ਪੁਰਾਤਨ ਵਸਤਾਂ ਨਾਲ ‘ਸੈਲਫੀਆਂ’ ਲੈਣ ਚ ਮਸ਼ਰੂਫ਼ ਰਹੀਆਂ ਬਹੁਤ ਗਿਣਤੀ ਮੁਟਿਆਰਾਂ-
ਕਈ ਘੰਟਿਆਂ ਤੱਕ ਸਿਰਜਿਆ ਰਿਹਾ ਰੌਣਕਮਈ ਮਾਹੌਲ-ਮੇਲਾ ਪ੍ਰਬੰਧਕ ਧਰਮਵੀਰ ਧਾਲੀਵਾਲ ਤੇ ਟੀਮ ਵਲੋਂ ਮੇਲੇ ਦੀ ਸਫਲਤਾ ਲਈ ਧੰਨਵਾਦ-
ਵੈਨਕੂਵਰ, 10 ਅਗਸਤ (ਮਲਕੀਤ ਸਿੰਘ)- ਪੰਜਾਬ ਦੇ ਪੁਰਾਤਨ ਵਿਰਸੇ ਨੂੰ ਵਿਦੇਸ਼ਾਂ ਚ ਪ੍ਰਫੁੱਲਤ ਰੱਖਣ ਲਈ ਯਤਨਸ਼ੀਲ ‘ਵਿਰਸਾ ਫਾਊਂਡੇਸ਼ਨ’ ਵੱਲੋਂ ਪੰਜਾਬੀ ਭਾਈਚਾਰੇ ਦੇ ਸਾਂਝੇ ਉੱਦਮ ਸਦਕਾ ਨੌਵਾਂ ਸਲਾਨਾ ‘ਮੇਲਾ ਵਿਰਸੇ ਦਾ’ ਬੀਤੀ ਸ਼ਾਮ ਆਪਣੀਆਂ ਅਮਿੱਟ ਯਾਦਾਂ ਛੱਡਦਾ ਹੋਇਆ ਸੰਪੰਨ ਹੋ ਗਿਆ । ਖੂਬਸੂਰਤ ਸ਼ਹਿਰ ਐਬਸਫੋਰਡ ਦੇ ਬਾਹਰਵਾਰ ਕੁਦਰਤੀ ਸੁਹੱਪਣ ਨਾਲ ਭਰਪੂਰ ਰਮਣੀਕ ਪਹਾੜਾਂ ਦੀ ਗੋਦ ਚ ਮੌਜੂਦ ਹਰਿਆਵਲੇ ਖੇਤਾਂ ਚ ਮਨਾਏ ਇਸ ਮੇਲੇ ਚ ਵੱਡੀ ਗਿਣਤੀ ਚ ਪੁੱਜੀਆਂ ਔਰਤਾਂ ਵੱਲੋਂ ਜਿੱਥੇ ਕਿ ਮੇਲੇ ਚ ਪੁੱਜੇ ਵੱਖ-ਵੱਖ ਗਾਇਕਾਂ, ਗਾਇਕਾਂਵਾਂ ਅਤੇ ਹੋਰਨਾਂ ਕਲਾਕਾਰਾਂ ਦੀਆਂ ਸੱਭਿਆਚਾਰਕ ਵੰਨਗੀਆਂ ਦਾ ਆਨੰਦ ਮਾਣਿਆ ਗਿਆ, ਉੱਥੇ ਉਹਨਾਂ ਨੂੰ ਪੰਜਾਬ ਦੇ ਪੁਰਾਤਨ ਵਿਰਸੇ ਨਾਲ ਜੁੜੀਆਂ ਅਤੇ ਹੁਣ ਅਲੋਪ ਹੋ ਰਹੀਆਂ ਚੀਜ਼ਾਂ ਨੂੰ ਅੱਖੀ ਵੇਖਣ ਦਾ ਮੌਕਾ ਵੀ ਮਿਲਿਆ| ਦੁਪਹਿਰ 1 ਵਜੇ ਤੋਂ ਸ਼ਾਮੀ 6 ਵਜੇ ਤੱਕ ਨਿਰੰਤਰ ਚੱਲੇ ਇਸ ਮੇਲੇ ਦੀ ਆਰੰਭਤਾ ਦਸਮੇਸ਼ ਸਕੂਲ ਦੇ ਬੱਚਿਆਂ ਵੱਲੋਂ ਧਾਰਮਿਕ ਸ਼ਬਦ ਗਾ ਕੇ ਕੀਤੀ ਗਈ। ਉਪਰੰਤ ਇਸ ਸਕੂਲ ਦੀ ਬੱਚੀ ਜਪਜੀ ਵੱਲੋਂ ‘ਮਾਂ ਬੋਲੀ ਮੇਰੀ ਪੰਜਾਬੀ’ ਕਵਿਤਾ ਸੁਣਾ ਕੇ ਸਰੋਤਿਆਂ ਦੀ ਵਾਹ ਵਾਹ ਖੱਟੀ ਗਈ| ਇਸ ਮਗਰੋਂ ਪੰਜਾਬੀ ਮੁਟਿਆਰ ਗੁਰਦੇਵ ਕੌਰ ਵੱਲੋਂ ਪੰਜਾਬ ਦੇ ਪੁਰਾਤਨ ਲੋਕ ਸਾਜ ‘ਅਲਗੋਜੇ’ ਅਤੇ ‘ਵੰਜਲੀ’ ਦੀ ਪੇਸ ਕੀਤੀ ਸੁਰੀਲੀ ਆਵਾਜ਼ ਹਾਜ਼ਰ ਸਰੋਤਿਆਂ ਦੀ ਰੂਹ ਨੂੰ ਧੁਰ ਤੱਕ ਮੰਤਰ ਮੁਗਧ ਕਰਦੀ ਮਹਿਸੂਸ ਹੋਈ| ਇਸ ਉਪਰੰਤ ਮੇਲੇ ਦਾ ਰੰਗਾਰੰਗ ਮਾਹੌਲ ਜਾਰੀ ਰੱਖਦਿਆਂ ਨੌਜਵਾਨ ਗਾਇਕਾ ਸੁਰਲੀਨਾ ਅਤੇ ਉਸਦੀਆਂ ਸਾਥਣਾ ਵੱਲੋਂ ਪੁਰਾਤਨ ਗੀਤ ‘ ਚੰਨ ਵੇ ਕਿ ਸ਼ੌਂਕਣ ਮੇਲੇ ਦੀ’ ਅਤੇ ‘ਗਲੀ ਗਲੀ ਵਣਜਾਰਾ ਫਿਰਦਾ’ ਪੇਸ਼ ਕਰਕੇ ਪੰਜਾਬ ਦੇ ਪੁਰਾਤਨ ਸੰਗੀਤਕ ਮਾਹੌਲ ਨੂੰ ਤਾਜ਼ਾ ਕਰਵਾ ਦਿੱਤਾ ਗਿਆ| ਇਸ ਮਗਰੋਂ ਕੈਸ਼ ਅਤੇ ਪੈਨ ਚਾਹਲ, ਸ਼ਾਂਤੀ ਥੰਮਣ ਅਤੇ ਮਨਜੀਤ ਉੱਪਲ, ਜਸ ਗਰੇਵਾਲ ਅਤੇ ਰਜਿੰਦਰ ਕੌਰ ਦੀਆਂ ਜੋੜੀਆਂ ਵੱਲੋਂ ਪੁਰਾਤਨ ਗੀਤਾਂ ਤੇ ਕੀਤੀ ਗਈ ਪੇਸ਼ਕਾਰੀ ਬਾ ਕਮਾਲ ਸੀ| ਡਾਂਸ ਅਕੈਡਮੀ ਦੀਆਂ ਮੁਟਿਆਰਾਂ ਵੱਲੋਂ ਪੇਸ਼ ਕੀਤੇ ਗਏ ਗਿੱਧੇ ਅਤੇ ਅਨਮੋਲ ਰਤਨ ਦੀ ਟੀਮ ਵੱਲੋਂ ਪੇਸ਼ ਕੀਤੇ ਭੰਗੜੇ ਦੀ ਤਾਲ ਤੇ ਉੱਥੇ ਹਾਜ਼ਰ ਮੁਟਿਆਰਾਂ ਅਤੇ ਔਰਤਾਂ ਦੇ ਪੈਰ ਥਿਰਕਦੇ ਨਜ਼ਰੀਂ ਆਏ| ਮੇਲੇ ਦੌਰਾਨ ਉਭਰਦੇ ਗਾਇਕ ਸਿਮਰ ਦਿਓਲ ,ਏਕ ਨੂਰ ਧਾਲੀਵਾਲ, ਅਤੇ ਉੱਘੀ ਗਾਇਕਾ ਦੀਪ ਕੌਰ ਵੱਲੋਂ ਵੀ ਆਪਣੇ ਸੁਰੀਲੀਆ ਆਵਾਜ਼ਾਂ ਨਾਲ ਪੜਾਵਾਰ ਹਾਜਰੀ ਲਗਾਈ ਗਈ| ਅਖੀਰ ਚ ਪੰਜਾਬ ਦੀ ਪ੍ਰਸਿੱਧ ਲੋਕ ਗਾਇਕਾ ਕਮਲਜੀਤ ਨੀਰੂ ਵੱਲੋਂ ਆਪਣੇ ਹੋਰਨਾਂ ਗੀਤਾਂ ਤੋਂ ਇਲਾਵਾ ਚਰਚਿਤ ਗੀਤ ‘ਰੂੜਾ ਮੰਡੀ ਜਾਵੇ’ ਅਤੇ ‘ਸੀਟੀ ਤੇ ਸੀਟੀ ਵੱਜੇ’ ਪੇਸ਼ ਕੀਤਾ ਗਿਆ ਤਾਂ ਮੇਲੇ ਚ ਮੌਜੂਦ ਸੈਂਕੜੇ ਮੁਟਿਆਰਾਂ ਸਟੇਜ ਮੂਹਰੇ ਆਪ ਮੁਹਾਰੇ ਨੱਚਦੀਆਂ ਨਜ਼ਰੀ ਆਈਆਂ| ਮੇਲੇ ਦੌਰਾਨ ਪ੍ਰਬੰਧਕਾਂ ਵੱਲੋਂ ਪੁਰਾਤਨ ਦਿੱਖ ਪੇਸ਼ ਕਰਨ ਲਈ ਬੜੀ ਹੀ ਸਿਆਣਪ ਨਾਲ ਪੰਜਾਬੀ ਸੱਭਿਆਚਾਰ ਨਾਲ ਜੁੜੀਆਂ ਪੁਰਾਤਨ ਵਸਤਾਂ ਚਰਖਾ, ਖੂਹ ,ਰਿਕਸ਼ਾ ,ਪੁਰਾਣਾ ਚੁਲਾ ਚੌਂਕਾ, ਪੀਂਘ,ਪੁਰਾਤਨ ਬਰਤਨ ,ਚਾਟੀ ਮਧਾਣੀ, ਸੰਦੂਕ, ਲਲਾਰੀ ਦੀ ਦੁਕਾਨ, ਮੱਛਰਦਾਨੀ,ਪੰਘੂੜਾ ਆਦਿ ਨੂੰ ਬੜੇ ਯੋਜਨਾਬਧ ਤਰੀਕੇ ਨਾਲ ਸਜਾਇਆ ਗਿਆ ਸੀ। ਜਿਸ ਨਾਲ ਮੇਲੇ ਚ ਮੌਜੂਦ ਬਹੁਗਿਣਤੀ ਮੁਟਿਆਰਾਂ ‘ਸੈਲਫੀਆਂ’ ਲੈਣ ਚ ਮਸ਼ਰੂਫ ਨਜ਼ਰੀ ਆਈਆਂ। ਇਸ ਮੇਲੇ ਤੇ ਇੱਕ ਕੋਨੇ ਚ ਆਰਜੀ ਤੌਰ ਤੇ ਬਣਾਏ ਬਾਜ਼ਾਰ ਵਿੱਚੋਂ ਜਿੱਥੇ ਕੇ ਮੇਲੇ ਚ ਆਈਆਂ ਮੁਟਿਆਰਾਂ ਵੱਲੋਂ ਖੂਬ ਖਰੀਦਦਾਰੀ ਕੀਤੀ ਗਈ ਉੱਥੇ ਇੱਕ ਕੋਨੇ ਚ ਨਿਊ ਐਬੀ ਕੁਜੀਨ ਦੀ ਟੀਮ ਵੱਲੋਂ ਪਰੋਸੇ ਗਏ ਸਵਾਦਲੇ ਭੋਜਨ ਦਾ ਵੀ ਸਾਰਿਆਂ ਨੇ ਆਨੰਦ ਮਾਣਿਆ| ਵਿਰਸਾ ਫਾਊ਼ਡੇਸ਼ਨ ਵਲੋਂ ਵੱਖ-ਵੱਖ ਖੇਤਰ ਵਿਚ ਅਹਿਮ ਯੋਗਦਾਨ ਪਾਉਣ ਵਾਲੀਆਂ ਸ਼ਖਸੀਅਤਾਂ ਦਾ ਸਨਮਾਨ ਵੀ ਕੀਤਾ ਗਿਆ। ਇਸ ਮੇਲੇ ਚ ਪੁੱਜੀਆਂ ਪ੍ਰਮੁੱਖ ਹਸਤੀਆਂ ਚ ਨੌਜਵਾਨ ਐਮ ਪੀ ਸੁਖਮਨ ਗਿੱਲ, ਡਾ ਬਲਵਿੰਦਰ ਕੌਰ ਬਰਾੜ , ਬਚਿੰਤ ਕੌਰ ਬਰਾੜ , ਮਨਜੀਤ ਗਿੱਲ,ਸਰੀ ਦੀ ਕੌਂਸਲਰ ਲਿੰਡਾ ਐਨਿਸ, ਕੌਂਸਲਰ ਕੈਲੀ ਚਾਹਲ, ਕੌਂਸਲਰ ਦੇਵ ਸਿੱਧੂ ,ਹਰਕੀਰਤ ਕੌਰ ਚਾਹਲ, ਨਵਜੋਤ ਢਿੱਲੋਂ, ਪ੍ਰਭਜੋਤ ਕਾਹਲੋਂ,ਮੀਰਾ ਗਿੱਲ, ਜਸ ਮਲਕੀਤ, ਜੈਸ ਗਿੱਲ, ਤ੍ਰਿਪਤ ਅਟਵਾਲ, ਜਸਬੀਰ ਮਾਨ, ਪਰਮਿੰਦਰ ਸਵੈਚ, ਬਿੰਦੂ ਮਠਾੜੂ, ਪ੍ਰੋ ਹਰਿੰਦਰ ਕੌਰ ਸੋਹੀ, ਪ੍ਰੀਤਪਾਲ ਪੂਨੀ, ਮਨਜੀਤ ਥਿੰਦ ,ਦਵਿੰਦਰ ਬਚਰਾ ,ਹਰਨੀਤ,ਸਕੂਲ ਟਰੱਸਟੀ ਲਈ ਉਮੀਦਵਾਰ ਅਰਸ਼ ਕਲੇਰ, ਉੱਘੇ ਰੇਡੀਓ ਤੇ ਟੀਵੀ ਹੋਸਟ ਕੁਲਦੀਪ ਸਿੰਘ, ਭੰਗੜਾ ਕੋਚ ਜਸਵੀਰ ਸਿੰਘ , ਮੋਹਨ ਬਚਰਾ, ਜਤਿੰਦਰ ਜੇ ਮਿਨਹਾਸ, ਹਰਕੀਰਤ ਸਿੰਘ ਪੰਜਾਬ ਗਾਰਡੀਅਨ, ਮਹੇਸ਼ਇੰਦਰ ਮਾਂਗਟ, ਜਰਨੈਲ ਸਿੰਘ ਖੰਡੋਲੀ ਆਦਿ ਦੇ ਨਾਮ ਜ਼ਿਕਰਯੋਗ ਹਨ| ਮੰਚ ਸੰਚਾਲਨ ਦੀ ਜਿੰਮੇਵਾਰੀ ਬਲਜਿੰਦਰ ਗਿੱਲ ਅਤੇ ਹਰਸ਼ਰਨ ਧਾਲੀਵਾਲ ਵੱਲੋਂ ਸਾਂਝੇ ਤੌਰ ਤੇ ਬਾਖੂਬੀ ਨਿਭਾਈ ਗਈ। ਅਖੀਰ ਚ ਉਕਤ ਫਾਊਡੇਸ਼ਨ ਦੀ ਪ੍ਰਧਾਨ ਧਰਮਵੀਰ ਧਾਲੀਵਾਲ ਅਤੇ ਉਹਨਾਂ ਦੀ ਸਮੁੱਚੀ ਟੀਮ ਵੱਲੋਂ ਸਾਰਿਆਂ ਦਾ ਧੰਨਵਾਦ ਕੀਤਾ ਗਿਆ|
ਮੇਲੇ ਦੀਆਂ ਵੱਖ ਵੱਖ ਝਲਕੀਆਂ।
