉਸਦੇ ਵਿਸ਼ਾਲ ਪਰਿਵਾਰ ਦੇ ਆਲੇ ਦੁਆਲੇ ਹੈ, ਜਦੋਂ ਉਹ ਸ਼ਾਹੀ ਤਾਜ ਦੀ ਉਡੀਕ ਕਰ ਰਿਹਾ ਸੀ  ਤਾਂ ਉਸਦਾ ਕੈਂਸਰ ਵਰਗੀ ਨਾਮੁਰਾਦ ਬੀਮਾਰੀ ਨੇ ਸਵਾਗਤ ਕੀਤਾ ਜਿਸਦਾ ਉਹ ਅੱਜ ਵੀ ਇਲਾਜ ਕਰਵਾ ਰਿਹਾ ਹੈ। ਉਹ ਕਦੇ ਵੀ ਉਸ ਉਦਾਸੀ ਦੇ ਆਲਮ ਤੋਂ ਮੁਕਤ ਨਹੀਂ ਹੋ ਸਕਿਆ ਜਿਸਨੇ ਉਸਨੂੰ ਸਦਾ ਘੇਰੀ ਰੱਖਿਆ ਹੈ।

ਪਰ ਇਹ ਸਭ ਇਸ ਹਫ਼ਤੇ ਉਸਦੀ ਵਾਸ਼ਿੰਗਟਨ ਦੀ ਆਪਣੀ ਜੇਤੂ ਫੇਰੀ ਦੇ ਕਿੰਨਾ ਵਿਪਰੀਤ ਹੈ। ਕਿੰਗ ਚਾਰਲਸ ਅੱਜ ਦੁਨੀਆ ਦੇ ਸਭ ਤੋਂ ਵੱਡੇ ਮੰਚ ‘ਤੇ ਚਮਕ ਰਿਹਾ ਹੈ। ਉਹ ਆਪਣੀ ਮਾਂ ਮਹਾਰਾਣੀ ਐਲਿਜ਼ਾਬੈਥ ਤੋਂ ਵੀ ਵਧੇਰੇ ਇਕ ਰਾਜਾ ਵਜੋਂ ਜਿਆਦਾ ਸਪੱਸ਼ਟ ਹੈ  ਲੋਕਾਂ, ਪ੍ਰੈਸ ਅਤੇ ਸਾਰੀਆਂ ਧਾਰਾਂਵਾਂ ਦੇ ਸਿਆਸਤਦਾਨਾਂ ਦੀਆਂ ਬਹੁਤ ਸਾਰੀਆਂ  ਪ੍ਰਤੀਕਿਰਿਆਵਾਂ ਨੂੰ ਦੇਖਦੇ ਹੋਏ, ਇਕ 77 ਸਾਲਾ ਬਜ਼ੁਰਗ ਲਈ ਇਹ ਸਭ ਤੋਂ ਵਧੀਆ ਪਲ ਹੋ ਸਕਦੇ ਹਨ। ਕਿੰਗ ਚਾਰਲਸ ਕੋਲ ਬ੍ਰਿਟਿਸ਼-ਅਮਰੀਕੀ ਸਬੰਧਾਂ ਨੂੰ ਸੁਧਾਰਨ ਦਾ ਔਖਾ ਕੰਮ ਸੀ ਜੋ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੁਆਰਾ ਈਰਾਨ ਵਿਰੁੱਧ ਆਪਣੀ ਪਸੰਦ ਦੀ ਜੰਗ ਵਿੱਚ ਅਮਰੀਕਾ ਦੀ ਮਦਦ ਕਰਨ ਲਈ ਬ੍ਰਿਟੇਨ ਦੀ ਫੌਜ ਦੀ ਵਰਤੋਂ ਕਰਨ ਤੋਂ ਸ਼ੁਰੂਆਤੀ ਇਨਕਾਰ ਕਾਰਨ ਖਰਾਬ ਹੋ ਗਏ ਸਨ, ਇੱਕ ਅਜਿਹਾ ਕਦਮ ਜਿਸਨੇ ਡੋਨਾਲਡ ਟਰੰਪ ਨੂੰ ਨਿਰਾਸ਼ ਕੀਤਾ ਤੇ ਉਸਨੇ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਨੂੰ ਚੰਗਾ ਮਾੜਾ ਕਹਿਣ ਤੋ ਵੀ ਗੁਰੇਜ ਨਹੀ ਕੀਤਾ । ਕਾਂਗਰਸ ਨੂੰ ਆਪਣੇ ਸੰਬੋਧਨ ਵਿੱਚ, ਚਾਰਲਸ ਨੇ ਰਾਸ਼ਟਰਪਤੀ ਟਰੰਪ ਦਾ ਪੱਖ ਲਏ ਬਿਨਾਂ ਆਪਣੇ ਮਿਸ਼ਨ ਨੂੰ ਪੂਰਾ ਕੀਤਾ। ਇਹ ਉਹ ਟਰੰਪ ਹੈ ਜਿਸਨੂੰ ਬ੍ਰਿਟੇਨ ਵਿੱਚ ਵੀ ਓਨੀ ਹੀ ਨਫ਼ਰਤ ਨਾਲ ਵੇਖਿਆ ਜਾਂਦਾ ਹੈ ਜਿੰਨਾ ਕੈਨੇਡਾ ਵਿੱਚ। ਇਸ ਦੀ ਬਜਾਏ, ਕਿੰਗ ਚਾਰਲਸ ਨੇ ਇੱਕ ਦ੍ਰਿਸ਼ਟੀਕੋਣ ਪੇਸ਼ ਕੀਤਾ ਜੋ ਕੈਨੇਡਾ ਅਤੇ ਹੋਰ ਸਹਿਯੋਗੀਆਂ ਨਾਲ ਵਧੇਰੇ ਮੇਲ ਖਾਂਦਾ ਸੀ ਅਤੇ ਰਾਸ਼ਟਰਪਤੀ ਦੇ ਟਕਰਾਅ ਵਾਲੇ ਅਮਰੀਕਾ ਫਸਟ ਕਲਚਰ ਦੀ  ਦਲੇਰੀ ਨਾਲ ਤੁਲਨਾ ਕਰਦਾ ਹੈ । ਪਰ ਕਿੰਗ ਚਾਰਲਸ ਨੇ ਅਜਿਹਾ ਇਤਨੀ ਸੂਖਮਤਾ ਅਤੇ ਬੁੱਧੀਮਾਨੀ ਨਾਲ ਕੀਤਾ ਜਿਸਨੇ ਰਿਪਬਲਿਕਨ ਅਤੇ ਡੈਮੋਕ੍ਰੇਟਿਕ ਪ੍ਰਤੀਨਿਧ, ਦੋਵਾਂ ਨੂੰ ਮੋਹਿਤ ਕੀਤਾ। ਉਸ ਤੋਂ ਬਾਅਦ ਹੋਏ ਸਟੇਟ ਡਿਨਰ ਵਿੱਚ, ਮਾਹੌਲ ਖੁਸ਼ੀ ਭਰਿਆ ਰਿਹਾ।

ਆਪਣੇ ਭਾਸ਼ਣ ਵਿੱਚ ਕਿਸੇ ਵੀ ਚੀਜ਼ ‘ਤੇ ਵਿਵਾਦ ਦੀ ਬਜਾਏ, ਰਾਸ਼ਟਰਪਤੀ ਟਰੰਪ, ਜੋ ਥੋੜ੍ਹੀ ਜਿਹੀ ਵੀ ਮਾਮੂਲੀ ਗੱਲ ‘ਤੇ ਗੁੱਸੇ ਹੋ ਸਕਦੇ ਹਨ, ਨੂੰ ਕੂਟਨੀਤਕ ਤਰੀਕੇ ਨਾਲ ਮੱਤਾਂ ਦਿੱਤੀਆਂ। ਰਾਸ਼ਟਰਪਤੀ ਟਰੰਪ ਇਹ ਕਹਿਣ ਲਈ ਮਜ਼ਬਰ ਹੋਏ ਕਿ ਕਿੰਗ ਚਾਰਲਸ ਦਾ ਭਾਸ਼ਣ ਇੰਨਾ ਵਧੀਆ ਸੀ ਜਿਸ ਤੋਂ ਮਨ ਵਿਚ ਈਰਾਖਾ ਹੋਈ। ਕਿੰਗ ਚਾਰਲਸ ਦੇ ਭਾਸ਼ਨ ਨੇ ਡੈਮੋਕ੍ਰੇਟਸ ਮੈਂਬਰਾਂ ਨੂੰ ਵੀ ਖੜਾ ਕਰ ਦਿੱਤਾ ਜੋ ਉਹ ਕਦੇ ਵੀ ਨਹੀ ਕਰ ਸਕਿਆ।   ਰਾਸ਼ਟਰਪਤੀ ਦਾ ਨਾਮ ਲਏ ਬਿਨਾਂ, ਕਿੰਗ ਚਾਰਲਸ ਨੇ ਕਾਰਜਕਾਰੀ ਸ਼ਕਤੀ ਦੇ ਸੰਤੁਲਨ ਲਈ ਚੈਕ ਐਂਡ ਬੈਲੇਂਸ ਦੀ ਜ਼ਰੂਰਤ, ਜਲਵਾਯੂ ਪਰਿਵਰਤਨ ਵਿਰੁੱਧ ਕਾਰਵਾਈ, ਸਮੂਹਿਕ ਸੁਰੱਖਿਆ, ਬ੍ਰਿਟਿਸ਼ ਜਲ ਸੈਨਾ ਲਈ ਸਤਿਕਾਰ (ਮਿਸਟਰ ਟਰੰਪ ਦੁਆਰਾ ਉਨ੍ਹਾਂ ਦੇ ਜਹਾਜ਼ਾਂ ਨੂੰ “ਖਿਡੌਣੇ” ਕਹਿਣ ਤੋਂ ਬਾਅਦ), ਅਤੇ ਅਤਿ-ਰਾਸ਼ਟਰਵਾਦ ਨੂੰ ਰੱਦ ਕਰਨ ਦੀ ਜ਼ਰੂਰਤ ਬਾਰੇ ਗੱਲ ਕੀਤੀ। ਸਮਾਪਤੀ ਵਿੱਚ, ਉਸਨੇ ਜ਼ੋਰ ਦੇ ਕੇ ਕਿਹਾ: “ਮੈਂ ਪੂਰੇ ਦਿਲ ਨਾਲ ਪ੍ਰਾਰਥਨਾ ਕਰਦਾ ਹਾਂ … ਕਿ ਅਸੀਂ ਹੋਰ ਵੀ ਸਾਫ ਮਨ ਨਾਲ ਇਕ ਦੂਸਰੇ ਦੇ ਨਾਲ ਤੁਰੀਏ ਅਤੇ ਗਲਤ ਗੱਲਾਂ ਨੂੰ  ਨਜ਼ਰਅੰਦਾਜ਼ ਕਰੀਏ।”

ਜਦੋਂ ਮਹਾਰਾਣੀ ਐਲਿਜ਼ਾਬੈਥ  ਨੇ 1991 ਵਿੱਚ ਅਮਰੀਕੀ ਕਾਂਗਰਸ ਨੂੰ ਸੰਬੋਧਨ ਕੀਤਾ ਸੀ , ਤਾਂ ਉਸਨੂੰ ਅਮਰੀਕੀ ਤਰੀਕੇ ਨੂੰ ਚੁਣੌਤੀ ਦੇਣ ਦੀ ਕੋਈ ਲੋੜ ਨਹੀਂ ਸੀ ਪਈ। ਉਸਨੇ ਕਿਹਾ ਸੀ ਕਿ ਅਮਰੀਕਾ “ਰਾਸ਼ਟਰਾਂ ਵਿਚਕਾਰ ਸੱਭਿਅਕ ਆਚਰਣ ਦਾ ਰਖਵਾਲਾ” ਸੀ। ਕਿੰਗ ਚਾਰਲਸ, ਜਿਸਨੇ  ਜੈਫਰੀ ਐਪਸਟਾਈਨ ਦੇ ਕਿਸੇ ਵੀ ਜ਼ਿਕਰ ਨੂੰ ਨਜ਼ਰਅੰਦਾਜ਼ ਕੀਤਾ, ਨੇ ਟਰੰਪ ਪ੍ਰਸ਼ਾਸਨ ਦੇ ਕੰਮ ਲਈ ਕੋਈ ਪ੍ਰਸ਼ੰਸਾ ਜਾਰੀ ਨਹੀਂ ਕੀਤੀ। ਜੇ ਰਾਸ਼ਟਰਪਤੀ ਆਪਣੇ ਸ਼ਾਂਤੀ ਸਥਾਪਨਾ ਦੇ ਯਤਨਾਂ ਦੇ ਹਵਾਲੇ ਦੀ ਕੋਈ ਉਮੀਦ ਕਰ ਰਹੇ ਸਨ, ਤਾਂ ਉਸਨੂੰ ਕੋਈ ਸਮਰਥਨ ਨਹੀਂ ਮਿਲਿਆ। ਇਸ ਦੀ ਬਜਾਏ, ਕਿੰਗ ਨੇ ਟਰੰਪ ਪ੍ਰਸ਼ਾਸਨ ਦੀ ਯੁੱਧ ਪ੍ਰਤੀ ਛਿੱਟਪੁੱਟ ਵਚਨਬੱਧਤਾ ਦੀ ਬਜਾਏ “ਯੂਕਰੇਨ ਦੀ ਰੱਖਿਆ ਲਈ ਅਡੋਲ ਸੰਕਲਪ” ਦੀ ਜ਼ਰੂਰਤ ਬਾਰੇ ਗੱਲ ਕੀਤੀ।

ਰਾਸ਼ਟਰਪਤੀ ਟਰੰਪ ਨੇ ਤੀਜੀ ਦੁਨੀਆਂ ਦੇ ਤਾਕਤਵਰ ਆਦਮੀ ਵਾਂਗ ਕਾਰਜਕਾਰੀ ਸ਼ਕਤੀ ਦਾ ਇਸਤੇਮਾਲ ਕੀਤਾ ਹੈ, ਅਤੇ ਇਸ ਲਈ ਜਦੋਂ ਚਾਰਲਸ ਨੇ ਮੈਗਨਾ ਕਾਰਟਾ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਤਾਂ ਚੈਂਬਰ ਵਿੱਚ ਡੈਮੋਕ੍ਰੇਟਸ ਵੱਲੋਂ ਪ੍ਰਵਾਨਗੀ ਦੀ ਆਵਾਜ਼ ਗੂੰਜੀ। ਕਿੰਗ ਚਾਰਲਸ ਨੇ ਦੋ ਰਾਸ਼ਟਰਪਤੀਆਂ ਦਾ ਹਵਾਲਾ ਦਿੱਤਾ: ਜੌਨ ਐੱਫ. ਕੈਨੇਡੀ, ਅਟਲਾਂਟਿਕ ਭਾਈਵਾਲੀ ਦੇ ਆਪਣੇ “ਉੱਚੇ ਦ੍ਰਿਸ਼ਟੀਕੋਣ” ਲਈ, ਅਤੇ ਟੈਡੀ ਰੂਜ਼ਵੈਲਟ, ਵਾਤਾਵਰਣ ਸੁਰੱਖਿਆ ਦੇ ਮੋਢੀ ਹੋਣ ਬਾਰੇ। ਟਰੰਪ ਨੇ ਬਿਡੇਨ ਪ੍ਰਸ਼ਾਸਨ ਦੁਆਰਾ ਲਏ ਗਏ ਜਲਵਾਯੂ ਸੰਕਟ ਦਾ ਮੁਕਾਬਲਾ ਕਰਨ ਲਈ ਬਹੁਤ ਸਾਰੇ ਉਪਾਵਾਂ ਨੂੰ ਤਿਆਗ ਦਿੱਤਾ ਹੈ ਜਾਂ ਰੱਦ ਕਰ ਦਿੱਤਾ ਹੈ, ਅਤੇ ਵਾਤਾਵਰਣ ਪ੍ਰਤੀ ਚਾਰਲਸ ਦਾ ਜਨੂੰਨ ਅੱਧੀ ਸਦੀ ਪੁਰਾਣਾ ਹੈ।

ਇੱਕ ਸਾਲ ਪਹਿਲਾਂ ਓਟਾਵਾ ਦੀ ਆਪਣੀ ਫੇਰੀ ਸਮੇਂ ਕਿੰਗ ਚਾਰਲਸ ਨੇ ਕੈਨੇਡੀਅਨ ਪ੍ਰਭੂਸੱਤਾ ਦਾ ਪ੍ਰਤੀਕਾਤਮਕ ਸਮਰਥਨ ਜਾਹਰ ਕੀਤਾ ਸੀ, ਉਹਨਾਂ ਮੁੜ ਦੁਹਰਾਇਆ ਕਿ ਰਾਸ਼ਟਰੀ ਗੀਤ ਸਾਨੂੰ ਯਾਦ ਦਿਵਾਉਂਦਾ ਹੈ, ਟਰੂ ਨਾਰਥ ਸੱਚਮੁੱਚ ਮਜ਼ਬੂਤ ​​ਅਤੇ ਆਜ਼ਾਦ ਹੈ। ਰਾਸ਼ਟਰਪਤੀ ਟਰੰਪ ਦੇ ਅਜੀਬ ਸੁਭਾਅ ਨੂੰ ਦੇਖਦੇ ਹੋਏ, ਇਸ ਗੱਲ ਦੀ ਕੋਈ ਗਰੰਟੀ ਨਹੀਂ ਹੈ ਕਿ ਚਾਰਲਸ ਦੀ ਫੇਰੀ  ਸਟਾਰਮਰ ਦੀ ਲੇਬਰ ਸਰਕਾਰ ਪ੍ਰਤੀ ਅਮਰੀਕੀ ਪ੍ਰਸ਼ਾਸਨ ਦੀ ਦੁਸ਼ਮਣੀ ਨੂੰ ਬਦਲ ਦੇਵੇਗੀ। ਕਿੰਗ ਦੀ ਫੇਰੀ ਤੋਂ ਠੀਕ ਪਹਿਲਾਂ,  ਵਾਸ਼ਿੰਗਟਨ ਵਿੱਚ ਬ੍ਰਿਟਿਸ਼ ਰਾਜਦੂਤ ਕ੍ਰਿਸ਼ਚੀਅਨ ਟਰਨਰ ਨੇ ਇਕ ਸਕੂਲ ਸਮਾਗਮ ਵਿਚ ਕਿਹਾ ਸੀ ਕਿ ਜੇਕਰ ਅਮਰੀਕਾ ਦਾ ਕਿਸੇ ਵੀ ਦੇਸ਼ ਨਾਲ “ਵਿਸ਼ੇਸ਼ ਸਬੰਧ” ਹੈ, ਤਾਂ ਉਹ “ਸ਼ਾਇਦ ਇਜ਼ਰਾਈਲ” ਹੈ।

ਇਹ ਸੱਚ ਹੋ ਸਕਦਾ ਹੈ। ਪਰ ਨਕਲੀ ਰਾਜੇ ਦੇ ਸਾਹਮਣੇ ਅਸਲੀ ਰਾਜੇ ਦੇ ਪ੍ਰਦਰਸ਼ਨ ਨੇ ਦੁਨੀਆ ਨੂੰ ਪ੍ਰਭਾਵਿਤ ਕੀਤਾ ਹੈ। ਸਚਮੁੱਚ ਇਸ ਫੇਰੀ ਦੌਰਾਨ ਅਤੇ ਸਪੱਸ਼ਟਵਾਦੀ ਪਹੁੰਚ ਨਾਲ ਕਿੰਗ ਚਾਰਲਸ ਨੇ ਆਪਣੇ ਦੇਸ਼, ਆਪਣੇ ਆਪ ਅਤੇ ਕਦਰਾਂ-ਕੀਮਤਾਂ ਦਾ ਕੱਦ ਆਪਣੇ ਮੇਜ਼ਬਾਨ ਨਾਲੋਂ ਬਹੁਤ ਉੱਚਾ ਕੀਤਾ ਹੈ ।

ਧੰਨਵਾਦ ਸਹਿਤ-ਲਾਰੈਂਸ ਮਾਰਟਿਨ, ਦਾ ਗਲੋਬ ਐਂਡ ਮੇਲ।