● ਰੇਡੀਓ ਇੰਡੀਆ ਕਨਕਲੇਵ ਨੇ ਇਕੱਠ ਦੇ ਰਿਕਾਰਡ ਤੋੜੇ-ਬਰੈਂਡਾ ਲੌਕ ਦਾ ਆਇਰਨ ਲੇਡੀ ਦੇ ਖਿਤਾਬ ਨਾਲ ਸਨਮਾਨ-
ਸਰੀ (ਬਲਦੇਵ ਸਿੰਘ ਭੰਮ)-ਸਰੀ ਦੀਆਂ ਮਿਉਂਸੀਪਲ ਚੋਣਾਂ ਵਿੱਚ ਇਸ ਵਾਰ ਸਲੇਟਾਂ ਤੇ ਉਮੀਦਵਾਰਾਂ ਦੀ ਬਹੁਤਾਤ ਅਤੇ ਸੂਬਾਈ ਚੋਣਾਂ ਦੇ ਘੜਮੱਸ ਕਾਰਨ ਜਦੋਂ ਸਿਆਸੀ ਸਮੀਕਰਨ ਉਲਝੇ ਹੋਏ ਵਿਖਾਈ ਦੇ ਰਹੇ ਸਨ ਤਾਂ ਅਜਿਹੇ ਵਿੱਚ ਰਾਜਸੀ ਨਿਤਾਰੇ ਲਈ ਬੀਤੀ 4 ਅਕਤੂਬਰ ਦਿਨ ਐਤਵਾਰ ਦੀ ਸ਼ਾਮ ਨੂੰ ਸਾਊਥ ਏਸ਼ੀਅਨ ਭਾਈਚਾਰੇ ਦੀ ਆਵਾਜ਼ ਬਣਕੇ ਨਿੱਤਰਦੇ ਆ ਰਹੇ ਸਭ ਤੋਂ ਪੁਰਾਣੇ ਮੀਡੀਆ ਅਦਾਰਾ ‘ਰੇਡੀਓ ਇੰਡੀਆ’ ਵੱਲੋਂ ਸਥਾਨਕ ਬੰਬੇ ਬੈਂਕੁਟ ਹਾਲ ਦੇ ਦੋਨੋਂ ਹਾਲਾਂ ਵਿਚ ਇੱਕ ਵਿਸ਼ਾਲ ਸੰਮੇਲਨ ਦਾ ਆਯੋਜਨ ਕੀਤਾ ਗਿਆ। ਇਸ ਸਮਾਗਮ ਦੌਰਾਨ ਮੇਅਰ ਉਮੀਦਵਾਰ ਬਰੈਂਡਾ ਲੌਕ ਦੀ ਅਗਵਾਈ ਵਾਲੀ ਸਰੀ ਕੁਨੈਕਟ ਸਲੇਟ ਨੂੰ ਮਿਲੇ ਭਾਰੀ ਸਮਰਥਨ ਨੇ ਰਾਜਸੀ ਪੰਡਤਾਂ ਦੀਆਂ ਕਿਆਸਰਾਈਆਂ ਤੋਂ ਧੁੰਦ ਹਟਾ ਦਿੱਤੀ। ਸੰਮੇਲਨ ਦੌਰਾਨ ਸਰੀ ਦੇ ਚੋਣ ਇਤਿਹਾਸ ਚ ਪਹਿਲੀ ਵਾਰ ਇੱਕ ਵੱਡੇ ਇਕੱਠ ਨੇ ਹਾਜ਼ਰੀ ਲੁਆਕੇ ਜਿੱਥੇ ਰੇਡੀਓ ਇੰਡੀਆ ਪ੍ਰਤੀ ਆਪਣੇ ਸਨੇਹ ਨੂੰ ਸਾਬਤ ਕਰ ਵਿਖਾਇਆ ਉੱਥੇ ਬਰੈਂਡਾ ਲੌਕ ਅਤੇ ਉਨ੍ਹਾਂ ਦੀ ਟੀਮ ਦੇ ਹੌਸਲਿਆਂ ਨੂੰ ਵੀ ਨਵੀਂ ਪ੍ਰਵਾਜ਼ ਦਿੱਤੀ । ਇੱਕ ਵੱਡੇ ਇਕੱਠ ਸਦਕਾ ਸ਼ਾਮ 6 ਵਜੇ ਤੋਂ 8 ਵਜੇ ਤੱਕ ਲਈ ਉਲੀਕੇ ਇਸ ਸਮਾਗਮ ਦੀ ਸਮਾਪਤੀ ਰਾਤ 11 ਵਜੇ ਸੰਭਵ ਹੋ ਸਕੀ। ਇਸ ਮੌਕੇ ਆਪਣੇ ਸੰਬੋਧਨ ਦੌਰਾਨ ਲਿਬਰਲ ਐਮ ਪੀ ਸੁਖ ਧਾਲੀਵਾਲ, ਐਮ ਪੀ ਗੁਰਬਖਸ਼ ਸਿੰਘ ਸੈਣੀ ਤੇ ਸਾਬਕਾ ਐਮ ਪੀ ਗੁਰਮੰਤ ਗਰੇਵਾਲ ਨੇ ਆਪਣੇ ਸੰਬੋਧਨ ਦੌਰਾਨ ਜਿਥੇ ਸਮਾਜਿਕ ਤੇ ਰਾਜਨੀਤਕ ਖੇਤਰ ਵਿੱਚ ਨਿਭਾਈ ਧੜੱਲੇਦਾਰ ਭੂਮਿਕਾ ਲਈ ਅਦਾਰਾ ‘ਰੇਡੀਓ ਇੰਡੀਆ’ ਅਤੇ ਇਸਦੇ ਮੈਨੇਜਿੰਗ ਡਾਇਰੈਕਟਰ ਮਨਿੰਦਰ ਸਿੰਘ ਗਿੱਲ ਦੀ ਸ਼ਲਾਘਾ ਕੀਤੀ ਉਥੇ ਬਤੌਰ ਮੇਅਰ ਬਰੈਂਡਾ ਲੌਕ ਦੀ ਬੀਤੇ 4 ਸਾਲਾਂ ਦੀ ਕਾਰਗੁਜ਼ਾਰੀ ਅਤੇ ਸ਼ਹਿਰ ਦੇ ਵਿਕਾਸ ਲਈ ਕੀਤੇ ਕਾਰਜਾਂ ਦੀ ਸਰਾਹਨਾ ਕਰਦਿਆਂ ਲੋਕਾਂ ਨੂੰ ਬਰੈਂਡਾ ਲੌਕ ਵਰਗੀ ਸਖਸ਼ੀਅਤ ਨੂੰ ਮੁੜ ਮੌਕਾ ਦੇਣ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਲੀਡਰ ਸਿਰਫ ਉਹੀ ਨਹੀਂ ਹੁੰਦਾ ਜੋ ਜਲਦੀ ਫੈਸਲਾ ਲੈਂਦਾ ਹੋਵੇ ਸਗੋਂ ਅਸਲ ਲੀਡਰ ਉਹ ਹੁੰਦਾ ਹੈ ਜੋ ਲੋਕ ਹਿਤ ਲਈ ਚਣੌਤੀਆਂ ਨਾਲ ਜੂਝਣ ਦਾ ਜਜ਼ਬਾ ਰੱਖਦਾ ਹੋਵੇ। ਇਸ ਮੌਕੇ ਸਾਬਕਾ ਮੰਤਰੀ ਡਾ. ਗੁਲਜ਼ਾਰ ਸਿੰਘ ਚੀਮਾ ਨੇ ਆਪਣੇ ਖ਼ਰੇ ਸੁਭਾਅ ਅਨੁਸਾਰ ਕਿਹਾ ਕਿ ਪ੍ਰਵਾਸੀ ਪੰਜਾਬੀ ਭਾਈਚਾਰੇ ਨੂੰ ਅੱਗੇ ਵਧਣ ਦੀ ਰਫ਼ਤਾਰ ਕਾਇਮ ਰੱਖਦਿਆਂ ਆਪਣੀ ਵੱਖਰੀ ਪਹਿਚਾਣ ਅਤੇ ਸਵੈਮਾਨ ਨੂੰ ਵੀ ਜਿਉਂਦਾ ਰੱਖਣ ਦੀ ਲੋੜ ਹੈ। ਉਨ੍ਹਾਂ ਮੇਅਰ ਵਜੋਂ ਬਰੈਂਡਾ ਲੌਕ ਅਤੇ ਟੀਮ ਨੂੰ ਆਪਣਾ ਸਮਰਥਨ ਦਿੰਦਿਆ ਸ਼ੁਭਕਾਮਨਾਵਾਂ ਦਿੱਤੀਆਂ। ਉਹਨਾਂ ਮੇਅਰ ਬਰੈਂਡਾ ਲੌਕ ਵਲੋਂ ਛੋਹੇ ਗਏ ਕੰਮਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਸਰੀ ਸ਼ਹਿਰ ਲਈ ਉਹ ਇਕ ਬੇਹਤਰ ਆਗੂ ਹੈ ਇਸ ਲਈ ਉਸਨੂੰ ਚਾਰ ਸਾਲ ਹੋਰ ਦੇਣ ਦੀ ਲੋੜ ਹੈ। ਰੇਡੀਓ ਦੇ ਮੈਨਜਿੰਗ ਡਾਇਰੈਕਟਰ ਮਨਿੰਦਰ ਸਿੰਘ ਗਿੱਲ ਨੇ ਸਮਾਗਮ ਚ ਪੁੱਜੀਆਂ ਹੋਰ ਨਾਮੀ ਸਖਸ਼ੀਅਤਾਂ ਦੇ ਨਾਲ-ਨਾਲ ਮੇਅਰ ਬਰੈਂਡਾ ਲੌਕ ਤੇ ਉਨ੍ਹਾਂ ਦੀ ਸਮੁੱਚੀ ਟੀਮ ਨੂੰ ਜੀ ਆਇਆਂ ਕਹਿੰਦਿਆਂ ਹਾਜ਼ਰੀਨ ਨੂੰ ਅਪੀਲ ਕੀਤੀ ਕਿ ਪਿਛਲੇ ਚਾਰ ਸਾਲਾਂ ‘ਚ ਬਰੈਂਡਾ ਲੌਕ ਤੇ ਉਨ੍ਹਾਂ ਦੀ ਟੀਮ ਵੱਲੋਂ ਸਰੀ ਦੇ ਵਿਕਾਸ ਲਈ ਸ਼ਾਨਦਾਰ ਸੇਵਾਵਾਂ ਦੇਣ ਅਤੇ ਸ਼ਹਿਰ ਦੀ ਦਿੱਖ ਸੁਧਾਰਨ ਬਦਲੇ ਦੁਬਾਰਾ ਮੌਕਾ ਦੇਣ। ਬਰੈਂਡਾ ਲੌਕ ਨੂੰ ਆਇਰਨ ਲੇਡੀ ਦਾ ਖਿਤਾਬ ਦਿੰਦਿਆਂ ਗਿੱਲ ਨੇ ਪਿਛਲੇ ਕਰੀਬ 3 ਦਹਾਕਿਆਂ ਤੋਂ ਲਟਕਦੇ ਆ ਰਹੇ ਸਰੀ ਦੇ ਵਿਕਾਸ ਕਾਰਜ ਸਿਰੇ ਲਗਾਉਣ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ ਤੇ ਰੇਡੀਓ ਇੰਡੀਆ ਵੱਲੋਂ ਮੁਕੰਮਲ ਸਮਰਥਨ ਦਾ ਭਰੋਸਾ ਦਿੱਤਾ।
ਇਸ ਮੌਕੇ ਸ਼ਾਇਰ ਸੁਖਬੀਰ ਸਿੰਘ ਸੰਧੂ ਦੀ ਪੁਸਤਕ ਪਾਇਲ ਵੀ ਰੀਲੀਜ਼ ਕੀਤੀ ਗਈ। ਇਸ ਮੌਕੇ ਨੂੰ ਰੀਲੀਜ ਕਰਨ ਦੀ ਰਸਮ ਮੇਅਰ ਬਰੈਂਡਾ ਲੌਕ, ਐਮ ਪੀ ਸਾਹਿਬਾਨ,ਰੇਡੀਓ ਇੰਡੀਆ ਦੀ ਟੀਮ ਅਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਅਹੁਦੇਦਾਰਾਂ ਵਲੋਂ ਨਿਭਾਈ ਗਈ।
ਸਮਾਗਮ ਦੌਰਾਨ ਮੰਚ ਸੰਚਾਲਕ ਦੀ ਜਿੰਮੇਵਾਰੀ ਉੱਘੇ ਬੈਰਿਸਟਰ ਤੇ ਸੋਲੀਸਿਟਰ ਲਵਲੀਨ ਸਿੰਘ ਗਿੱਲ ਨੇ ਬਹੁਤ ਖੂਬਸੂਰਤੀ ਨਾਲ ਨਿਭਾਈ। ਅਦਾਰਾ ਰੇਡੀਓ ਇੰਡੀਆ ਨੂੰ ਭਾਈਚਾਰੇ ਦੇ ਹਿਤਾਂ ਦਾ ਪਹਿਰੇਦਾਰ ਦੱਸਦਿਆਂ ਉਨ੍ਹਾਂ ਮਨਿੰਦਰ ਸਿੰਘ ਗਿੱਲ ਵੱਲੋਂ ਬੀਤੇ ਵਿੱਚ ਪ੍ਰਵਾਸੀ ਭਾਈਚਾਰੇ ਦੀ ਬਿਹਤਰੀ ਲਈ ਬੀਤੇ ਵਿੱਚ ਕੀਤੇ ਵੱਡੇ ਕਾਰਜਾਂ ਦਾ ਵਰਨਣ ਕੀਤਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸ਼ੱਬਾ ਹੁੰਦਲ, ਬੂਟਾ ਸਿੰਘ ਢਿੱਲੋਂ, ਬਲਬੀਰ ਸਿੰਘ ਪੱਡਾ, ਬਲਬੀਰ ਸਿੰਘ ਬੋਪਾਰਾਏ, ਰਣਜੀਤ ਸਿੰਘ ਵਾਲੀਆ, ਗੁਰਦੁਆਰਾ ਦਸਮੇਸ਼ ਦਰਬਾਰ ਤੋਂ ਬਲਜੀਤ ਸਿੰਘ ਸਮਰਾ, ਅਵਤਾਰ ਸਿੰਘ ਜੌਹਲ, ਭੁਪਿੰਦਰ ਸਿੰਘ ਜੌਹਲ, ਗੁਰਦੁਆਰਾ ਗੁਰੂ ਨਾਨਕ ਸਿੱਖ ਟੈਂਪਲ ਤੋਂ ਮਨਰੂਪ ਸਿੰਘ ਅਤੇ ਹੋਰ ਅਹੁਦੇਦਾਰ, ਸਿੰਘ ਸਭਾ ਗੁਰਦੁਆਰਾ ਤੋਂ ਗੁਰਮੀਤ ਸਿੰਘ ਧਾਲੀਵਾਲ, ਰੁਪਿੰਦਰਜੀਤ ਸਿੰਘ ਕਾਹਲੋਂ ਤੇ ਸਾਥੀ, ਵਰਲਡ ਸਿੱਖ ਆਰਗੇਨਾਈਜੇਸ਼ਨ ਤੋਂ ਪ੍ਰੇਮ ਸਿੰਘ ਵਿਨਿੰਗ, ਅਵਤਾਰ ਸਿੰਘ ਸੰਧੂ, ਦਮਦਮੀ ਟਕਸਾਲ ਤੋਂ ਅਵਤਾਰ ਸਿੰਘ ਸੰਧਰ, ਬਲਵਿੰਦਰ ਸਿੰਘ, ਮਮਤਾ ਫਾਊਂਡੇਸ਼ਨ ਤੋਂ ਮੱਖਣ ਸਿੰਘ ਟੁੱਟ, ਜਨਤਾ ਸੇਵਕ ਸੁਸਾਇਟੀ ਤੋਂ ਬਲਬੀਰ ਕੌਰ ਬਖਸ਼ੀ, ਸਰਬਜੀਤ ਸਿੰਘ ਬੈਂਸ, ਅਰਵਿੰਦਰ ਬੱਬਰ, ਪੰਜਾਬੀ ਮਾਰਕੀਟ ਸਰੀ ਡੈਲਟਾ ਦੇ ਪ੍ਰਧਾਨ ਅਮਰਜੀਤ ਸਿੰਘ ਸਮਰਾ, ਪਾਕਿਸਤਾਨ ਮੁਸਲਿਮ ਲੀਗ ਐਸੋਸੀਏਸ਼ਨ, ਪਾਕਿਸਤਾਨ ਕਲਚਰਲ ਐਸੋਸੀਏਸ਼ਨ, ਪਾਕਿਸਤਾਨ ਕੈਨੇਡਾ ਐਸੋਸੀਏਸ਼ਨ, ਹਿੰਦੂ ਮੰਦਿਰ ਐਸੋਸੀਏਸ਼ਨਾਂ, ਵੱਖ-ਵੱਖ ਖੇਡ ਸੰਸਥਾਵਾਂ, ਸਮਾਜਿਕ ਸੰਸਥਾਵਾਂ ਅਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਉਤਰੀ ਅਮਰੀਕਾ ਦੇ ਪ੍ਰਧਾਨ ਪ੍ਰਿਤਪਾਲ ਸਿੰਘ ਗਿੱਲ, ਸੁਰਜੀਤ ਸਿੰਘ ਮਾਧੋਪੁਰੀ, ਜਸਮੇਰ ਸਿੰਘ ਕੁਲਾਰ ਕਲੋਨਾ, ਮਨਜੀਤ ਸਿੰਘ ਬਹੁਗਨ, ਹਰਜੀਤ ਸਿੰਘ ਗਿੱਲ, ਹਰਕੀਰਤ ਸਿੰਘ ਕੁਲਾਰ, ਡਾ ਜਸਵੀਰ ਸਿੰਘ ਰੋਮਾਣਾ, ਕੁਲਵੰਤ ਸਿੰਘ ਢੇਸੀ, ਜਗਮੋਹਣ ਸਿੰਘ ਅਤੇ ਵੱਡੀ ਗਿਣਤੀ ਵਿੱਚ ਮੀਡੀਆ ਨਾਲ ਸਬੰਧਿਤ ਸ਼ਖਸ਼ੀਅਤਾਂ ਵੀ ਮੌਜੂਦ ਸਨ।
