ਗੁਰੂ ਨਾਨਕ ਸਿੱਖ ਗੁਰਦੁਆਰਾ ਸਰੀ-ਡੈਲਟਾ ਸਬੰਧੀ ਸਪੱਸ਼ਟੀਕਰਨ

ਸੰਗਤੀ ਗਰੁੱਪ ਵਲੋਂ ਲਗਾਏ ਦੋਸ਼ਾਂ ਨੂੰ ਮੁੱਢੋਂ ਨਾਕਾਰਿਆ-

ਸਰੀ- ਗੁਰੂ ਨਾਨਕ ਸਿੱਖ ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਨੇ ਬੀਤੀ 29 ਮਾਰਚ ਨੂੰ ਸੰਗਤੀ ਗਰੁੱਪ ਵਲੋਂ ਬੁਲਾਈ ਗਈ ਮੀਟਿੰਗ ਦੌਰਾਨ ਰੌਲਾ ਰੱਪਾ ਪੈਣ, ਪੁਲਿਸ ਦੇ ਦਖਲ ਪਿੱਛੋਂ ਮੀਟਿੰਗ ਖਤਮ ਹੋਣ ਅਤੇ ਸੰਗਤੀ ਗਰੁੱਪ ਵਲੋਂ ਪ੍ਰਬੰਧਕੀ ਕਮੇਟੀ ਉਪਰ ਲਗਾਏ ਗਏ ਦੋਸ਼ਾਂ ਦਾ ਜਵਾਬ ਦਿੰਦਿਆਂ ਇਕ ਪ੍ਰੈਸ ਨੋਟ ਜਾਰੀ ਕੀਤਾ ਹੈ। ਇਸ ਪ੍ਰੈਸ ਨੋਟ ਵਿਚ ਪ੍ਰਬੰਧਕੀ ਕਮੇਟੀ ਨੇ ਸੰਗਤੀ ਗਰੁੱਪ ਉਪਰ ਕਈ ਤਰਾਂ ਦੇ ਦੋਸ਼ ਲਗਾਏ ਹਨ। ਪ੍ਰੈਸ ਨੋਟ ਵਿਚ ਕਿਹਾ ਗਿਆ ਹੈ ਕਿ  ਇਹ ਮੀਟਿੰਗ ਵੱਡੇ ਪੱਧਰ ਮੀਟਿੰਗ ਸੱਦਣ ਵਾਲੇ ਗਰੁੱਪ ਵੱਲੋਂ ਸਾਜਿਸ਼ ਦੇ ਤਹਿਤ ਪੂਰੇ ਪੰਨੇ ਦੇ ਅਖਬਾਰੀ ਇਸ਼ਤਿਹਾਰਾਂ, ਰੇਡੀਓ ਟਾਕ-ਸ਼ੋਅ ਅਤੇ ਸੋਸ਼ਲ ਮੀਡੀਆ ‘ਤੇ ਪੇਡ ਪ੍ਰਚਾਰ ਕਰਕੇ ਸੱਦੀ ਗਈ ਸੀ, ਜਿਨ੍ਹਾਂ ਵਿੱਚ ਮੌਜੂਦਾ ਪ੍ਰਬੰਧਕ ਕਮੇਟੀ ਵਿਰੁੱਧ ਕੁਝ ਬੇਬੁਨਿਆਦ ਆਰੋਪ ਲਗਾਏ ਗਏ ਸਨ। ਇਹ ਆਰੋਪ ਨਿੱਜੀ ਈਰਖਾ ਅਤੇ ਸਿਆਸੀ ਸੋਚ ਤੋਂ ਪ੍ਰੇਰਿਤ ਹੋ ਕੇ ਸੰਗਤ ਵਿੱਚ ਦੁਵਿਧਾ ਪੈਦਾ ਕਰਨ ਲਈ ਲਗਾਏ ਗਏ ਦਿਸਦੇ ਹਨ।
ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸ਼ੁੱਕਰਵਾਰ, 27 ਮਾਰਚ ਨੂੰ ਫੇਸਬੁੱਕ ਅਤੇ ਹੋਰ ਸੋਸ਼ਲ ਮੀਡੀਆ ਮਾਧਿਅਮਾਂ ਰਾਹੀਂ ਸੰਗਤ ਨੂੰ ਪਹਿਲਾਂ ਹੀ ਜਾਣਕਾਰੀ ਦੇ ਦਿੱਤੀ ਗਈ ਸੀ ਕਿ ਜੇ ਕੋਈ ਕਾਨੂੰਨੀ ਜਾਂ ਪ੍ਰਬੰਧਕੀ ਅੜਚਣ ਨਾ ਆਈ, ਤਾਂ ਮੈਂਬਰਸ਼ਿਪ ਡਰਾਈਵ 15 ਜੂਨ ਤੋਂ 15 ਜੁਲਾਈ ਤੱਕ ਖੋਲੀ ਜਾਵੇਗੀ।

ਇਹ ਵੀ ਯਾਦ ਰਹੇ ਕਿ ਅਕਤੂਬਰ 2025 ਵਿੱਚ ਮੈਂਬਰਸ਼ਿਪ ਡਰਾਈਵ ਪੂਰੀ ਪਾਰਦਰਸ਼ਿਤਾ ਅਤੇ ਨਿਯਮਾਂ ਦੇ ਅਨੁਸਾਰ ਸ਼ੁਰੂ ਕੀਤੀ ਗਈ ਸੀ। ਫਾਰਮ ਵੰਡਣ ਦੀ ਪ੍ਰਕਿਰਿਆ ਵੀ ਸੁਚੱਜੇ ਢੰਗ ਨਾਲ ਚੱਲ ਰਹੀ ਸੀ। ਪਰ ਕੁਝ ਵਿਅਕਤੀਆਂ ਵੱਲੋਂ ਬੇਬੁਨਿਆਦ ਇਤਰਾਜ਼ ਉਠਾ ਕੇ ਅਤੇ ਗੁਰਦੁਆਰਾ ਸਾਹਿਬ ਦੇ ਵਕੀਲ ਅਤੇ ਥਰਡ ਪਾਰਟੀ ਵਕੀਲ ਨੂੰ ਚਿੱਠੀਆਂ ਭੇਜ ਕੇ ਇਹ ਪ੍ਰਕਿਰਿਆ ਰੁਕਵਾ ਦਿੱਤੀ ਗਈ। 15 ਫ਼ਰਵਰੀ 2026 ਦੀ ਮੀਟਿੰਗ ਵਿੱਚ ਸੰਗਤ ਦੇ ਨੁਮਾਇੰਦਿਆਂ ਵੱਲੋਂ ਇਹ ਫ਼ੈਸਲਾ ਕੀਤਾ ਗਿਆ ਸੀ ਕਿ ਮੌਜੂਦਾ ਐਗਜ਼ੈਕਟਿਵ ਕਮੇਟੀ ਚੋਣ ਪ੍ਰਕਿਰਿਆ ਨੂੰ ਜਲਦ ਅੱਗੇ ਵਧਾਏ। ਇਹ ਵੀ ਤੈਅ ਹੋਇਆ ਸੀ ਕਿ ਸਰਬਸੰਮਤੀ ਪੂਰੀ ਹੋਣ ਤੋਂ ਬਾਅਦ ਹੀ ਮੈਂਬਰਸ਼ਿਪ ਡਰਾਈਵ ਖੋਲੀ ਜਾਵੇ।

  ਪ੍ਰਬੰਧਕ ਕਮੇਟੀ ਦੀ ਕਾਰਗੁਜ਼ਾਰੀ-

ਜਨਵਰੀ 2019 ਤੋਂ ਲੈ ਕੇ ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਜੀ ਦੀ ਅਗਵਾਈ ਹੇਠ , ਗੁਰੂ ਨਾਨਕ ਸਿੱਖ ਗੁਰਦੁਆਰਾ ਸਾਹਿਬ ਦਾ ਪ੍ਰਬੰਧ ਬਹੁਤ ਹੀ ਸੁਚੱਜੇ, ਪਾਰਦਰਸ਼ੀ ਅਤੇ ਜ਼ਿੰਮੇਵਾਰ ਢੰਗ ਨਾਲ ਚੱਲਦਾ ਆ ਰਿਹਾ ਹੈ। ਇਸ ਦੌਰਾਨ ਸੰਗਤ ਦੇ ਸਹਿਯੋਗ ਨਾਲ ਲਗਭਗ 3.3 ਮਿਲੀਅਨ ਡਾਲਰ ਦਾ ਕਰਜ਼ਾ ਉਤਾਰਿਆ ਗਿਆ, ਜੋ ਕਿ ਸੰਗਤ ਦੇ ਵਿਸ਼ਵਾਸ ਅਤੇ ਪ੍ਰਬੰਧ ਦੀ ਇਮਾਨਦਾਰ ਮਿਹਨਤ ਦਾ ਨਤੀਜਾ ਹੈ। ਇਸੇ ਸਮੇਂ ਵਿੱਚ ਗੁਰਦੁਆਰਾ ਸਾਹਿਬ ਅੰਦਰ ਦੋ-ਮੰਜ਼ਿਲਾ ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਯਾਦਗਾਰੀ ਇਮਾਰਤ ਦੀ ਸੇਵਾ ਕੀਤੀ ਗਈ। ਇਸ ਤੋਂ ਇਲਾਵਾ ਫਰੰਟ ਸਾਈਡ ਵਾਲੇ ਪਾਰਕ ਦੀ ਸੇਵਾ, ਨਵੀਂ ਕਿਚਨ ਦੀ ਤਿਆਰੀ, ਪਾਰਕਿੰਗ ਵਿੱਚ ਲੁੱਕ ਦੀ ਸੇਵਾ, ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਗੇਟ ਅਤੇ ਹੋਰ ਕਈ ਮਹੱਤਵਪੂਰਨ ਕਾਰਜ ਵੀ ਸੰਪੰਨ ਕੀਤੇ ਗਏ। ਖਾਸ ਗੱਲ ਇਹ ਰਹੀ ਕਿ ਇਹ ਸਾਰੇ ਕੰਮ ਬਿਨਾਂ ਕਿਸੇ ਨਵੇਂ ਲੋਨ ਤੋਂ ਕੀਤੇ ਗਏ।

ਇਸ ਤੋਂ ਇਲਾਵਾ, ਜੀ.ਐਨ. ਸਿੱਖ ਪ੍ਰੀ-ਸਕੂਲ ਅਤੇ ਜੀ.ਐਨ. ਸਿੱਖ ਐਲੀਮੈਂਟਰੀ ਸਕੂਲ ਦੀ ਸ਼ੁਰੂਆਤ ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਜੀ ਵੱਲੋਂ ਕੀਤੀ ਗਈ ਸੀ।

ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਜੀ ਦੀ ਸ਼ਹੀਦੀ ਤੋਂ ਬਾਅਦ 2023 ਵਿੱਚ  ਉਹਨਾਂ ਦੀ ਸੋਚ ਮੁਤਾਬਿਕ  ਸਮੂਹ ਸਿੰਘਾਂ ਦੀ ਅਥਾਹ ਮਿਹਨਤ ਨਾਲ ਸਰੀ ਵਿੱਚ ਵੱਡੇ ਪੱਧਰ ‘ਤੇ ਦੋ ਖਾਲਿਸਤਾਨ ਰੈਫਰੈਂਡਮ ਕਰਵਾਏ ਗਏ, ਜੋ ਪੰਥਕ ਪੱਧਰ ‘ਤੇ ਇੱਕ ਮਹੱਤਵਪੂਰਨ ਕਾਰਜ ਸੀ। ਜੀ.ਐਨ. ਸਿੱਖ ਸਕੂਲ ਸਬੰਧੀ, ਏਜੀਐਮ ਵਿੱਚ ਕੀਤੇ ਗਏ ਵਾਅਦੇ ਮੁਤਾਬਕ 22 ਫ਼ਰਵਰੀ 2026 ਨੂੰ ਡਾਇਰੈਕਟਰਾਂ ਦੀ ਮੀਟਿੰਗ ਹੋਈ ਸੀ, ਜਿਸ ਵਿੱਚ 7 ਮਾਰਚ ਨੂੰ ਸੰਗਤੀ ਮੀਟਿੰਗ ਰੱਖਣ ਬਾਰੇ ਵਿਚਾਰ ਹੋਇਆ ਸੀ। ਇਸੇ ਦੌਰਾਨ ਪੰਥਕ ਪੱਧਰ ਦੇ ਅਹਿਮ ਮਸਲਿਆਂ, ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਜੀ ਦੇ ਕੇਸ ਅਤੇ ਭਾਈ ਮਨਿੰਦਰ ਸਿੰਘ ਬੋਇਲ ਨੂੰ ਮਿਲੀ ਧਮਕੀ ਦੇ ਮਾਮਲੇ ਵਿੱਚ ਮਹੱਤਵਪੂਰਨ ਪ੍ਰੈੱਸ ਕਾਨਫਰੰਸ ਕੀਤੀ ਗਈ। ਇਸ ਲਈ ਸਥਾਨਕ ਮਸਲਿਆਂ ਦੇ ਨਾਲ-ਨਾਲ ਪੰਥਕ ਕਾਰਜਾਂ ਵੱਲ ਵੀ ਵਧੇਰੇ ਤਵੱਜੋ ਦੇਣੀ ਪਈ। ਸਕੂਲ ਦੀ ਸੰਗਤੀ ਮੀਟਿੰਗ ਜਲਦੀ ਬੁਲਾਈ ਜਾਵੇਗੀ ਅਤੇ ਉਸ ਦੇ ਢਾਂਚੇ ਬਾਰੇ ਸੰਗਤ ਤੋਂ ਸੁਝਾਅ ਲਏ ਜਾਣਗੇ। 2023 ਤੋਂ ਬਾਅਦ ਰਾਗੀ ਅਤੇ ਢਾਡੀਆਂ ਲਈ ਭੇਜੀਆਂ ਗਈਆਂ ਵੀਜ਼ਾ ਸਪਾਂਸਰਸ਼ਿਪਾਂ ਬਾਰੇ ਜਾਣਕਾਰੀ ਦਫ਼ਤਰ ਤੋਂ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।

. 29 ਮਾਰਚ ਦੀ ਮੀਟਿੰਗ ਦਾ ਘਟਨਾਕ੍ਰਮ–

ਪ੍ਰਬੰਧਕ ਕਮੇਟੀ ਨੇ ਇਹ ਉਚਿਤ ਸਮਝਿਆ ਕਿ ਅਖਬਾਰਾਂ ਵਿੱਚ ਲਗੇ ਆਰੋਪਾਂ ਦਾ ਜਵਾਬ ਸਭ ਤੋਂ ਪਹਿਲਾਂ ਗੁਰੂ ਮਹਾਰਾਜ ਦੀ ਹਾਜ਼ਰੀ ਵਿੱਚ ਮੇਨ ਦਰਬਾਰ ਹਾਲ ਵਿੱਚ ਦਿੱਤਾ ਜਾਵੇ। ਇਸ ਤੋਂ ਬਾਅਦ ਮੀਟਿੰਗ ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਯਾਦਗਾਰੀ ਬਿਲਡਿੰਗ ਵਿੱਚ ਸ਼ੁਰੂ ਕੀਤੀ ਗਈ, ਜਿੱਥੇ ਮੌਜੂਦਾ ਪ੍ਰਬੰਧਕ ਕਮੇਟੀ ਵੱਲੋਂ ਪੂਰਾ ਸਹਿਯੋਗ ਦਿੱਤਾ ਗਿਆ।

ਮੀਟਿੰਗ ਦੌਰਾਨ   ਅਖਬਾਰਾਂ ਅਤੇ ਟੀਵੀ ਚੈਨਲਾਂ ਨਾਲ ਜੁੜੇ ਪੱਤਰਕਾਰ ਮੌਜੂਦ ਸਨ, ਜਿਨ੍ਹਾਂ ਨੂੰ ਮੀਟਿੰਗ ਦੇ ਆਯੋਜਕਾਂ ਵੱਲੋਂ ਸੱਦਾ ਦਿੱਤਾ ਗਿਆ ਸੀ।

ਮੀਟਿੰਗ ਦੌਰਾਨ ਕੁਝ ਬੁਲਾਰਿਆਂ ਦੇ ਸ਼ੁਰੂਆਤੀ ਸ਼ਬਦਾਂ ਤੋਂ ਹੀ ਉਹਨਾਂ ਦੀ ਸੋਚ, ਏਜੰਡਾ ਅਤੇ ਨੀਅਤ ਸੰਗਤ ਸਾਹਮਣੇ ਸਪੱਸ਼ਟ ਹੋ ਗਈ, ਜਿਸ ਨਾਲ ਮਾਹੌਲ ਵਿੱਚ ਤਣਾਅ ਪੈਦਾ ਹੋਇਆ। ਦਿਨ-ਰਾਤ ਸੇਵਾ ਕਰਨ ਵਾਲੇ ਸੇਵਾਦਾਰਾਂ ਖ਼ਿਲਾਫ ਬੋਲੇ ਗਏ ਸ਼ਬਦਾਂ  ਦਾ ਸੰਗਤ ਵੱਲੋਂ ਵਿਰੋਧ ਕੀਤਾ ਗਿਆ।  ਸ਼ਹੀਦ ਭਾਈ ਹਰਦੀਪ ਸਿੰਘ ਨਿੱਝਰ ਤੋਂ ਲੈ ਕਰਕੇ ਗੁਰਦੁਆਰਾ ਸਾਹਿਬ ਵਿਖੇ ਦਿਨ-ਰਾਤ ਆਪਣੇ ਨਿੱਜੀ ਸਮੇਂ ਅਤੇ ਕਾਰੋਬਾਰਾਂ ਵਿਚੋਂ ਸਮਾਂ ਕੱਢ ਕੇ ਸੇਵਾ ਨਿਭਾਉਣ ਵਾਲੇ ਸੇਵਾਦਾਰਾਂ ਪ੍ਰਤੀ ਬਹੁਤ ਹੀ ਅਣਉਚਿਤ ਅਤੇ ਅਪਮਾਨਜਨਕ ਸ਼ਬਦਾਵਲੀ  ਚੋਰ, ਗੁੰਡੇ , ਲੁਚੇ ਆਦਿ ਵਰਤੀ ਗਈ। ਨਾ ਕੇਵਲ ਉਨ੍ਹਾਂ ਦੀ ਸੇਵਾ-ਭਾਵਨਾ ਨੂੰ ਠੇਸ ਪਹੁੰਚਾਈ ਗਈ, ਸਗੋਂ ਉਨ੍ਹਾਂ ਦੇ ਨਿੱਜੀ ਕਾਰੋਬਾਰਾਂ ਅਤੇ ਇੱਜ਼ਤ ਉੱਤੇ ਵੀ ਅਣਚਾਹੀਆਂ ਟਿੱਪਣੀਆਂ ਕੀਤੀਆਂ ਗਈਆਂ। ਇਸ ਤੋਂ ਬਾਅਦ ਮੀਟਿੰਗ ਦੇ ਆਯੋਜਕਾਂ ਨੇ ਖੁਦ ਹੀ ਉਨ੍ਹਾਂ ਤੋਂ ਮਾਈਕ ਵਾਪਸ ਲੈ ਲਿਆ।  ਇਸ ਤੋਂ ਉਪਰੰਤ   ਮੌਜੂਦ ਪੁਲਿਸ ਵੱਲੋਂ ਮੀਟਿੰਗ ਰੱਦ ਕਰਨ ਦਾ ਫ਼ੈਸਲਾ ਲਿਆ ਗਿਆ। ਮੀਟਿੰਗ ਦੇ ਅੰਤ ਵਿੱਚ ਜਨਰਲ ਸਕੱਤਰ ਭਾਈ ਭੁਪਿੰਦਰ ਸਿੰਘ ਹੋਠੀ ਨੇ ਸਮੂਹ ਸੇਵਾਦਾਰਾਂ ਪ੍ਰਤੀ ਵਰਤੀ ਗਈ ਭੱਦੀ ਸ਼ਬਦਾਵਲੀ ਦੀ ਨਿੰਦਾ ਕੀਤੀ। ਉਨ੍ਹਾਂ ਨੇ ਸੰਗਤ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਇਹਨਾਂ ਮਸਲਿਆਂ ਦਾ ਹੱਲ ਟਕਰਾਅ ਨਾਲ ਨਹੀਂ, ਸਗੋਂ ਸੁਹਿਰਦਤਾ, ਗੱਲਬਾਤ ਅਤੇ  ਆਪਸੀ ਤਾਲਮੇਲ ਨਾਲ ਹੀ ਸੰਭਵ ਹੈ।  । ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਸੰਗਤ ਜਦੋਂ ਮਰਜ਼ੀ ਪ੍ਰਬੰਧਕਾਂ ਕੋਲ ਬੈਠ ਕੇ ਕੋਈ ਵੀ ਸਵਾਲ ਜਾਂ ਗੱਲ ਰੱਖ ਸਕਦੀ ਹੈ ਅਤੇ ਪ੍ਰਬੰਧਕ ਕਮੇਟੀ ਸੰਗਤ ਦੀ ਕਚਹਿਰੀ ਵਿੱਚ ਹਮੇਸ਼ਾ ਜਵਾਬ ਦੇਣ ਲਈ ਤਿਆਰ ਰਹੇਗੀ।

 ਸੰਗਤ ਲਈ ਅਪੀਲ-

26 ਮਾਰਚ 2026 ਨੂੰ ਇੱਕ ਰੈਸਟੋਰੈਂਟ ਵਿੱਚ ਹੋਈ ਮੀਟਿੰਗ ਕਾਰਨ ਗੁਰੂ ਨਾਨਕ ਸਿੱਖ ਗੁਰਦੁਆਰਾ ਸਰੀ-ਡੈਲਟਾ ਦੀ ਸ਼ਾਨ, ਸਾਖ ਅਤੇ ਮਰਿਆਦਾ ਨੂੰ ਢਾਹ ਲੱਗੀ। ਜਾਣਕਾਰੀ ਅਨੁਸਾਰ, ਉਸ ਮੀਟਿੰਗ ਵਿੱਚ ਕਈ ਪਤਵੰਤੇ ਸੱਜਣਾਂ ਨੇ ਇਹ ਤਾਕੀਦ ਕੀਤੀ ਸੀ ਕਿ ਗੁਰਦੁਆਰਾ ਪ੍ਰਬੰਧ ਦੀਆਂ ਅੰਦਰੂਨੀ ਗੱਲਾਂ ਬਾਹਰ ਮੀਡੀਆ ਵਿੱਚ ਨਹੀਂ ਜਾਣੀਆਂ ਚਾਹੀਦੀਆਂ। ਇਸ ਦੇ ਬਾਵਜੂਦ, ਅਖਬਾਰਾਂ ਦੇ ਪੂਰੇ ਪੰਨਿਆਂ ‘ਤੇ ਇਹ ਮਾਮਲੇ ਛਪਵਾਉਣਾ ਚਿੰਤਾ ਦਾ ਵਿਸ਼ਾ ਹੈ। ਇਸ ਤਰ੍ਹਾਂ ਦੇ ਬੇਬੁਨਿਆਦ ਅਤੇ ਝੂਠੇ ਮੁੱਦਿਆਂ ਨੂੰ ਇਕੱਠਾ ਕਰਕੇ ਸੰਗਤ ਵਿੱਚ ਦੁਬਿਧਾ ਪੈਦਾ ਕਰਨੀ ਅਤੇ ਪੰਥ ਵਿਰੋਧੀ ਤਾਕਤਾਂ ਨੂੰ ਮੌਕਾ ਦੇਣਾ ਬਹੁਤ ਹੀ ਮੰਦਭਾਗਾ ਹੈ। ਸਮੂਹ ਸਿੰਘ ਪਿਛਲੇ ਲੰਮੇ ਸਮੇਂ ਤੋਂ ਝੂਠੇ ਦੋਸ਼ਾਂ ਅਤੇ ਚੌਤਰਫ਼ਾ ਹਮਲਿਆਂ ਦਾ ਸਾਹਮਣਾ ਕਰਦੇ ਆ ਰਹੇ ਹਨ ਅਤੇ  ਪਰ ਇਸ ਦੇ ਬਾਵਜੂਦ ਗੁਰੂ ਮਹਾਰਾਜ ਦੀ ਕਿਰਪਾ ਸਦਕਾ ਸੇਵਾਵਾਂ ਵਿੱਚ ਹਾਜਰੀ ਭਰਦੇ ਰਹਿਣਗੇ। ਉਹ ਕਿਸੇ ਵੀ  ਸਵਾਲ ਦਾ ਜਵਾਬ ਲਈ ਸੰਗਤ ਦੀ ਕਚਹਿਰੀ ਵਿੱਚ   ਹਾਜ਼ਰ ਹਨ।

ਅੰਤ ਵਿੱਚ, ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸਮੂਹ ਸੰਗਤ ਨੂੰ ਅਪੀਲ ਕਰਦੀ ਹੈ ਕਿ ਗੁਰੂ ਘਰ ਦੀ ਮਰਿਆਦਾ, ਏਕਤਾ ਅਤੇ ਆਪਸੀ ਸਤਿਕਾਰ ਨੂੰ ਕਾਇਮ ਰੱਖਦਿਆਂ ਸੰਵਾਦ ਦੇ ਰਾਹੀਂ ਅੱਗੇ ਵਧਿਆ ਜਾਵੇ। ਗੁਰੂ ਸਾਹਿਬ ਕਿਰਪਾ ਕਰਨ, ਸਾਨੂੰ ਸਾਰਿਆਂ ਨੂੰ ਸੁਮੱਤ ਬਖ਼ਸ਼ਣ ਅਤੇ ਰਲ-ਮਿਲ ਕੇ ਗੁਰੂ ਘਰ ਦੇ ਕਾਰਜ ਕਰਨ ਦਾ ਬਲ ਬਖ਼ਸ਼ਣ।