ਵਿੰਨੀਪੈਗ ( ਮਾਵੀ, ਸ਼ਰਮਾ)-ਮੈਨੀਟੋਬਾ ਦੇ ਪ੍ਰੀਮੀਅਰ ਵਾਬ ਕਿਨਿਊ ਨੇ ਚਰਚਿਲ ਬੰਦਰਗਾਹ ਨੂੰ ਮੁੜ ਆਰਥਿਕ ਸਰਗਰਮੀਆਂ ਦਾ ਕੇਂਦਰ ਬਣਾਉਣ ਲਈ ਨਿਵੇਸ਼ਕਾਂ ਨੂੰ ਵੱਡੀ ਟੈਕਸ ਰਾਹਤ ਦੀ ਪੇਸ਼ਕਸ਼ ਕੀਤੀ ਹੈ। ਟੋਰਾਂਟੋ ਵਿੱਚ ਚੱਲ ਰਹੇ ਫੈਡਰਲ ਸਰਕਾਰ ਦੇ ਪਹਿਲੇ ਕੌਮੀ ਨਿਵੇਸ਼ ਸੰਮੇਲਨ ਦੌਰਾਨ ਕਿਨਿਊ ਨੇ ਐਲਾਨ ਕੀਤਾ ਕਿ ਚਰਚਿਲ ਨਾਲ ਸਬੰਧਿਤ ਯੋਗ ਵੱਡੇ ਪੂੰਜੀ ਪ੍ਰਾਜੈਕਟਾਂ ਲਈ ਪ੍ਰੋਵਿੰਸ਼ੀਅਲ ਸੇਲਜ਼ ਟੈਕਸ (ਪੀਐੱਸਟੀ) ਤੋਂ ਛੋਟ ਦਿੱਤੀ ਜਾਵੇਗੀ।
ਮੈਨੀਟੋਬਾ ਸਰਕਾਰ ਵੱਲੋਂ ਚਰਚਿਲ ਬੰਦਰਗਾਹ ਅਤੇ ਇਸ ਨਾਲ ਜੁੜੇ ਵੱਡੇ ਪੂੰਜੀ ਪ੍ਰਾਜੈਕਟਾਂ ਲਈ ਪ੍ਰੋਵਿੰਸ਼ੀਅਲ ਸੇਲਜ਼ ਟੈਕਸ ਤੋਂ ਰਾਹਤ ਦੇਣ ਦਾ ਐਲਾਨ ਉੱਤਰੀ ਮੈਨੀਟੋਬਾ ਦੀ ਆਰਥਿਕਤਾ ਲਈ ਮਹੱਤਵਪੂਰਨ ਕਦਮ ਹੈ। ਪ੍ਰੀਮੀਅਰ ਵਾਬ ਕਿਨਿਊ ਵੱਲੋਂ ਟੋਰਾਂਟੋ ਵਿੱਚ ਕੌਮੀ ਨਿਵੇਸ਼ ਸੰਮੇਲਨ ਦੌਰਾਨ ਕੀਤੀ ਇਸ ਪਹਿਲ ਦਾ ਉਦੇਸ਼ ਨਿੱਜੀ ਪੂੰਜੀ ਨੂੰ ਉੱਤਰ ਵੱਲ ਖਿੱਚਣਾ ਅਤੇ ਚਰਚਿਲ ਨੂੰ ਵਪਾਰ ਤੇ ਆਰਕਟਿਕ ਆਵਾਜਾਈ ਦੇ ਮਹੱਤਵਪੂਰਨ ਕੇਂਦਰ ਵਜੋਂ ਵਿਕਸਤ ਕਰਨਾ ਹੈ। ਇਸ ਯੋਜਨਾ ਦੀ ਖ਼ਾਸ ਗੱਲ ਇਹ ਹੈ ਕਿ ਰਾਹਤ ਸਿਰਫ਼ ਬੰਦਰਗਾਹ ਦੇ ਵਿਕਾਸ ਤੱਕ ਸੀਮਤ ਨਹੀਂ ਰਹੇਗੀ। ਊਰਜਾ ਕੌਰੀਡੋਰ, ਐੱਲਐੱਨਜੀ ਸਹੂਲਤਾਂ, ਰੇਲਵੇ ਦੇ ਸੁਧਾਰ ਅਤੇ ਆਈਸ ਬ੍ਰੇਕਿੰਗ ਸਮਰੱਥਾ ਵਰਗੇ ਵੱਡੇ ਪ੍ਰਾਜੈਕਟ ਵੀ ਇਸ ਦੇ ਦਾਇਰੇ ਵਿੱਚ ਆ ਸਕਦੇ ਹਨ। ਸਰਕਾਰ ਦਾ ਦਾਅਵਾ ਹੈ ਕਿ ਮਾਈਨਿੰਗ, ਬੁਨਿਆਦੀ ਢਾਂਚੇ ਅਤੇ ਖੇਤੀਬਾੜੀ ਸਮੇਤ ਉੱਤਰੀ ਖੇਤਰ ਵਿੱਚ 85 ਅਰਬ ਡਾਲਰ ਤੋਂ ਵੱਧ ਦੇ ਸੰਭਾਵੀ ਨਿਵੇਸ਼ ਮੌਕੇ ਮੌਜੂਦ ਹਨ।
ਚਰਚਿਲ ਦੀ ਮਹੱਤਤਾ ਸਿਰਫ਼ ਮੈਨੀਟੋਬਾ ਤੱਕ ਸੀਮਤ ਨਹੀਂ। ਹਡਸਨ ਬੇਅ ਰਾਹੀਂ ਇਹ ਰਸਤਾ ਕੈਨੇਡਾ ਨੂੰ ਅੰਤਰਰਾਸ਼ਟਰੀ ਬਾਜ਼ਾਰਾਂ ਨਾਲ ਜੋੜਨ ਦੀ ਵਿਲੱਖਣ ਸਮਰੱਥਾ ਰੱਖਦਾ ਹੈ। ਹਡਸਨ ਬੇਅ ਰੇਲਵੇ ਨੂੰ 2017 ਵਿੱਚ ਭਾਰੀ ਨੁਕਸਾਨ ਪਹੁੰਚਣ ਤੋਂ ਬਾਅਦ ਬੰਦਰਗਾਹ ਦੀਆਂ ਗਤੀਵਿਧੀਆਂ ਲਗਪਗ ਠੱਪ ਹੋ ਗਈਆਂ ਸਨ। ਬਾਅਦ ਵਿੱਚ ਆਰਕਟਿਕ ਗੇਟਵੇਅ ਗਰੁੱਪ ਦੀ ਅਗਵਾਈ ਹੇਠ ਰੇਲਵੇ ਅਤੇ ਬੰਦਰਗਾਹ ਦੀ ਮੁੜ ਬਹਾਲੀ ਨੇ ਇਸ ਰਸਤੇ ਵਿੱਚ ਨਵੀਂ ਉਮੀਦ ਪੈਦਾ ਕੀਤੀ। ਹਾਲੀਆ ਸਾਲਾਂ ਵਿੱਚ ਅਨਾਜ ਅਤੇ ਹੋਰ ਵਸਤਾਂ ਦੀਆਂ ਖੇਪਾਂ ਦੀ ਮੁੜ ਸ਼ੁਰੂਆਤ ਇਸ ਗੱਲ ਦਾ ਸੰਕੇਤ ਹੈ ਕਿ ਚਰਚਿਲ ਦਾ ਵਪਾਰਕ ਮਾਡਲ ਮੁੜ ਵਿਕਸਤ ਹੋ ਸਕਦਾ ਹੈ।
ਪਰ ਸਿਰਫ਼ ਪੀਐੱਸਟੀ ਛੋਟ ਨਾਲ ਵੱਡੇ ਨਿਵੇਸ਼ਕਾਂ ਨੂੰ ਆਕਰਸ਼ਿਤ ਕਰਨਾ ਯਕੀਨੀ ਨਹੀਂ ਹੋਵੇਗਾ। ਚਰਚਿਲ ਦੀ ਭੂਗੋਲਿਕ ਦੂਰੀ, ਕਠੋਰ ਮੌਸਮ, ਸੀਮਤ ਆਵਾਜਾਈ ਮੌਸਮ, ਉੱਚ ਨਿਰਮਾਣ ਲਾਗਤਾਂ ਅਤੇ ਬੁਨਿਆਦੀ ਢਾਂਚੇ ਦੇ ਲੰਬੇ ਸਮੇਂ ਦੇ ਰੱਖ-ਰਖਾਅ ਵਰਗੀਆਂ ਚੁਣੌਤੀਆਂ ਅਜੇ ਵੀ ਮੌਜੂਦ ਹਨ। ਇਸ ਤੋਂ ਇਲਾਵਾ, ਵੱਡੇ ਪ੍ਰਾਜੈਕਟਾਂ ਲਈ ਫੈਡਰਲ ਸਰਕਾਰ, ਨਿੱਜੀ ਖੇਤਰ ਅਤੇ ਸਥਾਨਕ ਤੇ ਫਰਸਟ ਨੇਸ਼ਨ ਭਾਈਵਾਲਾਂ ਵਿਚਕਾਰ ਲੰਬੇ ਸਮੇਂ ਦੀ ਸਾਂਝ ਜ਼ਰੂਰੀ ਹੋਵੇਗੀ
