ਐਬਸਫੋਰਡ -ਮਿਸ਼ਨ ਦੀ 26 ਸਤੰਬਰ ਨੂੰ ਹੋ ਰਹੀ ਜਿਮਨੀ ਚੋਣ ਲਈ ਸੈਂਟਰ ਬੀਸੀ ਦੇ ਉਮੀਦਵਾਰ ਹਨ ਲਖਵਿੰਦਰ ਝੱਜ-
ਮਿਸ਼ਨ ( ਦੇ ਪ੍ਰ ਬਿ)- ਐਬਸਫੋਰਡ-ਮਿਸ਼ਨ ਵਿਧਾਨ ਸਭਾ ਹਲਕੇ ਦੀ 26 ਸਤੰਬਰ ਨੂੰ ਹੋ ਰਹੀ ਜਿਮਨੀ ਚੋਣ ਵਿਚ ਸੈਂਟਰ ਬੀਸੀ ਪਾਰਟੀ ਦੀ ਉਮੀਦਵਾਰ ਲਖਵਿੰਦਰ ਝੱਜ ਦੀ ਚੋਣ ਮੁਹਿੰਮ ਨੂੰ ਉਸ ਸਮੇਂ ਭਰਵਾਂ ਹੁੰਗਾਰਾ ਮਿਲਿਆ ਜਦੋਂ ਸਾਬਕਾ ਵਿੱਤ ਮੰਤਰੀ ਮਾਈਕ ਡੀ ਜੌਂਗ ਨੇ ਉਹਨਾਂ ਦੇ ਚੋਣ ਦਫਤਰ ਵਿਚ ਆਕੇ ਉਹਨਾਂ ਦੀ ਹਮਾਇਤ ਦਾ ਐਲਾਨ ਕਰਦਿਆਂ ਲੋਕਾਂ ਨੂੰ ਝੱਜ ਦੇ ਹੱਕ ਵਿਚ ਵੱਧ ਤੋਂ ਵੱਧ ਵੋਟਾਂ ਪਾਉਣ ਦੀ ਅਪੀਲ ਕੀਤੀ।
ਮਾਈਕ ਡੀ ਜੋਂਗ, ਜੋ ਪਿਛਲੇ ਤਿੰਨ ਦਹਾਕੇ ਦੇ ਸਮੇਂ ਤੋਂ ਐਬਟਸਫੋਰਡ ਖੇਤਰ ਦੀ ਨੁਮਾਇੰਦਗੀ ਕਰਨ ਦੇ ਨਾਲ , ਜਨਤਕ ਸੇਵਾ ਅਤੇ ਸੂਬਾਈ ਸਰਕਾਰ ਵਿੱਚ ਵਿਆਪਕ ਤਜਰਬਾ ਰੱਖਦੇ ਹਨ ਵਲੋਂ ਬੀਸੀ ਸੈਂਟਰ ਉਮੀਦਵਾਰ ਲਖਵਿੰਦਰ ਝੱਜ ਦਾ ਸਮਰਥਨ ਅਜਿਹੇ ਸਮੇਂ ਵਿੱਚ ਆਇਆ ਹੈ ਜਦੋਂ ਉਹ ਸਿਹਤ ਸਹੂਲਤਾਂ ਵਿੱਚ ਸੁਧਾਰ, ਸਕੂਲਾਂ ਦੀ ਸਮਰੱਥਾ ਵਧਾਉਣ, ਕਫਾਇਤੀ ਰਿਹਾਇਸ਼ ਦੇ ਮੁੱਦੇ ਨੂੰ ਹੱਲ ਕਰਨ ਅਤੇ ਸਥਾਨਕ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ‘ਤੇ ਕੇਂਦ੍ਰਿਤ ਆਪਣੀ ਚੋਣ ਮੁਹਿੰਮ ਚਲਾ ਰਹੇ ਹਨ।
ਇਸ ਮੌਕੇ ਬੋਲਦਿਆਂ ਝੱਜ ਨੇ ਕਿਹਾ ਕਿ ਮੈਂ ਮਾਈਕ ਡੀ ਜੋਂਗ ਦੇ ਸਮਰਥਨ ਲਈ ਮਾਣ ਮਹਿਸੂਸ ਕਰ ਰਹੀ ਹਾਂ, ਜਿਨ੍ਹਾਂ ਨੇ ਐਬਟਸਫੋਰਡ ਅਤੇ ਬ੍ਰਿਟਿਸ਼ ਕੋਲੰਬੀਆ ਦੀ ਸੇਵਾ ਲਈ ਕਈ ਦਹਾਕੇ ਸਮਰਪਿਤ ਕੀਤੇ ਹਨ। ਉਹ ਸਾਡੇ ਖੇਤਰ ਅਤੇ ਮਜ਼ਬੂਤ ਸਥਾਨਕ ਨੁਮਾਇੰਦਗੀ ਦੀ ਮਹੱਤਤਾ ਨੂੰ ਸਮਝਦੇ ਹਨ। ਉਨ੍ਹਾਂ ਦਾ ਸਮਰਥਨ ਮੇਰੇ ਅਤੇ ਸਾਡੀ ਮੁਹਿੰਮ ਲਈ ਬਹੁਤ ਮਾਇਨੇ ਰੱਖਦਾ ਹੈ। ਉਨ੍ਹਾਂ ਦੇ ਤਜਰਬੇ ਵਿੱਚ ਗੈਰ-ਲਾਭਕਾਰੀ ਸੰਸਥਾਵਾਂ ਦੀ ਅਗਵਾਈ, ਵਲੰਟੀਅਰ ਸੇਵਾ ਅਤੇ ਨੌਜਵਾਨਾਂ, ਬਜ਼ੁਰਗਾਂ, ਨਵੇਂ ਆਏ ਲੋਕਾਂ ਅਤੇ ਪਰਿਵਾਰਾਂ ਦੀ ਸਹਾਇਤਾ ਕਰਨ ਵਾਲੀਆਂ ਪਹਿਲਕਦਮੀਆਂ ਸ਼ਾਮਲ ਹਨ। ਉਨ੍ਹਾਂ ਦੇ ਪਰਿਵਾਰ ਦੀਆਂ ਜੜ੍ਹਾਂ ਵੀ ਸਥਾਨਕ ਖੇਤੀਬਾੜੀ ਅਤੇ ਕਾਰੋਬਾਰ ਵਿੱਚ ਡੂੰਘੀਆਂ ਹਨ। ਇਸ ਮੌਕੇ ਮਾਈਕ ਡੀ ਜੌਂਗ ਨੇ ਲਖਵਿੰਦਰ ਝੱਜ ਨੂੰ ਵਧ ਤੋਂ ਵੱਧ ਸਹਿਯੋਗ ਦੀ ਅਪੀਲ ਕਰਦਿਆਂ ਕਿਹਾ ਕਿ
‘ਸੈਂਟਰ ਬੀ.ਸੀ ਵੱਲੋਂ ਚੋਣ ਲੜਦਿਆਂ, ਝੱਜ ਇੱਕ ਅਜਿਹੀ ਵਿਚਾਰਧਾਰਾ ਪੇਸ਼ ਕਰ ਰਹੇ ਹਨ ਜੋ ਐਬਟਸਫੋਰਡ-ਮਿਸ਼ਨ ਦੇ ਵਸਨੀਕਾਂ ਨੂੰ ਦਰਪੇਸ਼ ਚੁਣੌਤੀਆਂ ਦੇ ਵਿਹਾਰਕ ਹੱਲਾਂ ‘ਤੇ ਕੇਂਦ੍ਰਿਤ ਹੈ।
ਉਨ੍ਹਾਂ ਦੀਆਂ ਤਰਜੀਹਾਂ ਵਿੱਚ ਘਰ ਦੇ ਨੇੜੇ ਭਰੋਸੇਯੋਗ ਸਿਹਤ ਸੰਭਾਲ ਸਹੂਲਤਾਂ, ਸਕੂਲਾਂ ਵਿਚ ਵਧੇਰੇ ਥਾਂ, ਆਵਾਜਾਈ ਦੀਆਂ ਸਮੱਸਿਆਵਾਂ ਦਾ ਹੱਲ ਅਤੇ ਰਿਹਾਇਸ਼ ਦੀ ਕਿਫਾਇਤੀ ਕੀਮਤ, ਸਥਾਨਕ ਖੇਤੀਬਾੜੀ ਅਤੇ ਛੋਟੇ ਕਾਰੋਬਾਰਾਂ ਦਾ ਸਮਰਥਨ ਕਰਨ ਵਾਲੇ ਉਪਾਅ ਸ਼ਾਮਲ ਹਨ। ਇਸ ਮੌਕੇ ਝੱਜ ਨੇ ਮਾਈਕ ਡੀ ਜੌਂਗ ਵਲੋਂ ਦਿੱਤੇ ਸਮਰਥਨ ਲਈ ਧੰਨਵਾਦ ਕਰਦਿਆਂ ਦੁਹਰਾਇਆ ਕਿ ਉਹ ਇਲਾਕੇ ਅਤੇ ਲੋਕਾਂ ਦੇ ਮੁੱਦੇ ਵਿਕਟੋਰੀਆ ਤੱਕ ਬੁਲੰਦ ਆਵਾਜ਼ ਵਿਚ ਉਠਾਉਣ ਲਈ ਉਤਸੁਕ ਹਨ।
