ਮਨਸੀਰਤ ਕੌਰ ਸੈਣੀ ਤੇ ਏਕਨੂਰ ਕੌਰ ਸੈਣੀ ਸਮੇਤ UCMAS ਗਾਰਡਨ ਸਿਟੀ ਦੇ ਚਾਰ ਵਿਦਿਆਰਥੀਆਂ ਨੇ 2026 ਕੈਨੇਡਾ ਨੈਸ਼ਨਲ ਮੈਨਟਲ ਮੈਥ ਮੁਕਾਬਲੇ ਵਿੱਚ ਜਿੱਤੇ ਵੱਡੇ ਸਨਮਾਨ-
ਵਿੰਨੀਪੈੱਗ (ਸੁਰਿੰਦਰ ਮਾਵੀ)-
ਕੈਨੇਡਾ ਦੇ ਸ਼ਹਿਰ ਵਿਨੀਪੈਗ ਦੀਆਂ ਪੰਜਾਬੀ ਮੂਲ ਦੀਆਂ ਦੋ ਸਕੀਆਂ ਭੈਣਾਂ ਮਨਸੀਰਤ ਕੌਰ ਸੈਣੀ ਅਤੇ ਏਕਨੂਰ ਕੌਰ ਸੈਣੀ ਨੇ 2026 ਦੇ UCMAS ਕੈਨੇਡਾ ਨੈਸ਼ਨਲ ਲੈਵਲ ਮੈਨਟਲ ਮੈਥ ਅਤੇ ਅਬੈਕਸ ਮੁਕਾਬਲੇ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਪੰਜਾਬੀ ਭਾਈਚਾਰੇ ਅਤੇ ਮੈਨੀਟੋਬਾ ਦਾ ਮਾਣ ਵਧਾਇਆ ਹੈ। ਦੋਵਾਂ ਭੈਣਾਂ ਨੇ ਆਪਣੇ-ਆਪਣੇ ਵਰਗਾਂ ਵਿੱਚ ਰਾਸ਼ਟਰੀ ਅਤੇ ਸੂਬਾਈ ਪੱਧਰ ‘ਤੇ ਉੱਚ ਸਨਮਾਨ ਹਾਸਲ ਕੀਤੇ। ਉਨ੍ਹਾਂ ਦੇ ਨਾਲ UCMAS ਗਾਰਡਨ ਸਿਟੀ (ਵਿਨੀਪੈਗ ਨਾਰਥ) ਦੇ ਹੋਰ ਵਿਦਿਆਰਥੀਆਂ ਗੁਰਦਿੱਤ ਮੋਧਨ ਅਤੇ ਕ੍ਰਿਸਚੀਅਨ ਓਵਨ ਅਗੁਆਯੋਏ ਨੇ ਵੀ ਕੌਮੀ ਪੱਧਰ ‘ਤੇ ਸ਼ਾਨਦਾਰ ਪ੍ਰਾਪਤੀਆਂ ਦਰਜ ਕਰਕੇ ਵਿਨੀਪੈਗ ਦਾ ਨਾਮ ਰੌਸ਼ਨ ਕੀਤਾ।
ਦੇਸ਼ ਭਰ ਦੇ ਹੋਣਹਾਰ ਵਿਦਿਆਰਥੀਆਂ ਵਿਚਾਲੇ ਹੋਣ ਵਾਲੇ ਇਸ ਵੱਕਾਰੀ ਮੁਕਾਬਲੇ ਵਿੱਚ ਮਾਨਸਿਕ ਗਣਨਾ, ਯਾਦ-ਸ਼ਕਤੀ, ਇਕਾਗਰਤਾ, ਸੁਣਨ ਦੀ ਸਮਰੱਥਾ ਅਤੇ ਗਤੀ ਦੀ ਸਖ਼ਤ ਪਰਖ ਕੀਤੀ ਜਾਂਦੀ ਹੈ। ਵਿਦਿਆਰਥੀਆਂ ਨੂੰ ਸਿਰਫ਼ ਕੁਝ ਮਿੰਟਾਂ ਵਿੱਚ ਸੈਂਕੜੇ ਗਣਿਤ ਪ੍ਰਸ਼ਨਾਂ ਦੇ ਸਹੀ ਜਵਾਬ ਦੇਣੇ ਪੈਂਦੇ ਹਨ, ਜਿਸ ਲਈ ਲੰਬੇ ਸਮੇਂ ਦੀ ਤਿਆਰੀ ਅਤੇ ਉੱਚ ਪੱਧਰੀ ਮਾਨਸਿਕ ਕਾਬਲੀਅਤ ਦੀ ਲੋੜ ਹੁੰਦੀ ਹੈ।
ਸੈਣੀ ਭੈਣਾਂ ਨੇ ਜਿੱਤਿਆ ਸਭ ਦਾ ਦਿਲ
ਵੱਡੀ ਭੈਣ ਮਨਸੀਰਤ ਕੌਰ ਸੈਣੀ ਨੇ 2026 ਦੇ UCMAS ਕੈਨੇਡਾ ਨੈਸ਼ਨਲ ਲੈਵਲ ਮੁਕਾਬਲੇ ਵਿੱਚ ਨੈਸ਼ਨਲ ਅਤੇ ਪ੍ਰੋਵਿੰਸ਼ੀਅਲ ਜੇਤੂ ਬਣਨ ਦਾ ਮਾਣ ਹਾਸਲ ਕੀਤਾ। ਉਸ ਨੇ ਸਿਰਫ਼ ਅੱਠ ਮਿੰਟਾਂ ਵਿੱਚ 200 ਗਣਿਤ ਸਵਾਲ ਹੱਲ ਕਰਕੇ ਆਪਣੀ ਅਸਧਾਰਨ ਮਾਨਸਿਕ ਗਣਨਾ ਸਮਰੱਥਾ ਦਾ ਪ੍ਰਦਰਸ਼ਨ ਕੀਤਾ। ਇਸ ਤੋਂ ਇਲਾਵਾ ਉਹ Category Z4 Visual Competition ਵਿੱਚ ਕੈਨੇਡਾ ਦੀਆਂ ਸਿਖਰਲੇ ਜੇਤੂਆਂ ਵਿੱਚ ਵੀ ਸ਼ਾਮਲ ਰਹੀ।
ਛੋਟੀ ਭੈਣ ਏਕਨੂਰ ਕੌਰ ਸੈਣੀ ਨੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਨੈਸ਼ਨਲ ਮੁਕਾਬਲੇ ਵਿੱਚ ਉੱਚ ਸਨਮਾਨ ਹਾਸਲ ਕੀਤਾ। ਉਸ ਨੇ ਅੱਠ ਮਿੰਟਾਂ ਵਿੱਚ 160 ਗਣਿਤ ਸਵਾਲ ਹੱਲ ਕਰਕੇ Category Z Visual Competition ਵਿੱਚ ਦੇਸ਼ ਦੇ ਸਰਵੋਤਮ ਪ੍ਰਤੀਯੋਗੀਆਂ ਵਿੱਚ ਆਪਣਾ ਸਥਾਨ ਬਣਾਇਆ। ਕੇਂਦਰ ਅਨੁਸਾਰ ਏਕਨੂਰ ਲਗਾਤਾਰ ਸ਼ਾਨਦਾਰ ਨਤੀਜੇ ਦਿੰਦੀ ਆ ਰਹੀ ਹੈ ਅਤੇ ਉਸ ਦੀ ਇਹ ਸਫ਼ਲਤਾ ਉਸ ਦੀ ਮਿਹਨਤ ਅਤੇ ਅਨੁਸ਼ਾਸਨ ਦਾ ਨਤੀਜਾ ਹੈ।
ਗੁਰਦਿੱਤ ਮੋਧਨ ਬਣੇ ਲਿਸਨਿੰਗ ਮੁਕਾਬਲੇ ਦੇ ਚੈਂਪੀਅਨ
UCMAS ਗਾਰਡਨ ਸਿਟੀ ਦੇ ਵਿਦਿਆਰਥੀ ਗੁਰਦਿੱਤ ਮੋਧਨ ਨੇ 2026 UCMAS ਲਿਸਨਿੰਗ ਕੰਪੀਟੀਸ਼ਨ ਵਿੱਚ ਮੈਨੀਟੋਬਾ ਦਾ ਪ੍ਰੋਵਿੰਸ਼ੀਅਲ ਚੈਂਪੀਅਨ ਬਣਨ ਦਾ ਮਾਣ ਹਾਸਲ ਕੀਤਾ। ਇਸ ਮੁਕਾਬਲੇ ਵਿੱਚ ਗਣਿਤ ਪ੍ਰਸ਼ਨ ਕੇਵਲ ਸੁਣਾਏ ਜਾਂਦੇ ਹਨ ਅਤੇ ਵਿਦਿਆਰਥੀਆਂ ਨੂੰ ਬਿਨਾਂ ਲਿਖੇ ਮਾਨਸਿਕ ਗਣਨਾ ਕਰਕੇ ਜਵਾਬ ਦੇਣਾ ਹੁੰਦਾ ਹੈ। ਇਸ ਤੋਂ ਇਲਾਵਾ ਗੁਰਦਿੱਤ ਨੇ ਕੈਨੇਡਾ ਨੈਸ਼ਨਲ ਲੈਵਲ ਮੁਕਾਬਲੇ ਵਿੱਚ ਵੀ ਜੇਤੂਆਂ ਵਿੱਚ ਥਾਂ ਬਣਾਈ, ਜਦਕਿ ਵੀਜ਼ੂਅਲ ਮੁਕਾਬਲੇ ਵਿੱਚ ਵੀ ਉਹ ਮੈਨੀਟੋਬਾ ਦੇ ਪ੍ਰਮੁੱਖ ਪ੍ਰਤੀਯੋਗੀਆਂ ਵਿੱਚ ਸ਼ਾਮਲ ਰਿਹਾ।
ਕ੍ਰਿਸਚੀਅਨ ਓਵਨ ਨੇ ਜਿੱਤਿਆ ਕੈਨੇਡਾ ਦਾ ਨੈਸ਼ਨਲ ਖ਼ਿਤਾਬ
ਵਿਦਿਆਰਥੀ ਕ੍ਰਿਸਚੀਅਨ ਓਵਨ ਅਗੁਆਯੋਏ ਨੇ Category A Visual Competition ਵਿੱਚ ਸਿਰਫ਼ ਅੱਠ ਮਿੰਟਾਂ ਵਿੱਚ 200 ਗਣਿਤ ਸਵਾਲ ਹੱਲ ਕਰਕੇ ਕੈਨੇਡਾ ਦਾ ਨੈਸ਼ਨਲ ਚੈਂਪੀਅਨ ਅਤੇ ਮੈਨੀਟੋਬਾ ਦਾ ਪ੍ਰੋਵਿੰਸ਼ੀਅਲ ਚੈਂਪੀਅਨ ਬਣਨ ਦਾ ਮਾਣ ਹਾਸਲ ਕੀਤਾ। ਇਸ ਦੇ ਨਾਲ ਹੀ ਉਸ ਨੇ ਲਿਸਨਿੰਗ ਮੁਕਾਬਲੇ ਵਿੱਚ ਵੀ ਮੈਨੀਟੋਬਾ ਦੇ ਟਾਪ 10 ਫ਼ੀਸਦੀ ਪ੍ਰਤੀਯੋਗੀਆਂ ਵਿੱਚ ਆਪਣੀ ਜਗ੍ਹਾ ਬਣਾਈ। ਉਸ ਦੀ ਇਹ ਪ੍ਰਾਪਤੀ ਮਾਨਸਿਕ ਗਣਿਤ ਵਿੱਚ ਉਸ ਦੀ ਉੱਚ ਪੱਧਰੀ ਕਾਬਲੀਅਤ ਨੂੰ ਦਰਸਾਉਂਦੀ ਹੈ।
ਪੰਜਾਬੀ ਭਾਈਚਾਰੇ ਲਈ ਮਾਣ ਦਾ ਪਲ
UCMAS ਗਾਰਡਨ ਸਿਟੀ ਦੇ ਪ੍ਰਬੰਧਕਾਂ ਨੇ ਕਿਹਾ ਕਿ ਇਹ ਸਫਲਤਾਵਾਂ ਸਿਰਫ਼ ਵਿਅਕਤੀਗਤ ਜਿੱਤਾਂ ਨਹੀਂ, ਸਗੋਂ ਵਿਨੀਪੈਗ ਅਤੇ ਮੈਨੀਟੋਬਾ ਦੇ ਪੂਰੇ ਭਾਈਚਾਰੇ ਲਈ ਮਾਣ ਵਾਲਾ ਪਲ ਹਨ। ਉਨ੍ਹਾਂ ਮੁਤਾਬਕ ਅਬੈਕਸ ਅਤੇ ਮੈਨਟਲ ਮੈਥ ਦੀ ਸਿਖਲਾਈ ਬੱਚਿਆਂ ਵਿੱਚ ਗਣਿਤ ਹੁਨਰ ਦੇ ਨਾਲ-ਨਾਲ ਇਕਾਗਰਤਾ, ਯਾਦ-ਸ਼ਕਤੀ, ਆਤਮ-ਵਿਸ਼ਵਾਸ, ਤਰਕਸ਼ੀਲ ਸੋਚ ਅਤੇ ਸਮੱਸਿਆ ਹੱਲ ਕਰਨ ਦੀ ਸਮਰੱਥਾ ਨੂੰ ਵੀ ਮਜ਼ਬੂਤ ਬਣਾਉਂਦੀ ਹੈ।
ਖ਼ਾਸ ਕਰਕੇ ਪੰਜਾਬੀ ਮੂਲ ਦੀਆਂ ਸਕੀਆਂ ਭੈਣਾਂ ਮਨਸੀਰਤ ਕੌਰ ਸੈਣੀ ਅਤੇ ਏਕਨੂਰ ਕੌਰ ਸੈਣੀ ਦੀ ਕੌਮੀ ਪੱਧਰ ‘ਤੇ ਸਾਂਝੀ ਸਫ਼ਲਤਾ ਨੇ ਵਿਨੀਪੈਗ ਦੇ ਪੰਜਾਬੀ ਭਾਈਚਾਰੇ ਵਿੱਚ ਖ਼ੁਸ਼ੀ ਦੀ ਲਹਿਰ ਪੈਦਾ ਕੀਤੀ ਹੈ। ਸਿੱਖਿਆ ਖੇਤਰ ਨਾਲ ਜੁੜੇ ਲੋਕਾਂ ਦਾ ਮੰਨਣਾ ਹੈ ਕਿ ਇਨ੍ਹਾਂ ਬੱਚਿਆਂ ਦੀਆਂ ਪ੍ਰਾਪਤੀਆਂ ਹੋਰ ਪਰਿਵਾਰਾਂ ਨੂੰ ਵੀ ਆਪਣੇ ਬੱਚਿਆਂ ਦੀ ਬੌਧਿਕ ਅਤੇ ਸਿਰਜਨਾਤਮਕ ਸਮਰੱਥਾ ਨਿਖਾਰਨ ਲਈ ਪ੍ਰੇਰਿਤ ਕਰਨਗੀਆਂ। ਇਹ ਨਤੀਜੇ ਇੱਕ ਵਾਰ ਫਿਰ ਸਾਬਤ ਕਰਦੇ ਹਨ ਕਿ ਸਹੀ ਮਾਰਗ ਦਰਸ਼ਨ, ਲਗਾਤਾਰ ਮਿਹਨਤ ਅਤੇ ਅਨੁਸ਼ਾਸਨ ਨਾਲ ਵਿਨੀਪੈਗ ਦੇ ਬੱਚੇ ਕੌਮੀ ਹੀ ਨਹੀਂ, ਸਗੋਂ ਅੰਤਰਰਾਸ਼ਟਰੀ ਪੱਧਰ ‘ਤੇ ਵੀ ਆਪਣੀ ਵੱਖਰੀ ਪਛਾਣ ਬਣਾ ਸਕਦੇ ਹਨ।
