Screenshot
-ਸ਼ਹਿਰ ਦੀਆਂ ਕਈ ਸੜਕਾਂ ਪਾਣੀ ‘ਚ ਡੁੱਬੀਆਂ-
ਵੈਨਕੂਵਰ :-(ਬਰਾੜ-ਭਗਤਾ ਭਾਈ ਕਾ) ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦਾ ਸ਼ਹਿਰ ਐਬਟਸਫੋਰਡ ਭਾਰੀ ਬਾਰਸ਼ ਹੋਣ ਕਾਰਨ ਇੱਕ ਵਾਰ ਫਿਰ ਹੜ੍ਹ ਵਰਗੀ ਸਥਿਤੀ ਦੀ ਮਾਰ ਹੇਠ ਦਿਸਣ ਲੱਗਾ ਹੈ। ਕਈ ਦਿਨਾਂ ਤੋਂ ਲਗਾਤਾਰ ਹੋ ਰਹੀ ਭਾਰੀ ਬਾਰਸ਼ ਨੇ ਸ਼ਹਿਰ ਦੀਆਂ ਕਈ ਨੀਵੀਆਂ ਥਾਂਵਾਂ ਜਲਥਲ ਵਿੱਚ ਬਦਲ ਕੇ ਰੱਖ ਦਿੱਤੀਆਂ ਹਨ। 11 ਨੰਬਰ ਹਾਈਵੇ ਅਤੇ ਗਲੈਡਵਿਨ ਰੋਡ ‘ਤੇ ਪਾਣੀ ਹੀ ਪਾਣੀ ਨਜ਼ਰ ਆ ਰਿਹਾ ਹੈ। ਇਸ ਤੋਂ ਇਲਾਵਾ ਮਾਰਸ਼ਲ ਰੋਡ ਅਤੇ ਸੂਮਸ ਵੇਅ ਦਾ ਕੁਝ ਏਰੀਆਂ ਵੀ ਪਾਣੀ ਨਾਲ ਬੁਰੀ ਤਰਾਂ ਪ੍ਰਭਾਵਤ ਹੋਇਆ ਹੈ ਜਿਸ ਕਰਕੇ ਮਾਰਸ਼ਲ ਰੋਡ ‘ਤੇ ਨੀਵੇਂ ਥਾਂ ਜ਼ਿਆਦਾ ਪਾਣੀ ਭਰਨ ਨਾਲ ਸੜਕ ਬੰਦ ਕਰਨੀ ਪਈ। ਸਥਾਨਿਕ ਸਰਕਾਰ ਵੱਲੋਂ ਨੀਵੀਂਆਂ ਸੜਕਾਂ ‘ਤੇ ਖੜ੍ਹੇ ਪਾਣੀ ਨੂੰ ਕੱਢਣ ਦੀ ਬਜਾਏ ‘ਫਲੱਡਡ ਰੋਡ’ ਦੇ ਫੱਟੇ ਲਾ ਕੇ ਹੀ ਲੋਕਾਂ ਨੂੰ ਸੁਚੇਤ ਕਰਦਿਆਂ ਡੰਗ ਟਪਾਇਆ ਜਾ ਰਿਹਾ ਹੈ।
ਮੌਸਮ ਵਿਭਾਗ ਵੱਲੋਂ ਅਨੁਮਾਨ ਲਾਇਆ ਜਾ ਰਿਹਾ ਹੈ ਕਿ ਅਗਲੇ ਹਫ਼ਤੇ ਇਸ ਤੋਂ ਵੀ ਜ਼ਿਆਦਾ ਬਾਰਸ਼ ਹੋਣ ਕਾਰਨ ਹੜ੍ਹਾਂ ਵਰਗੀ ਸਥਿਤੀ ਪੈਦਾ ਹੋ ਸਕਦੀ ਹੈ।
ਕੁਝ ਸਾਲ ਪਹਿਲਾਂ ਵੀ ਦੋ ਹਫ਼ਤਿਆਂ ਤੋਂ ਵੱਧ ਲਗਾਤਾਰ ਭਾਰੀ ਵਰਖਾ ਹੋਣ ਕਾਰਨ ਅਤੇ ਅਮਰੀਕਾ ਵੱਲੋਂ ਆਏ ਪਾਣੀ ਨੇ ਐਬਟਸਫੋਰਡ ਦੇ ਬਹਤੇ ਇਲਾਕੇ ਪਾਣੀ ਨਾਲ ਭਰ ਗਏ ਸਨ ਜਿਸ ਕਾਰਨ ਬਹੁਤ ਜਿਆਦਾ ਮਾਲੀ ਨੁਕਸਾਨ ਹੋਇਆ ਪਰ ਇਸ ਵਾਰ ਮੌਸਮ ਵੱਲੋਂ ਲਾਏ ਅਨੁਮਾਨ ਕਾਰਨ ਲੋਕ ਪੂਰੀ ਤਰਾਂ ਚੌਕਸ ਹਨ।
