ਰਈਆ (ਭੰਗੂ)- ਅੰਮ੍ਰਿਤਸਰ ਜਿਲੇ ਦੇ ਕਸਬਾ ਰਈਆ ਵਿਖੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਸ਼ੁਕਰਾਨਾ ਯਾਤਰਾ ਦੌਰਾਨ ਖਡੂਰ ਸਾਹਿਬ ਦੇ ਮੈਂਬਰ ਪਾਰਲੀਮੈਂਟ ਅੰਮ੍ਰਿਤਪਾਲ ਸਿੰਘ ਦੀ ਮਾਤਾ ਬਲਵਿੰਦਰ ਕੌਰ ਨੇ ਆਪਣੇ ਪੁੱਤਰ ਵਿਰੁੱਧ ਕਥਿਤ ਤੌਰ ‘ਤੇ ਕੌਮੀ ਸੁਰੱਖਿਆ ਕਾਨੂੰਨ (ਐਨ ਐਸ ਏ) ਖ਼ਤਮ ਹੋਣ ਦੇ ਬਾਵਜੂਦ ਉਸ ਨੂੰ ਪੰਜਾਬ ਤੋਂ ਬਾਹਰ ਲਗਾਤਾਰ ਨਜ਼ਰਬੰਦ ਰੱਖਣ ਨੂੰ ਲੈ ਕੇ ਮੁੱਖ ਮੰਤਰੀ ਨੂੰ ਘੇਰਨ ਦਾ ਯਤਨ ਕੀਤਾ। ਸੋਸ਼ਲ ਮੀਡੀਆ ਤੇ ਵਾਇਰਲ ਵੀਡੀਓਜ਼ ਵਿਚ ਵੇਖਿਆ ਜਾ ਸਕਦਾ ਹੈ ਕਿ ਮਾਤਾ ਬਲਵਿੰਦਰ ਕੌਰ ਭਾਰੀ ਸੁਰੱਖਿਆ ਅਤੇ ਸਮਰਥਕਾਂ ਦੇ ਇਕੱਠ ਵਿੱਚੋਂ ਲੰਘ ਕੇ ਮੁੱਖ ਮੰਤਰੀ ਦੀ ਗੱਡੀ ਦੇ ਨੇੜੇ ਪੁੱਜਣ ਵਿਚ ਸਫਲ ਰਹੀ। ਉਹ ਸੁਰੱਖਿਆ ਅਧਿਕਾਰੀਆਂ ਵਲੋਂ ਬਣਾਈ ਗਈ ਹੱਥਾਂ ਦੀ ਚੇਨ ਦੇ ਹੇਠਾਂ ਤੋਂ ਅੱਗੇ ਲੰਘ ਗਈ ਤੇ ਫਿਰ ਉਚੀ ਆਵਾਜ਼ ਵਿਚ ਮੁੱਖ ਮੰਤਰੀ ਨੂੰ ਆਵਾਜ਼ਾਂ ਦੇਣ ਲੱਗੀ। ਇਕ ਹੋਰ ਸੁਰੱਖਿਆ ਅਧਿਕਾਰੀ ਨੇ ਉਸਨੂੰ ਮੁੱਖ ਮੰਤਰੀ ਦੀ ਕਾਰ ਵੱਲ ਜਾਣ ਦਿੱਤਾ। ਸ਼ਾਇਦ ਉਸਨੂੰ ਕੋਈ ਆਮ ਔਰਤ ਸਮਝ ਲਿਆ ਗਿਆ ਸੀ। ਉਸਦੀ ਆਵਾਜ਼ ਸੁਣਕੇ ਮੁੱਖ ਮੰਤਰੀ ਵੀ ਆਪਣੀ ਗੱਡੀ ਤੋਂ ਝੁਕਕੇ ਉਸ ਵੱਲ ਹੋਏ। ਉਸ ਨੇ ਮੁੱਖ ਮੰਤਰੀ ਮਾਨ ਦਾ ਹੱਥ ਫੜ ਲਿਆ ਅਤੇ ਕਿਹਾ ਕਿ ਤੂੰ ਵੀ ਇਕ ਮਾਂ ਦਾ ਪੁੱਤ ਹੈਂ, ਮੈਂ ਅੰਮ੍ਰਿਤਪਾਲ ਦੀ ਮਾਂ ਹਾਂ। ਤੁਸੀ ਅੰਮ੍ਰਿਤਪਾਲ ਖਿਲਾਫ ਐੱਨਐੱਸਏ ਦੀ ਮਿਆਦ ਖ਼ਤਮ ਹੋਣ ਤੋਂ ਬਾਅਦ ਵੀ ਉਸਨੂੰ ਅਜੇ ਤੱਕ ਪੰਜਾਬ ਵਾਪਸ ਕਿਉਂ ਨਹੀਂ ਲਿਆਂਦਾ । ਮੁੱਖ ਮੰਤਰੀ ਸਵਾਲ ਸੁਣਦੇ ਹੋਏ ਦਿਖਾਈ ਦਿੱਤੇ ਪਰ ਮਾਤਾ ਦੇ ਸਵਾਲ ਦੇ ਨਾਲ ਮਾਤਾ ਦੀ ਅਸਲੀਅਤ ਬਾਰੇ ਪਤਾ ਲੱਗਣ ਤੇ ਉਹਨਾਂ ਦੂਸਰੇ ਪਾਸੇ ਮੂੰਹ ਭੰਵਾ ਲਿਆ। ਇਸ ਦੌਰਾਨ ਮਾਤਾ ਬਲਵਿੰਦਰ ਕੌਰ ਨੇ ਉਚੀ ਉਚੀ ਭਗਵੰਤ ਮਾਨ ਦਾ ਨਾਮ ਲਿਆ ਜਿਸਦੇ ਜਵਾਬ ਵਿਚ ਮਾਤਾ ਦੇ ਇਕ ਦੋ ਸਮਰਥਕਾਂ ਨੇ ਮੁਰਦਾਬਾਦ ਦੇ ਨਾਅਰੇ ਲਗਾਏ। ਸੁਰੱਖਿਆ ਬਲਾਂ ਨੇ ਸਥਿਤੀ ਨੂੰ ਬੜੀ ਮੁਸ਼ਕਲ ਨਾਲ ਸੰਭਾਲਿਆ। ਲਾਈਵ ਰਿਕਾਰਡਿੰਗ ਦਾ ਅਹਿਸਾਸ ਹੋਣ ਕਾਰਣ ਸ਼ਾਇਦ ਸੁਰੱਖਿਆ ਕਰਮੀਆਂ ਨੇ ਜਿਆਦਾ ਸਖਤੀ ਨਹੀ ਵਿਖਾਈ।
ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਯਾਤਰਾ ਦੌਰਾਨ ਭਾਰੀ ਸੁਰੱਖਿਆ ਚੇਨ ਨੂੰ ਤੋੜਕੇ ਮਾਤਾ ਬਲਵਿੰਦਰ ਕੌਰ ਵਲੋਂ ਉਸ ਕੋਲ ਪੁੱਜਣਾ, ਸਵਾਲ ਕਰਨਾ ਤੇ ਪਿੱਛੋਂ ਲਾਈਵ ਵੀਡੀਓਗ੍ਰਾਫੀ ਹੋਣਾ, ਕਈ ਤਰਾਂ ਦੇ ਸਵਾਲ ਖੜੇ ਕਰਦਾ ਹੈ ਪਰ ਮਾਤਾ ਬਲਵਿੰਦਰ ਕੌਰ ਦੀ ਇਸ ਦਲੇਰਾਨਾ ਕਾਰਵਾਈ ਦੀ ਵੀ ਭਾਰੀ ਚਰਚਾ ਹੈ।
