* 500 ਤੋਂ ਵੱਧ ਸਮਰਥਕਾਂ ਦੀ ਮੌਜੂਦਗੀ ਵਿੱਚ ਪੂਰੇ ਉਮੀਦਵਾਰ ਪੈਨਲ ਦਾ ਐਲਾਨ, ਨਵਾਂ ਰਿਕ੍ਰੀਏਸ਼ਨ ਸੈਂਟਰ ਅਤੇ ਆਰਥਿਕ ਵਿਕਾਸ ਦਫ਼ਤਰ ਬਣਾਉਣ ਦੇ ਵਾਅਦੇ-
ਪਵਨ ਜੋਸ਼ੀ ਕੌਂਸਲਰ, ਅਮਨ ਢਿੱਲੋਂ ਤੇ ਗੁਰਿੰਦਰ ਕਾਹਲੋਂ ਸਕੂਲ ਟਰੱਸਟੀ ਲਈ ਉਮੀਦਵਾਰ ਬਣੇ-
ਡੈਲਟਾ, (ਮਹੇਸ਼ਇੰਦਰ ਸਿੰਘ ਮਾਂਗਟ): -ਕੈਨੇਡਾ ਦੇ ਖੂਬਸੂਰਤ ਸ਼ਹਿਰ ਡੈਲਟਾ ਵਿੱਚ ਅਕਤੂਬਰ ਮਹੀਨੇ ਹੋਣ ਵਾਲੀਆਂ ਮਿਊਂਸਪਲ ਚੋਣਾਂ ਨੂੰ ਲੈ ਕੇ ਸਿਆਸੀ ਮਾਹੌਲ ਗਰਮਾਉਣਾ ਸ਼ੁਰੂ ਹੋ ਗਿਆ ਹੈ। ਇਸੇ ਤਹਿਤ “ਵਨ ਡੈਲਟਾ” ਟੀਮ ਵੱਲੋਂ ਆਪਣੇ ਪੂਰੇ ਉਮੀਦਵਾਰ ਪੈਨਲ ਦਾ ਅਧਿਕਾਰਿਤ ਐਲਾਨ ਕਰਦੇ ਹੋਏ ਚੋਣ ਮੁਹਿੰਮ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਗਈ। ਦੋ ਵਾਰ ਸਿਟੀ ਕੌਂਸਲਰ ਰਹਿ ਚੁੱਕੇ ਡਿਲਨ ਕ੍ਰੂਗਰ ਇਸ ਵਾਰ ਮੇਅਰ ਦੀ ਦੌੜ ਵਿੱਚ ਉਤਰ ਰਹੇ ਹਨ ਅਤੇ ਉਹੀ ਇਸ ਟੀਮ ਦੀ ਅਗਵਾਈ ਕਰ ਰਹੇ ਹਨ।
ਕੈਸਕੇਡਜ਼ ਕਸੀਨੋ ਡੈਲਟਾ ਵਿੱਚ ਹੋਏ ਵਿਸ਼ਾਲ ਸਮਾਗਮ ਦੌਰਾਨ 500 ਤੋਂ ਵੱਧ ਸਮਰਥਕਾਂ ਦੀ ਮੌਜੂਦਗੀ ਨੇ ਚੋਣ ਮੁਹਿੰਮ ਨੂੰ ਜੋਸ਼ ਅਤੇ ਉਤਸ਼ਾਹ ਨਾਲ ਭਰ ਦਿੱਤਾ। ਸਮਾਗਮ ਦੌਰਾਨ ਡਿਲਨ ਕ੍ਰੂਗਰ ਨੇ ਕਿਹਾ ਕਿ ਡੈਲਟਾ ਦੇਸ਼ ਦੀਆਂ ਸਭ ਤੋਂ ਵਧੀਆ ਕਮਿਊਨਿਟੀਆਂ ਵਿੱਚੋਂ ਇੱਕ ਹੈ ਅਤੇ ਇਸ ਸ਼ਹਿਰ ਵਿੱਚ ਵਿਕਾਸ ਦੀਆਂ ਬੇਅੰਤ ਸੰਭਾਵਨਾਵਾਂ ਮੌਜੂਦ ਹਨ। ਉਨ੍ਹਾਂ ਕਿਹਾ ਕਿ “ਵਨ ਡੈਲਟਾ” ਟੀਮ ਵਿੱਚ ਵੱਖ-ਵੱਖ ਪਿਛੋਕੜਾਂ ਅਤੇ ਤਜਰਬਿਆਂ ਵਾਲੇ 13 ਉਮੀਦਵਾਰ ਸ਼ਾਮਲ ਹਨ, ਜਿਨ੍ਹਾਂ ਦਾ ਸਾਂਝਾ ਟੀਚਾ ਡੈਲਟਾ ਨੂੰ ਇਕੱਠਾ ਕਰਕੇ ਤਰੱਕੀ ਦੇ ਨਵੇਂ ਰਾਹ ‘ਤੇ ਲੈ ਜਾਣਾ ਹੈ।
ਸਿਟੀ ਕੌਂਸਲ ਲਈ ਰੌਡ ਬਾਈਂਡਰ, ਜੈਨੀਫਰ ਜੋਹਲ ਅਤੇ ਡੈਨਿਯਲ ਬੋਇਸਵਰਟ ਨੂੰ ਮੁੜ ਮੈਦਾਨ ਵਿੱਚ ਉਤਾਰਿਆ ਗਿਆ ਹੈ। ਇਸ ਤੋਂ ਇਲਾਵਾ ਸਿਲਵੀਆ ਬਿਸ਼ਪ, ਸਾਰਾਹ ਗੈਲਪ ਅਤੇ ਪਵਨ ਜੋਸ਼ੀ ਨੂੰ ਵੀ ਉਮੀਦਵਾਰ ਬਣਾਇਆ ਗਿਆ ਹੈ। ਸਕੂਲ ਬੋਰਡ ਲਈ ਮਸਾਕੋ ਗੂਚ, ਅਮਨ ਢਿੱਲੋਂ ਅਤੇ ਵੈਲ ਵਿੰਡਸਰ ਦੇ ਨਾਲ ਗੁਰਿੰਦਰ ਕਾਹਲੋਂ, ਜੈਸੀ ਬੀਅਰਮੈਨ, ਸੁਰਜ ਉੱਪਲ ਅਤੇ ਤਮਾਰਾ ਬਿਸੈੱਟ-ਲਾਜ਼ਾ ਨੂੰ ਵੀ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।
ਡਿਲਨ ਕ੍ਰੂਗਰ ਨੇ ਆਪਣੀ ਚੋਣ ਮੁਹਿੰਮ ਦੇ ਮੁੱਖ ਵਾਅਦਿਆਂ ਦਾ ਵੀ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਨਾਰਥ ਡੈਲਟਾ ਵਿੱਚ ਇੱਕ ਨਵਾਂ ਫੁੱਲ-ਸਰਵਿਸ ਰਿਕ੍ਰੀਏਸ਼ਨ ਸੈਂਟਰ ਬਣਾਇਆ ਜਾਵੇਗਾ, ਜਿਸ ਨਾਲ ਨੌਜਵਾਨਾਂ ਅਤੇ ਪਰਿਵਾਰਾਂ ਨੂੰ ਆਧੁਨਿਕ ਸਹੂਲਤਾਂ ਪ੍ਰਦਾਨ ਹੋਣਗੀਆਂ। ਇਸਦੇ ਨਾਲ ਹੀ ਪੈਟਰਸਨ ਪਾਰਕ ਨੂੰ ਇੱਕ ਵੱਡੇ ਇਵੈਂਟ ਸਪੇਸ ਵਜੋਂ ਵਿਕਸਤ ਕਰਨ ਦੀ ਯੋਜਨਾ ਵੀ ਰੱਖੀ ਗਈ, ਜਿੱਥੇ ਭਵਿੱਖ ਵਿੱਚ ਕਨਸਰਟ, ਮੇਲੇ, ਨਾਈਟ ਮਾਰਕੀਟਾਂ ਅਤੇ ਕਮਿਊਨਿਟੀ ਸਮਾਗਮ ਕਰਵਾਏ ਜਾ ਸਕਣਗੇ।
ਉਨ੍ਹਾਂ ਇਹ ਵੀ ਐਲਾਨ ਕੀਤਾ ਕਿ ਜੇਕਰ “ਵਨ ਡੈਲਟਾ” ਟੀਮ ਨੂੰ ਲੋਕਾਂ ਦਾ ਸਮਰਥਨ ਮਿਲਦਾ ਹੈ ਤਾਂ ਡੈਲਟਾ ਵਿੱਚ ਪਹਿਲੀ ਵਾਰ ਇੱਕ ਖਾਸ ਆਰਥਿਕ ਵਿਕਾਸ ਦਫ਼ਤਰ ਸਥਾਪਤ ਕੀਤਾ ਜਾਵੇਗਾ। ਇਸ ਦਫ਼ਤਰ ਦਾ ਉਦੇਸ਼ ਨਿਵੇਸ਼ ਖਿੱਚਣਾ, ਨਵੀਆਂ ਨੌਕਰੀਆਂ ਪੈਦਾ ਕਰਨਾ ਅਤੇ ਸਥਾਨਕ ਅਰਥਵਿਵਸਥਾ ਨੂੰ ਹੋਰ ਮਜ਼ਬੂਤ ਕਰਨਾ ਹੋਵੇਗਾ।
“ਵਨ ਡੈਲਟਾ” ਦੀ ਚੋਣ ਮੁਹਿੰਮ ਚਾਰ ਮੁੱਖ ਮੱਦੇਆਂ ‘ਤੇ ਕੇਂਦਰਿਤ ਰਹੇਗੀ — ਮਜ਼ਬੂਤ ਇਨਫਰਾਸਟ੍ਰਕਚਰ, ਜ਼ਿੰਮੇਵਾਰ ਆਰਥਿਕ ਵਿਕਾਸ, ਨੌਜਵਾਨਾਂ ਅਤੇ ਕਮਿਊਨਿਟੀ ਲਈ ਨਵੇਂ ਪ੍ਰੋਜੈਕਟ ਅਤੇ ਸਿਟੀ ਹਾਲ ਵਿੱਚ ਪਾਰਦਰਸ਼ਤਾ ਨਾਲ ਲੋਕਾਂ ਦਾ ਭਰੋਸਾ ਮੁੜ ਕਾਇਮ ਕਰਨਾ।
ਸਮਾਗਮ ਦੌਰਾਨ ਸਾਬਕਾ ਐਮਐਲਏ ਸਕਾਟ ਹੈਮਿਲਟਨ, ਸਾਬਕਾ ਸਕੂਲ ਬੋਰਡ ਚੇਅਰ ਲੌਰਾ ਡਿਕਸਨ ਅਤੇ ਸਾਬਕਾ ਕੌਂਸਲਰ ਬਰੂਸ ਮੈਕਡੋਨਾਲਡ ਨੇ ਵੀ ਡਿਲਨ ਕ੍ਰੂਗਰ ਅਤੇ ਉਨ੍ਹਾਂ ਦੀ ਟੀਮ ਨੂੰ ਖੁੱਲ੍ਹਾ ਸਮਰਥਨ ਦਿੱਤਾ।
ਆਪਣੇ ਸੰਬੋਧਨ ਦੇ ਅਖੀਰ ਵਿੱਚ ਡਿਲਨ ਕ੍ਰੂਗਰ ਨੇ ਕਿਹਾ ਕਿ ਹੁਣ ਸਮਾਂ ਆ ਗਿਆ ਹੈ ਕਿ ਡੈਲਟਾ ਨੂੰ ਮਜ਼ਬੂਤ ਬੁਨਿਆਦਾਂ ‘ਤੇ ਅੱਗੇ ਵਧਾਇਆ ਜਾਵੇ ਅਤੇ ਲੋਕਾਂ ਨੂੰ ਇਕੱਠਾ ਕਰਕੇ ਸ਼ਹਿਰ ਦਾ ਨਵਾਂ ਭਵਿੱਖ ਤਿਆਰ ਕੀਤਾ ਜਾਵੇ। ਸਿਆਸੀ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ “ਵਨ ਡੈਲਟਾ” ਦੀ ਇਹ ਮਜ਼ਬੂਤ ਸ਼ੁਰੂਆਤ ਆਉਣ ਵਾਲੀਆਂ ਮਿਊਂਸਪਲ ਚੋਣਾਂ ਨੂੰ ਕਾਫ਼ੀ ਦਿਲਚਸਪ ਬਣਾਉਣ ਵਾਲੀ ਹੈ ਅਤੇ ਹੁਣ ਡੈਲਟਾ ਦੀ ਸਿਆਸਤ ‘ਤੇ ਸਭ ਦੀ ਨਜ਼ਰ ਟਿਕੀ ਹੋਈ ਹੈ।
