ਐਬਸਫੋਰਡ, 27 ਮਈ (ਹਰਦਮ ਮਾਨ)-ਪੰਜਾਬੀ ਮਾਂ-ਬੋਲੀ, ਅਮੀਰ ਸੱਭਿਆਚਾਰ ਅਤੇ ਵਿਰਾਸਤੀ ਸਾਂਝਾਂ ਨੂੰ ਸਮਰਪਿਤ ‘ਡਾਇਮੰਡ ਕਲਚਰਲ ਕਲੱਬ ਐਬਸਫੋਰਡ’ ਵੱਲੋਂ ਬੀਤੇ ਦਿਨੀਂ ਸਥਾਨਕ ਰੋਟਰੀ ਸਟੇਡੀਅਮ ਵਿਖੇ ਸਾਲਾਨਾ ‘ਵਿਰਸੇ ਦੇ ਸ਼ੌਕੀਨ’ ਮੇਲਾ ਬੜੀ ਹੀ ਸ਼ਾਨੋ-ਸ਼ੌਕਤ ਅਤੇ ਧੂਮ-ਧਾਮ ਨਾਲ ਕਰਵਾਇਆ ਗਿਆ। ਸੱਭਿਆਚਾਰਕ ਵੰਨਗੀਆਂ ਨਾਲ ਸਜੇ ਇਸ ਮੇਲੇ ਨੇ ਜਿੱਥੇ ਪਰਦੇਸਾਂ ਵਿੱਚ ਵਸਦੇ ਪੰਜਾਬੀਆਂ ਦੇ ਦਿਲਾਂ ਵਿੱਚ ਵਤਨ ਦੀਆਂ ਮਿੱਠੀਆਂ ਯਾਦਾਂ ਤਾਜ਼ਾ ਕਰ ਦਿੱਤੀਆਂ, ਉੱਥੇ ਹੀ ਪੰਜਾਬੀਅਤ ਦੇ ਰੰਗ ਨੂੰ ਵਿਦੇਸ਼ੀ ਧਰਤੀ ’ਤੇ ਹੋਰ ਗੂੜ੍ਹਾ ਕਰ ਦਿੱਤਾ। ਮੇਲੇ ਦਾ ਰਸਮੀ ਆਗਾਜ਼ ਕਲੱਬ ਦੇ ਮੋਹਰੀ ਰਾਜਾ ਗਿੱਲ ਦੇ ਨਿੱਘੇ ਅਤੇ ਸੁਆਗਤੀ ਸ਼ਬਦਾਂ ਨਾਲ ਹੋਇਆ, ਜਿਨ੍ਹਾਂ ਨੇ ਦੂਰ-ਦੁਰਾਡਿਓਂ ਹੁੰਮਹੁਮਾ ਕੇ ਪਹੁੰਚੇ ਦਰਸ਼ਕਾਂ ਦਾ ਰਵਾਇਤੀ ਅੰਦਾਜ਼ ਵਿੱਚ ਧੰਨਵਾਦ ਕੀਤਾ। ਇਸ ਵਾਰ ਮੇਲੇ ਵਿੱਚ ਦਰਸ਼ਕਾਂ ਦਾ ਠਾਠਾਂ ਮਾਰਦਾ ਇਕੱਠ ਦੇਖਣ ਨੂੰ ਮਿਲਿਆ। ਨੌਜਵਾਨਾਂ, ਮੁਟਿਆਰਾਂ ਅਤੇ ਬਜ਼ੁਰਗਾਂ ਦੇ ਰੰਗ-ਬਰੰਗੇ ਪਹਿਰਾਵਿਆਂ ਨੇ ਸਟੇਡੀਅਮ ਨੂੰ ਇੱਕ ਮਿੰਨੀ ਪੰਜਾਬ ਦੇ ਰੂਪ ਵਿੱਚ ਤਬਦੀਲ ਕਰ ਦਿੱਤਾ।
ਮੇਲੇ ਦੇ ਸੱਭਿਆਚਾਰਕ ਅਖਾੜੇ ਵਿੱਚ ਪੰਜਾਬੀ ਸੰਗੀਤ ਜਗਤ ਦੇ ਪ੍ਰਸਿੱਧ ਫ਼ਨਕਾਰਾਂ ਨੇ ਆਪਣੀ ਗਾਇਕੀ ਦੇ ਵੱਖ ਵੱਖ ਰੰਗਾਂ ਰਾਹੀਂ ਸਰੋਤਿਆਂ ਨੂੰ ਝੂਮਣ ਲਾ ਦਿੱਤਾ। ਨੌਜਵਾਨ ਦਿਲਾਂ ਦੀ ਧੜਕਣ ਸੱਜਣ ਅਦੀਬ ਨੇ ਆਪਣੇ ਸੱਭਿਆਚਾਰਕ ਅੰਦਾਜ਼ ਵਿੱਚ ਗੀਤ ਗਾ ਕੇ ਨੌਜਵਾਨ ਪੀੜ੍ਹੀ ਨੂੰ ਕੀਲਿਆ, ਜਦਕਿ ਹਰਦੇਵ ਮਾਹੀਨੰਗਲ ਨੇ ਆਪਣੀ ਦਮਦਾਰ ਆਵਾਜ਼ ਅਤੇ ਰਵਾਇਤੀ ਗਾਇਕੀ ਨਾਲ ਅਖਾੜੇ ਵਿੱਚ ਪੂਰਾ ਰੰਗ ਬੰਨ੍ਹਿਆ। ਇਸੇ ਤਰ੍ਹਾਂ ਗੁਰਦੇਵ ਕੌਰ ਨੇ ਰਵਾਇਤੀ ਲੋਕ ਗੀਤਾਂ ਅਤੇ ਅਲਗੋਜਿਆਂ ਦੀਆਂ ਮਿੱਠੀਆਂ ਤਾਨਾਂ ਨਾਲ ਪੂਰੇ ਮੇਲੇ ਵਿੱਚ ਖੂਬ ਧੁੰਮਾਂ ਪਾਈਆਂ ਅਤੇ ਸਰੋਤਿਆਂ ਨੂੰ ਪੁਰਾਣੇ ਪੰਜਾਬ ਦੇ ਰੰਗਾਂ ਨਾਲ ਜੋੜਿਆ। ਮੇਲੇ ਦੇ ਇਸ ਪਿੜ ਵਿੱਚ ਜੈਸਮੀਨ ਅਖਤਰ ਨੇ ਜਦੋਂ ਆਪਣੇ ਚੁਲਬੁਲੇ ਅਤੇ ਨਿਵੇਕਲੇ ਗੀਤਾਂ ਦੀ ਛਹਿਬਰ ਲਾਈ ਤਾਂ ਪੰਡਾਲ ਵਿੱਚ ਬੈਠੇ ਨੌਜਵਾਨਾਂ ਤੋਂ ਰਿਹਾ ਨਾ ਗਿਆ, ਉਨ੍ਹਾਂ ਨੇ ਨੱਚ-ਨੱਚ ਕੇ ਭੰਗੜੇ ਪਾਏ ਅਤੇ ਕਿਲਕਾਰੀਆਂ ਨਾਲ ਪੂਰਾ ਸਟੇਡੀਅਮ ਗੂੰਜਣ ਲਾ ਦਿੱਤਾ। ਕੁਲਵੰਤ ਸੇਖੋਂ ਨੇ ਆਪਣੇ ਵਿਅੰਗਾਤਮਿਕ ਲਹਿਜ਼ੇ ਅਤੇ ਸ਼ਿਅਰੋ-ਸ਼ਾਇਰੀ ਨਾਲ ਸਟੇਜ ਦਾ ਸੰਚਾਲਨ ਬਹੁਤ ਖੂਬ ਕੀਤਾ।
ਮੇਲੇ ਦਾ ਇੱਕ ਹੋਰ ਮੁੱਖ ਆਕਰਸ਼ਣ ਉੱਥੇ ਸਜੇ ਵੱਖ-ਵੱਖ ਸਟਾਲ ਸਨ, ਜੋ ਪੰਜਾਬ ਦੇ ਪੇਂਡੂ ਬਾਜ਼ਾਰਾਂ ਦੀ ਯਾਦ ਦਿਵਾਉਂਦੇ ਸਨ। ਬੀਬੀਆਂ ਵੱਲੋਂ ਲਾਏ ਗਏ ਕੱਪੜਿਆਂ, ਰਵਾਇਤੀ ਫੁਲਕਾਰੀਆਂ ਅਤੇ ਰੰਗ-ਬਰੰਗੇ ਗਹਿਣਿਆਂ ਦੇ ਸਟਾਲਾਂ ’ਤੇ ਔਰਤਾਂ ਦੀ ਭਾਰੀ ਭੀੜ ਰਹੀ, ਜਿੱਥੇ ਉਨ੍ਹਾਂ ਨੇ ਜੰਮ ਕੇ ਖਰੀਦਦਾਰੀ (ਖਰੀਦੋ-ਫਰੋਖਤ) ਕੀਤੀ। ਅੱਖਰਾਂ ਦੀ ਸਾਂਝ ਨੂੰ ਪੀਢਾ ਕਰਦਿਆਂ ਕਿਤਾਬਾਂ ਦੇ ਸ਼ੌਕੀਨਾਂ ਲਈ ‘ਗੁਲਾਟੀ ਪਬਲਿਸ਼ਰਜ਼ ਸਰੀ’ ਵੱਲੋਂ ਸ਼ਾਇਰ ਹਰਦਮ ਸਿੰਘ ਮਾਨ ਨੇ ਪੁਸਤਕਾਂ ਦਾ ਇੱਕ ਬਹੁਤ ਹੀ ਖ਼ੂਬਸੂਰਤ ਸਟਾਲ ਲਾਇਆ। ਮੇਲੇ ਵਿੱਚ ਆਏ ਸਾਹਿਤ ਪ੍ਰੇਮੀਆਂ ਨੇ ਪੰਜਾਬੀ ਸਾਹਿਤ ਅਤੇ ਇਤਿਹਾਸ ਨਾਲ ਸਬੰਧਿਤ ਕਿਤਾਬਾਂ ਖਰੀਦਣ ਵਿੱਚ ਵਿਸ਼ੇਸ਼ ਦਿਲਚਸਪੀ ਦਿਖਾਈ।
ਇਸ ਮੇਲੇ ਦੀ ਸਭ ਤੋਂ ਖ਼ਾਸ ਗੱਲ ਪੰਜਾਬੀ ਗੀਤਕਾਰੀ ਦੇ ਉੱਘੇ ਖੋਜੀ ਲੇਖਕ ਅਸ਼ੋਕ ਬਾਂਸਲ ਮਾਨਸਾ ਦਾ ਕੀਤਾ ਗਿਆ ਵਿਸ਼ੇਸ਼ ਸਨਮਾਨ ਸੀ। ਜ਼ਿਕਰਯੋਗ ਹੈ ਕਿ ਅਸ਼ੋਕ ਬਾਂਸਲ ਮਾਨਸਾ ਨੇ ਬੜੀ ਮਿਹਨਤ ਨਾਲ ਖੋਜ ਕਾਰਜ ਕਰਦਿਆਂ ਆਪਣੀਆਂ ਦੋ ਨਿਵੇਕਲੀਆਂ ਪੁਸਤਕਾਂ ‘ਮਿੱਟੀ ਨੂੰ ਫਰੋਲ ਜੋਗੀਆ’ ਅਤੇ ‘ਲੱਭ ਜਾਣਗੇ ਲਾਲ ਗੁਆਚੇ’ ਰਾਹੀਂ ਪੰਜਾਬੀ ਸੰਗੀਤ ਜਗਤ ਦੇ ਉਨ੍ਹਾਂ ਪੁਰਾਣੇ, ਅਣਗੌਲੇ ਅਤੇ ‘ਗੁਆਚੇ ਲਾਲਾਂ’ (ਗੀਤਕਾਰ ਹੀਰਿਆਂ) ਨੂੰ ਮੁੜ ਸੁਰਖੀਆਂ ਵਿੱਚ ਲਿਆਂਦਾ ਹੈ, ਜਿਨ੍ਹਾਂ ਨੇ ਪੰਜਾਬੀ ਮਾਂ-ਬੋਲੀ ਦੀ ਝੋਲੀ ਅਮੀਰ ਕੀਤੀ। ਇਸ ਮੌਕੇ ਸਨਮਾਨ ਗ੍ਰਹਿਣ ਕਰਦਿਆਂ ਭਾਵੁਕ ਸ਼ਬਦਾਂ ਵਿੱਚ ਅਸ਼ੋਕ ਬਾਂਸਲ ਨੇ ਕਿਹਾ ਕਿ ਸੱਤ ਸਮੁੰਦਰੋਂ ਪਾਰ ਵਿਦੇਸ਼ਾਂ ਦੀ ਧਰਤੀ ’ਤੇ ਅਜਿਹੇ ਰੰਗਲੇ ਸੱਭਿਆਚਾਰਕ ਮੇਲੇ ਕਰਵਾਉਣਾ ਪੰਜਾਬੀਆਂ ਲਈ ਬਹੁਤ ਹੀ ਖੁਸ਼ੀ, ਮਾਣ ਅਤੇ ਫ਼ਖਰ ਵਾਲੀ ਗੱਲ ਹੈ।
ਮੇਲੇ ਨੂੰ ਸਫ਼ਲ ਬਣਾਉਣ ਲਈ ਪ੍ਰਬੰਧਕਾਂ ਵੱਲੋਂ ਹਰ ਪੱਖੋਂ ਬਹੁਤ ਹੀ ਸੁਚੱਜੇ ਅਤੇ ਸ਼ਾਨਦਾਰ ਇੰਤਜ਼ਾਮ ਕੀਤੇ ਗਏ ਸਨ। ਇਸ ਮੌਕੇ ਸਮੂਹ ਆਏ ਹੋਏ ਕਲਾਕਾਰਾਂ ਨੂੰ ਸੱਭਿਆਚਾਰਕ ਯਾਦਗਾਰੀ ਚਿੰਨ੍ਹ ਦੇ ਕੇ ਨਿਵਾਜਿਆ ਗਿਆ।
