ਸਰੀ ਸਿਟੀ ਸੈਂਟਰ ਵਿੱਚ ਬਣੇਗਾ ਬਹੁ-ਉਦੇਸ਼ੀ ਮਨੋਰੰਜਨ ਹੱਬ, ਐਲਾਨ ਨੇੜਲੇ ਹਫ਼ਤਿਆਂ ਵਿੱਚ–
ਸਰੀ, ( ਮਹੇਸ਼ਇੰਦਰ ਸਿੰਘ ਮਾਂਗਟ)- ਸਰੀ ਸ਼ਹਿਰ ਵਿੱਚ ਬਣਾਏ ਜਾਣ ਵਾਲੇ 10,000 ਸੀਟਾਂ ਵਾਲੇ ਵਿਸ਼ਾਲ ਅਰੀਨਾ ਪ੍ਰੋਜੈਕਟ ਬਾਰੇ ਆਉਣ ਵਾਲੇ ਹਫ਼ਤਿਆਂ ਵਿੱਚ ਇੱਕ ਵੱਡਾ ਐਲਾਨ ਕੀਤਾ ਜਾਵੇਗਾ। ਇਹ ਜਾਣਕਾਰੀ ਸਰੀ ਦੇ ਸਿਟੀ ਮੈਨੇਜਰ ਰੌਬ ਕੋਸਟਾਂਜ਼ੋ ਨੇ ਸੋਮਵਾਰ (22 ਜੂਨ) ਨੂੰ ਸਰੀ ਐਂਡ ਵਾਈਟ ਰਾਕ ਬੋਰਡ ਆਫ਼ ਟਰੇਡ ਦੇ ਦੁਪਹਿਰ ਦੇ ਸਮਾਗਮ ਦੌਰਾਨ ਦਿੱਤੀ।
ਹਾਲਾਂਕਿ ਕੋਸਟਾਂਜ਼ੋ ਨੇ ਪ੍ਰੋਜੈਕਟ ਦੇ ਪੂਰੇ ਵੇਰਵੇ ਸਾਂਝੇ ਨਹੀਂ ਕੀਤੇ, ਪਰ ਉਨ੍ਹਾਂ ਨੇ ਦੱਸਿਆ ਕਿ ਇਹ ਸਿਰਫ਼ ਇੱਕ ਰਵਾਇਤੀ ਹਾਕੀ ਅਰੀਨਾ ਨਹੀਂ ਹੋਵੇਗਾ। ਪ੍ਰਸਤਾਵਿਤ ਅਰੀਨਾ ਟੌਮ ਬਿਨੀ ਪਾਰਕ ਵਿੱਚ ਚੱਕ ਬੇਲੀ ਰਿਕਰੀਏਸ਼ਨ ਸੈਂਟਰ ਦੇ ਨਾਲ ਲੱਗਦੀ ਸ਼ਹਿਰ ਦੀ ਮਲਕੀਅਤ ਵਾਲੀ ਜ਼ਮੀਨ ‘ਤੇ ਬਣਾਇਆ ਜਾਣਾ ਹੈ। ਸਰੀ ਦੀ ਵੈੱਬਸਾਈਟ ‘ਤੇ ਜਾਰੀ ਕੀਤੇ ਗਏ ਡਿਜ਼ਾਈਨ ਅਨੁਸਾਰ ਇਹ ਅਰੀਨਾ ਉਸ ਥਾਂ ‘ਤੇ ਬਣ ਸਕਦਾ ਹੈ ਜਿੱਥੇ ਇਸ ਵੇਲੇ ਬੀ.ਸੀ. ਲਾਇਨਜ਼ ਦੀ ਟ੍ਰੇਨਿੰਗ ਸਹੂਲਤ ਸਥਿਤ ਹੈ। ਨਿਰਮਾਣ ਕਾਰਜ 2027 ਵਿੱਚ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ।
ਸ਼ੈਰਾਟਨ ਵੈਨਕੂਵਰ ਗਿਲਡਫੋਰਡ ਹੋਟਲ ਵਿੱਚ ਹੋਏ “ਸ਼ੇਪਿੰਗ ਦ ਨੇਕਸਟ ਡਿਕੇਡ ਆਫ਼ ਸਰੀ” ਵਿਸ਼ੇ ਉੱਤੇ ਆਯੋਜਿਤ ਬਿਜ਼ਨਸ ਫੋਰਮ ਦੌਰਾਨ ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਕੀ ਅਰੀਨਾ ਵਿੱਚ ਕੋਈ ਪੇਸ਼ੇਵਰ ਹਾਕੀ ਟੀਮ ਜਾਂ ਹੋਰ ਸਥਾਈ ਕਿਰਾਏਦਾਰ ਹੋਣਗੇ, ਤਾਂ ਕੋਸਟਾਂਜ਼ੋ ਨੇ ਕਿਹਾ ਕਿ ਇਸ ਬਾਰੇ ਵੀ ਜਲਦੀ ਐਲਾਨ ਕੀਤਾ ਜਾਵੇਗਾ।
ਉਨ੍ਹਾਂ ਕਿਹਾ, “ਹਾਂ, ਇਸ 10,000 ਸੀਟਾਂ ਵਾਲੇ ਅਰੀਨਾ ਨਾਲ ਇੱਕ ਟੀਮ ਜੁੜੀ ਹੋਵੇਗੀ। ਅਸੀਂ ਕਿਸੇ ਐਂਕਰ ਟੀਮ ਤੋਂ ਬਿਨਾਂ ਇਸ ਪ੍ਰੋਜੈਕਟ ਨੂੰ ਅੱਗੇ ਨਹੀਂ ਵਧਾ ਰਹੇ।”
ਉਨ੍ਹਾਂ ਦੱਸਿਆ ਕਿ ਇਹ ਵਿਕਾਸ ਪ੍ਰੋਜੈਕਟ ਸਿਰਫ਼ ਖੇਡਾਂ ਤੱਕ ਸੀਮਤ ਨਹੀਂ ਰਹੇਗਾ। ਅਰੀਨਾ ਦੇ ਆਲੇ-ਦੁਆਲੇ ਰੈਸਟੋਰੈਂਟ, ਨਾਈਟ ਕਲੱਬ, ਦੁਕਾਨਾਂ, ਖੁੱਲ੍ਹਾ ਪਲਾਜ਼ਾ, ਪੰਜ ਸਿਤਾਰਾ ਹੋਟਲ, ਕਨਵੈਨਸ਼ਨ ਸੈਂਟਰ ਅਤੇ ਰਿਹਾਇਸ਼ੀ ਟਾਵਰ ਵੀ ਬਣਾਏ ਜਾਣਗੇ।
ਕੋਸਟਾਂਜ਼ੋ ਨੇ ਕਿਹਾ ਕਿ ਇਹ ਪ੍ਰੋਜੈਕਟ ਸਰੀ ਲਈ ਇੱਕ ਵਿਸ਼ਵ-ਪੱਧਰੀ ਮਨੋਰੰਜਨ ਅਤੇ ਸੱਭਿਆਚਾਰਕ ਕੇਂਦਰ ਵਜੋਂ ਵਿਕਸਤ ਹੋਵੇਗਾ। ਉਨ੍ਹਾਂ ਦੇ ਅਨੁਸਾਰ ਸਰੀ ਵਿੱਚ ਇਸ ਤਰ੍ਹਾਂ ਦੇ ਮਨੋਰੰਜਨ ਖੇਤਰ ਦੀ ਲੰਬੇ ਸਮੇਂ ਤੋਂ ਲੋੜ ਮਹਿਸੂਸ ਕੀਤੀ ਜਾ ਰਹੀ ਸੀ।
ਇਸ ਮੌਕੇ ਸਰੀ ਸਿਟੀ ਡਿਵੈਲਪਮੈਂਟ ਕਾਰਪੋਰੇਸ਼ਨ ਦੇ ਬਿਲ ਔਜਲਾ ਨੇ ਕਿਹਾ ਕਿ ਸਰੀ ਵਰਗੇ ਤੇਜ਼ੀ ਨਾਲ ਵਧ ਰਹੇ ਸ਼ਹਿਰ ਨੂੰ ਅਜਿਹੇ ਇੱਕ ਤੋਂ ਵੱਧ ਮਨੋਰੰਜਨ ਕੇਂਦਰਾਂ ਦੀ ਲੋੜ ਹੈ, ਜਿਸ ਨਾਲ ਲੋਕ ਸਰੀ ਆਉਣਗੇ, ਇੱਥੇ ਖਰਚ ਕਰਨਗੇ ਅਤੇ ਸਥਾਨਕ ਆਰਥਿਕਤਾ ਨੂੰ ਹੋਰ ਮਜ਼ਬੂਤੀ ਮਿਲੇਗੀ।
ਕੋਸਟਾਂਜ਼ੋ ਨੇ ਸਰੀ ਵਿੱਚ ਚੱਲ ਰਹੇ ਹੋਰ ਮਹੱਤਵਪੂਰਨ ਵਿਕਾਸ ਪ੍ਰੋਜੈਕਟਾਂ ਦਾ ਵੀ ਜ਼ਿਕਰ ਕੀਤਾ, ਜਿਨ੍ਹਾਂ ਵਿੱਚ ਸਕਾਈਟ੍ਰੇਨ ਵਿਸਥਾਰ, ਐੱਸ.ਐੱਫ.ਯੂ. ਸਕੂਲ ਆਫ਼ ਮੈਡੀਸਨ, ਨਵਾਂ ਨਿਊਟਨ ਕਮਿਊਨਿਟੀ ਸੈਂਟਰ, ਨਿਕੋਮੈਕਲ ਰਿਵਰਫਰੰਟ ਪਾਰਕ ਅਤੇ ਕਿੰਗ ਜਾਰਜ ਬੱਸ ਰੈਪਿਡ ਟ੍ਰਾਂਜ਼ਿਟ ਪ੍ਰੋਜੈਕਟ ਸ਼ਾਮਲ ਹਨ।
ਉਨ੍ਹਾਂ ਕਿਹਾ ਕਿ ਨੌਰਥ ਸਰੀ ਅਤੇ ਵਾਈਟ ਰਾਕ ਨੂੰ ਜੋੜਨ ਵਾਲਾ ਰੈਪਿਡ ਟ੍ਰਾਂਜ਼ਿਟ ਪ੍ਰੋਜੈਕਟ ਸ਼ਹਿਰ ਦੇ ਸਭ ਤੋਂ ਮਹੱਤਵਪੂਰਨ ਭਵਿੱਖੀ ਵਿਕਾਸ ਕਾਰਜਾਂ ਵਿੱਚੋਂ ਇੱਕ ਹੋਵੇਗਾ।
ਸਰੀ ਐਂਡ ਵਾਈਟ ਰਾਕ ਬੋਰਡ ਆਫ਼ ਟਰੇਡ ਦੀ ਸਾਲਾਨਾ ਜਨਰਲ ਮੀਟਿੰਗ ਵੀ ਇਸ ਮੌਕੇ ਹੋਈ, ਜਿਸ ਦੌਰਾਨ ਆਰ.ਜੇ.ਸੀ. ਇੰਜੀਨੀਅਰਜ਼ ਦੇ ਰੌਜਰ ਸਟੀਅਰਜ਼ ਨੂੰ ਨਵਾਂ ਚੇਅਰ ਚੁਣਿਆ ਗਿਆ। ਗੁਰਦੀਪ ਸਾਹੋਤਾ, ਲੀ ਗੋਂਗ ਅਤੇ ਨਾਥਨ ਵੈਨ ਕੁਇਕ ਨੂੰ ਨਵੇਂ ਡਾਇਰੈਕਟਰ ਵਜੋਂ ਬੋਰਡ ਵਿੱਚ ਸ਼ਾਮਲ ਕੀਤਾ ਗਿਆ।
